काठमाडौं। नेकपा एमालेका सांसद लक्ष्मीप्रसाद पोखरेलले सङ्घीय संसद्को गरिमा कायम राख्न पोसाक संहिता लागू गर्न माग गरेका छन्।

सोमबार प्रतिनिधिसभाको शून्य समयमा बोल्दै उनले प्रधानमन्त्री र मन्त्रीहरू समेत टिसर्ट लगाएर संसद् बैठकमा सहभागी हुने गरेको भन्दै सभामुखको ध्यानाकर्षण गराए। उनले संसद् प्रवेशमा टिसर्ट लगाउन रोक लगाउँदै सांस्कृतिक वा राष्ट्रिय पोसाक अनिवार्य गर्न रुलिङ माग गरे।

पोखरेलले संसद्को लोगो पनि जथाभावी प्रयोग भइरहेको भन्दै कोट, हाफकोट र ओभरकोटबाहेक टिसर्ट, ज्याकेट, सर्ट, कुर्ता, ब्लाउज र सलमा लोगो प्रयोग गर्न रोक लगाउनुपर्ने बताए।

संसदीय अनुशासनका लागि विभिन्न देशका अभ्यासको उदाहरण दिँदै उनले संसद्को पोसाकसम्बन्धी मर्यादा कायम गर्न सभामुखसँग विशेष रुलिङ माग गरे।