काठमाडौं। प्रधानमन्त्री वालेन्द्र शाह(बालेन) र सभामुख डोलप्रसाद अर्यालबीच मंगलबार दिउँसो भेटवार्ता भएको छ।

प्रधानमन्त्री तथा मन्त्रिपरिषद्को कार्यालयमा भएको भेटवार्तामा संघीय संसद्को चालू अधिवेशन, संसद्को गतिविधि तथा समसामयिक राजनीतिक विषयमा छलफल भएको बताइएको छ।

स्रोतका अनुसार भेटका क्रममा सभामुख अर्यालले प्रधानमन्त्री शाहलाई संसद्मा उपस्थित भएर सांसदहरूले उठाएका प्रश्नको जवाफ दिन आग्रह गरेका छन्।

‘संसद्मा प्रधानमन्त्रीको खोजी भइरहेको छ। कम्तीमा सदनमा उपस्थित भएर जवाफ दिनुहोस् भनेर सभामुखले आग्रह गर्नुभयो,’ स्रोतले भन्यो।

तर, सभामुखको आग्रहमा प्रधानमन्त्री शाहले ठोस जवाफ नदिएको स्रोतको दाबी छ। प्रतिपक्षी दलहरूले निरन्तर संसद्मा प्रधानमन्त्रीको उपस्थितिको माग गर्दै आएका छन्। उनीहरूले सरकारका कामकारबाही तथा विभिन्न समसामयिक विषयमा प्रधानमन्त्रीबाटै जवाफ मागिरहेका छन्।

प्रधानमन्त्री शाह भने संसद्मा उपस्थित भएर सांसदका प्रश्नको जवाफ दिन अनिच्छुक देखिएको विपक्षी सांसदहरूको आरोप छ।

मंगलबारकै प्रतिनिधिसभा बैठकमा प्रमुख प्रतिपक्षी नेपाली कांग्रेसका सांसद भरतबहादुर श्वारले पनि प्रधानमन्त्री संसद्मा उपस्थित भएर सांसदका प्रश्नको जवाफ दिनबाट पन्छिएको भन्दै आलोचना गरेका थिए।

संसद्मा प्रधानमन्त्रीको नियमित उपस्थिति र सांसदका प्रश्नको जवाफ दिने विषय पछिल्लो समय राजनीतिक बहसको विषय बन्दै गएको छ।