काठमाडौं। उच्च अदालत पाटनका उपरजिस्ट्रार डिल्लीप्रसाद पराजुलीको मंगलबार बिहान निधन भएको छ।

उच्च अदालत पाटनका सूचना अधिकारी गोविन्द कोइरालाका अनुसार पराजुली बिहान नुहाउन जाने क्रममा अचानक असहज महसुस भएपछि तत्काल भक्तपुरस्थित अस्पताल लगिएको थियो।

अस्पतालमा उपचारका क्रममा उनको निधन भएको कोइरालाले जानकारी दिए। प्रारम्भिक रूपमा हृदयाघातका कारण मृत्यु भएको हुन सक्ने आशंका गरिएको भए पनि आधिकारिक कारण पुष्टि हुन बाँकी रहेको उनले बताए।

‘बिहान नुहाउन जाने क्रममा उहाँलाई असहज महसुस भएको थियो। त्यसपछि अस्पताल लगियो, तर उपचारकै क्रममा निधन भयो। हृदयाघात भएको हुन सक्ने प्रारम्भिक अनुमान छ’, कोइरालाले भने।

पराजुलीको निधनपछि शोकस्वरूप उच्च अदालत पाटनका मंगलबारका सबै इजलास तथा सुनुवाइ स्थगित गरिएको अदालतले जनाएको छ।

उनको अन्त्येष्टि पशुपतिनाथ मन्दिर परिसरस्थित आर्यघाटमा गर्ने तयारी गरिएको छ।