मुख्यमन्त्री बनेपछि खगराजले भने – ‘२७ लाख जनताको नेतृत्वको जिम्मेवारीले चुनौती थपेको छ’
Nepal One HD २९ साउन २०८३ १२:१४
काठमाडौं। सुदूरपश्चिम प्रदेशको मुख्यमन्त्रीमा नियुक्त खगराज भट्टले २७ लाख जनताको नेतृत्व गर्ने अवसरसँगै आफूमा जिम्मेवारी र चुनौती थपिएको बताएका छन्।
नेपाली कम्युनिस्ट पार्टीका नेता भट्टलाई नेकपा एमालेको समर्थनमा शुक्रबार सुदूरपश्चिमको मुख्यमन्त्री नियुक्त गरिएको हो।
मुख्यमन्त्रीमा नियुक्त भएपछि प्रतिक्रिया दिँदै भट्टले आफूलाई पद प्राप्त भएकोमा खुसीभन्दा जिम्मेवारीबोध बढी भएको बताए। उनले प्रदेशका सबै जनताको भावना समेटेर काम गर्ने प्रतिबद्धता जनाए।
‘खुसीभन्दा बढी जिम्मेवारीबोध र अलि बढी चुनौतीको भारीले थिचिएको महसुस भएको छ,’ उनले भने, ‘सिङ्गो सदनको विश्वास लिएर २७ लाख जनताको भावनालाई केन्द्रमा राखेर काम गर्नेछु।’
भट्टले आफ्नो कार्यकालमा तत्कालै ठूलो परिवर्तन वा चमत्कार गर्ने दाबी नगरे पनि आफूले गर्ने काम गुणस्तरीय र परिणाममुखी बनाउने बताए।
‘जे गर्नेछु, राम्रो गर्नेछु र राम्रो गरेको अनुभूति दिलाउनेछु,’ उनले भने।
मुख्यमन्त्री भट्टले शुक्रबार अपराह्न पद तथा गोपनीयताको शपथ लिने कार्यक्रम रहेको छ। शपथपछि उनले प्रदेश सरकारको नयाँ मन्त्रिपरिषद् विस्तार गर्ने तयारी गरेका छन्।
