कपिलवस्तु। शुक्रबारदेखि सम्पर्कविहीन रहेका कपिलवस्तु नगरपालिकाका पूर्वमेयर तथा नेपाली कांग्रेसका नेता किरण सिंह तिलौराकोट सामुदायिक जंगलमा मृत अवस्थामा भेटिएका छन्।

६५ वर्षीय सिंहको शव आइतबार निरन्तर खोजी गर्ने क्रममा जंगलको बीच भागमा फेला परेको जिल्ला प्रहरी कार्यालय कपिलवस्तुले जनाएको छ।

कपिलवस्तुका प्रहरी प्रमुख एसपी मनोहर भट्टका अनुसार सिंहको खोजीका क्रममा जंगलको बीच भागमा शव भेटिएको हो। सिंहले प्रयोग गर्दै आएको मोटरसाइकल पनि यसअघि सोही जंगल क्षेत्रमा फेला परेको थियो।

सिंह शुक्रबार दिउँसो करिब २ बजे कपिलवस्तु नगरपालिका–३ स्थित आफ्नो घरबाट निस्किएका थिए। घरबाट निस्किएको करिब डेढ घण्टापछि अर्थात् साढे ३ बजेतिर उनले आफू निकटका केही व्यक्तिलाई फोन गरेर आफू जंगलमा बाटो बिराएको जानकारी गराएका थिए।

त्यसपछि परिवारका सदस्य, आफन्त, स्थानीय र प्रहरी उनको खोजीमा जुटेका थिए। खोजीका क्रममा पूर्व–पश्चिम राजमार्गबाट करिब आठ किलोमिटर भित्र जंगल क्षेत्रमा सिंहले प्रयोग गर्ने लु.प्र. ०१–०१३ प ७९७० नम्बरको मोटरसाइकल रोकिराखेको अवस्थामा भेटिएको थियो।

मोटरसाइकल भेटिएपछि प्रहरीले सम्भावित क्षेत्रलाई प्राथमिकतामा राखेर खोजीलाई तीव्र बनाएको थियो। यसअघि खोजीका लागि तालिमप्राप्त कुकुरसहितको प्रहरी टोली र ड्रोनसमेत परिचालन गरिएको थियो।

स्थानीयका अनुसार सिंह आफ्नो समूहले सञ्चालन गर्दै आएको कृषि फार्मतर्फ जाने क्रममा जंगलको बाटो प्रयोग गरेका थिए। छोटो बाटो पर्ने भएकाले उनी जंगल हुँदै गएको र त्यही क्रममा बाटो बिराएको हुनसक्ने प्रारम्भिक अनुमान गरिएको थियो।

शुक्रबारदेखि नै प्रहरी, स्थानीयवासी र आफन्तले जंगलका विभिन्न क्षेत्रमा खोजी गरिरहेका थिए। निरन्तरको खोजीपछि आइतबार जंगलको बीच भागमा उनको शव फेला परेको हो।

सिंहको मृत्युको कारणबारे भने प्रहरीले तत्काल केही खुलाएको छैन। शव भेटिएपछि घटनास्थलमा आवश्यक अनुसन्धान तथा कानुनी प्रक्रिया अघि बढाइएको प्रहरीले जनाएको छ। मृत्युको वास्तविक कारण पत्ता लगाउन थप अनुसन्धान भइरहेको छ।

सिंह कपिलवस्तु नगरपालिकाका पूर्वमेयर हुनुका साथै नेपाली कांग्रेसमा सक्रिय राजनीतिक व्यक्तित्वका रूपमा परिचित थिए। उनको निधनको खबरपछि स्थानीय राजनीतिक तथा सामाजिक क्षेत्रमा शोक छाएको छ।