काठमाडौं । नेकपा एमालेका अध्यक्ष केपी शर्मा ओलीले राज्य संयन्त्र पूर्वाग्रह र प्रतिशोधको भावनाबाट सञ्चालित भएको आरोप लगाएका छन्।

उनले विपक्षी राजनीतिक शक्तिलाई लक्षित गरेर विभिन्न गतिविधि भइरहेको दाबी गर्दै त्यस्ता कार्य स्वीकार्य नहुने बताएका छन्।

ओलीले राज्यले निष्पक्ष र कानुनसम्मत ढंगले काम गर्नुपर्ने भए पनि पछिल्ला गतिविधिले प्रतिशोधको मानसिकता झल्काएको बताए। उनले राज्यलाई लोकतान्त्रिक मूल्य र विधिको शासनअनुसार सञ्चालन गर्न आग्रह गरे।

ओलीले कसैसँग अकुत सम्पत्ति रहेको आशंका भए कानुनी प्रक्रियाअनुसार छानबिन गर्न सकिने बताए। तर, पूर्वाग्रह राखेर व्यक्तिलाई लक्षित गरी कारबाही अघि बढाउनु उचित नहुने उनको भनाइ थियो।

सम्पत्ति विवरण मागिएको प्रसंग उल्लेख गर्दै उनले आगजनीका कारण आफ्ना कागजात नष्ट भएको दाबी गरे।

‘आगो लगाएर खरानी बनाएको ठाउँमा मेरो सम्पत्ति विवरण खोजिन्छ। फेरि सम्पत्ति विवरण चाहियो भनिन्छ। त्यही खरानी छ, उठाएर लैजानुस्,’ उनले भने।

उनले सम्पत्ति विवरणको विषयलाई लिएर भइरहेको गतिविधिलाई राजनीतिक प्रतिशोधको रूपमा चित्रण गरे। राज्यका निकायहरू निष्पक्ष, तथ्यमा आधारित र कानुनी सीमाभित्र रहेर काम गर्नुपर्नेमा जोड दिँदै ओलीले प्रतिशोधको भावनाबाट प्रेरित कदमले लोकतान्त्रिक प्रणालीलाई कमजोर बनाउने बताए।