काठमाडौं । सम्पत्ति शुद्धीकरण अनुसन्धान विभागको टोली पूर्वप्रधानमन्त्री शेरबहादुर देउवा र पूर्वमन्त्री डा. आरजु राणा देउवाका छोरा जयवीर देउवालाई खोज्दै बूढानीलकण्ठस्थित निवास पुगेको छ।

अनुसन्धानका लागि बयान लिन आवश्यक परेपछि विभागका अनुसन्धान अधिकृतहरू सोमबार देउवा निवास पुगेका थिए। तर, जयवीर वा उनका तर्फबाट म्याद बुझ्ने व्यक्ति फेला नपरेपछि टोलीले घरमै सात दिनभित्र उपस्थित हुनुपर्ने सूचना टाँसेको छ।

विभागका अनुसार निवासमा म्याद बुझाउने प्रयास सफल नभएपछि मंगलबार गोरखापत्र दैनिकमार्फत पनि सार्वजनिक सूचना प्रकाशित गरिएको छ। सम्पत्ति शुद्धीकरण निवारण ऐन, २०६४ अनुसार अनुसन्धानको क्रममा आवश्यक व्यक्तिलाई म्याद जारी गरी उपस्थित हुन निर्देशन दिन सकिने कानुनी व्यवस्था छ।

विभाग स्रोतका अनुसार जयवीर देउवाको सम्पत्ति र आर्थिक कारोबारबारे प्रारम्भिक अनुसन्धानमा केही शंकास्पद विवरण फेला परेपछि विस्तृत अनुसन्धान अघि बढाइएको हो। उनीसँग सम्पत्तिको स्रोत, आर्थिक कारोबार तथा केही विवादास्पद प्रकरणबारे सोधपुछ गर्नुपर्ने भएकाले बयानका लागि बोलाइएको जनाइएको छ।

अनुसन्धान अधिकारीहरूले तोकिएको सात दिनभित्र उपस्थित भई बयान दिन आग्रह गरेका छन्। यदि उनी म्यादभित्र सम्पर्कमा नआए कानुनबमोजिम थप अनुसन्धान प्रक्रिया र आवश्यक कानुनी कदम अघि बढाइने विभागले जनाएको छ।