काठमाडौं । नेकपा एमालेका महासचिव शंकर पोखरेलले चर्का भाषणले नभई राजनीतिक इमानदारीले देश बन्ने बताउका छन् । सामाजिक सञ्जालमार्फत उनले सस्तो लोकप्रियताले देश नबन्ने बताए ।

उनले देशको वर्तमान संकटको समाधान सस्तो लोकप्रियतावाद वा क्षणिक उत्तेजनाबाट सम्भव नहुने बताएका छन्। उनले देश रूपान्तरणका लागि वैचारिक स्पष्टता, स्पष्ट गन्तव्य र राजनीतिक इमानदारी अपरिहार्य रहेको बताएका छन्।

उनले लेखेका छन् – परिवर्तनको भ्रम र आजको कटु सत्य!
देशको विकृति, विसङ्गति र बेथिति हटाउने जिम्मा आफैँभित्रका विकृति (लागुऔषधको दुर्व्यसन जस्ता गम्भीर विचलन) र आचरणगत कमजोरीहरू सुधार्न नसकेको नेतृत्वलाई सुम्पनु नै हाम्रो सबैभन्दा ठूलो भूल थियो भन्ने कुरा नेपाली समाजले विस्तारै महसुस गर्न थालेको छ। चर्का भाषण र सस्तो लोकप्रियता (पपुलिजम) को भरमा देश बदल्ने दाबी गर्नेहरूको कार्यशैली पूर्णतः विरोधाभासपूर्ण देखिएपछि उनीहरूबाट देश रूपान्तरण सम्भव छैन भन्ने कटु यथार्थ आज छर्लङ्ग भइसकेको छ। वास्तवमा देश बदल्नका लागि स्पष्ट वैचारिक जग, सुस्पष्ट योजनासहितको गन्तव्य र त्यसप्रतिको निरन्तर समर्पण आवश्यक पर्दछ।
हिजो देशमा केही भएकै थिएन भन्ने भाष्य गलत हो। विगतमा धेरै कामहरू भएका थिए र विकासको प्रक्रिया अघि बढ्दै पनि थियो। पूर्वाधार र सूचना प्रविधिको विकासले समाजमा वस्तु र सेवाको उपलब्धता त सहज बनायो, जसले गर्दा आम मानिसको अपेक्षा र चाहना ह्वात्तै वृद्धि भयो। तर, सोही अनुरूप नागरिकको वैधानिक आयमा भने वृद्धि हुन सकेन।
अपेक्षा र आयबीचको यही असन्तुलनका कारण वस्तु र सेवा प्राप्त गर्न समाजमा वैध-अवैध सबै तरिकाहरू अपनाउने गलत प्रवृत्ति मौलायो। परिणामतः समाजमा भ्रष्टीकरण, अपराधीकरण, सामाजिक अराजकता, पैतृक सम्पत्तिको तीव्र क्षयीकरण र वैदेशिक पलायन जस्ता गम्भीर समस्याहरू देखा परे। यसैबाट उत्पन्न जनअसन्तोषलाई सोसल मिडिया र पपुलिजम (सस्तो लोकप्रियतावाद) का माध्यमबाट राज्य र राजनीतिक दलहरूका विरुद्धमा उचाल्न र प्रयोग गर्न केही शक्तिहरू सफल भए।
तर, यस प्रकृतिका गम्भीर संरचनागत समस्याहरूको समाधान पपुलिजम वा क्षणिक उत्तेजनाबाट सम्भव छैन भन्ने कुरा अब प्रष्ट भइसकेको छ। यस्ता संकटहरूको दिगो समाधान केवल वैचारिक स्पष्टता र राजनीतिक इमानदारिताको जगमा मात्र खोजिनुपर्दछ र त्यो सम्भव पनि छ।