काठमाडौं । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले सरकारले मिटरब्याज पीडितलाई धोका दिएको आरोप लगाएका छन्।

आइतबार पार्टी केन्द्रीय कार्यालय, च्यासलमा आयोजित एक कार्यक्रममा बोल्दै अध्यक्ष ओलीले सरकारले अर्थतन्त्र सुधार र गरिबी न्यूनीकरणमा प्रभावकारी काम गर्न नसकेको टिप्पणी गरे।

उनले मिटरब्याज पीडितका समस्या समाधान गर्न सरकार असफल भएको दाबी गर्दै गरिबी घटाउनुको सट्टा गरिब नागरिकलाई थप समस्यामा धकेल्ने काम भइरहेको आरोप लगाए।

‘मिटरब्याज पीडितलाई सरकारले धोका दिएको छ। अर्थतन्त्र उकास्ने काम भएको छैन। गरिबी निवारण गरेर जानुपर्ने ठाउँमा गरिबलाई डुबाउने काम भएको छ,’ ओलीले भने।

फरक प्रसंगमा अध्यक्ष ओलीले एमाले सूचना प्रविधि (आईटी) क्षेत्रमा अपेक्षाअनुसार अघि बढ्न नसकेको स्वीकार गरे। उनले प्रविधिमा दक्षता हासिल गर्न निरन्तर अध्ययन र अभ्यास आवश्यक रहेको उल्लेख गरे।

‘हामी आईटी क्षेत्रमा पछि परेका छौँ। ज्ञान दुई ढङ्गले प्राप्त गर्न सकिन्छ- एउटा गुरुको माध्यमबाट र अर्को आफ्नै मेहनतबाट। बिना अभ्यास कुनै पनि चिज प्राप्त गर्न सकिँदैन,’ उनले भने।