कैलाली। सुदूरपश्चिम प्रदेशका मुख्यमन्त्री कमलबहादुर शाहले पदबाट राजीनामा दिने तयारी गरेका छन्।

सत्ता गठबन्धनमा रहेको नेकपा एमालेले समर्थन फिर्ता लिएपछि अल्पमतमा परेका शाहले संवैधानिक समयसीमा सकिनुअघि नै राजीनामा दिने तयारी गरेको उनीनिकट स्रोतले जनाएको छ।

स्रोतका अनुसार मुख्यमन्त्री शाहले भोलि प्रदेश प्रमुखसमक्ष राजीनामा दिने सम्भावना छ। एमालेले समर्थन फिर्ता लिएपछि प्रदेश सरकार अल्पमतमा परेको २९औँ दिनमा नेपाली कांग्रेस संसदीय दलको बैठक बोलाइएको छ भने त्यसको भोलिपल्ट राजीनामा दिने तयारी गरिएको हो।

मुख्यमन्त्री शाहले यसअघि विश्वासको मत लिने विषयमा पनि छलफल गरेका थिए। तर, प्रदेशसभामा आवश्यक बहुमत जुट्ने सम्भावना कमजोर देखिएपछि राजीनामाको विकल्प रोज्न लागिएको कांग्रेसको दाबी छ।

५३ सदस्यीय सुदूरपश्चिम प्रदेशसभामा सरकार गठन वा जोगाउन २७ सांसदको समर्थन आवश्यक पर्छ। हाल मुख्यमन्त्री शाहसँग नेपाली कांग्रेसका १८ सांसदको मात्र समर्थन छ। कांग्रेसका सांसद प्रकाशबहादुर देउवा हाल अमेरिका रहेकाले तत्काल उपलब्ध समर्थनको संख्यामा समेत प्रश्न उठेको छ।

सरकार जोगाउन कांग्रेसबाहेक थप ९ सांसदको समर्थन आवश्यक पर्ने भए पनि सत्ता जोगाउने गरी थप मतको सुनिश्चितता हुन नसकेको बताइएको छ।

मुख्यमन्त्रीको राजीनामा तथा पछिल्लो राजनीतिक अवस्थाबारे छलफल गर्न कांग्रेस संसदीय दलको बैठक आज दिउँसो २ बजे बोलाइएको प्रमुख सचेतक सरस्वती खड्काले जानकारी दिएकी छन्।

उनका अनुसार एमालेले समर्थन फिर्ता लिएपछि सरकार अल्पमतमा परेको विषयमा दलभित्र परामर्श आवश्यक भएकाले बैठक बोलाइएको हो।

मुख्यमन्त्री शाहले यसअघि प्रदेशसभालाई सम्बोधन गरेर राजीनामा दिने तयारी गरेको भए पनि अब सोझै प्रदेश प्रमुखसमक्ष राजीनामा बुझाउने विकल्पमा समेत छलफल भइरहेको स्रोतको भनाइ छ। विश्वासको मत लिन वा संसद्मा सम्बोधन गरी राजीनामा दिन आवश्यक कार्यव्यवस्था मिलाउन समय कम भएकाले प्रदेशसभामा उपस्थित भएर राजीनामा घोषणा गर्ने सम्भावना घटेको बताइएको छ।

मुख्यमन्त्री शाहले राजीनामा दिएपछि सुदूरपश्चिममा नयाँ सरकार गठनको प्रक्रिया अघि बढ्नेछ। नयाँ मुख्यमन्त्रीका रूपमा नेपाली कम्युनिष्ट पार्टी (नेकपा) संसदीय दलका नेता खगराज भट्टलाई अघि सार्ने विषयमा केन्द्रमा नेकपा र एमालेबीच सहमति भइसकेको बताइएको छ।

शाहको राजीनामासँगै सुदूरपश्चिम प्रदेशमा पाँचौँ मुख्यमन्त्री चयन गर्ने प्रक्रिया सुरु हुनेछ।