काठमाडौं। विश्वकै अग्रणी प्रविधि कम्पनी माइक्रोसफ्टले आफ्नो विश्वव्यापी कार्यबलमा ठूलो कटौती गर्ने घोषणा गरेको छ।

कम्पनीले कुल ४ हजार ८ सय कर्मचारीको जागिर कटौती गर्ने निर्णय गरेको हो, जुन यसको कुल कार्यबलको करिब २.१ प्रतिशत बराबर हो।

कम्पनीले द्रुत रूपमा परिवर्तन भइरहेको सूचना प्रविधि (आईटी) उद्योगअनुसार आफ्नो संरचनालाई थप प्रभावकारी बनाउन र रणनीतिक प्राथमिकतामा केन्द्रित हुन पुनर्संरचना अघि बढाइएको जनाएको छ। यस निर्णयको सबैभन्दा ठूलो प्रभाव माइक्रोसफ्टको गेमिङ व्यवसाय एक्सबक्स डिभिजनमा पर्ने भएको छ।

माइक्रोसफ्टकी कार्यकारी उपाध्यक्ष एमी कोलम्यानले कर्मचारीहरूलाई पठाएको आन्तरिक सन्देशमा कम्पनीले भविष्यका उच्च सम्भावना भएका क्षेत्रहरूमा लगानी केन्द्रित गर्न संरचनागत परिवर्तन आवश्यक भएको उल्लेख गरेकी छन्।

उनले कम्पनीले ग्राहकलाई बढी मूल्य प्रदान गर्न सक्ने क्षेत्रलाई प्राथमिकतामा राख्दै स्रोत र जनशक्तिको पुनः व्यवस्थापन गरिरहेको बताएकी छन्।

पुनर्संरचना योजनाअन्तर्गत एक्सबक्स डिभिजनबाट मात्रै तत्काल १ हजार ६ सयभन्दा बढी कर्मचारीको जागिर समाप्त गरिने भएको छ। यससँगै आगामी एक वर्षभित्र थप १ हजार ६ सय रोजगारी कटौती गर्ने योजना पनि कम्पनीले सार्वजनिक गरेको छ।

हालै एक्सबक्सको प्रमुख कार्यकारी अधिकृत (सीईओ) नियुक्त भएकी आशा शर्माले कर्मचारीहरूलाई सम्बोधन गर्दै कम्पनी एक्सबक्सको इतिहासकै सबैभन्दा ठूलो पुनर्संरचनाको प्रक्रियामा रहेको बताइन्।

उनले यो परिवर्तन खर्च कटौतीका लागि मात्र नभई दीर्घकालीन प्रतिस्पर्धात्मक क्षमता सुदृढ बनाउन आवश्यक भएको स्पष्ट पारेकी छन्।

‘यी परिवर्तनहरू एक्सबक्सलाई सानो बनाउनका लागि होइनन्, यसको भविष्यलाई अझ बलियो बनाउनका लागि हुन्। इतिहासमा धेरै कम्पनीहरूले वर्तमानलाई जोगाउने प्रयासमा भविष्य गुमाएका उदाहरण छन्। हामी त्यही गल्ती दोहोर्‍याउने छैनौँ,’ उनले भनिन्।

पुनर्संरचनाअन्तर्गत एक्सबक्ससँग आबद्ध चार प्रमुख गेम विकास स्टुडियो कम्पल्सन गेम्स, डबल फाइन प्रोडक्सन्स, निन्जा थ्योरी र अनडेड ल्याब्सलाई पनि कम्पनीको नयाँ संरचनाअनुसार पुनर्गठन गरिने भएको छ।

पछिल्ला वर्षहरूमा कृत्रिम बुद्धिमत्ता (एआई), क्लाउड कम्प्युटिङ र डिजिटल सेवामा तीव्र लगानी गरिरहेको माइक्रोसफ्टले आफ्नो व्यवसायलाई भविष्यका प्रविधिमुखी क्षेत्रमा केन्द्रित गर्ने रणनीति अघि बढाइरहेको छ।

यही रणनीतिअन्तर्गत कम्पनीले विभिन्न विभागमा पुनर्संरचना गर्दै स्रोत व्यवस्थापनलाई थप प्रभावकारी बनाउने प्रयास गरिरहेको विश्लेषण गरिएको छ।

यस निर्णयसँगै विश्व प्रविधि उद्योगमा जारी पुनर्संरचना र लागत व्यवस्थापनको प्रवृत्तिमा माइक्रोसफ्ट पनि थप स्पष्ट रूपमा अघि बढेको देखिएको छ।