काठमाडौं । कानुन, न्याय तथा मानव अधिकार समिति सभापति समीक्षा बास्कोटाले समिति बैठकमा विषयवस्तुमा केन्द्रित भएर मर्यादित र संवेदनशील भाषा प्रयोग गर्न सदस्य तथा आमन्त्रित व्यक्तिलाई आग्रह गरेकी छन्।

शुक्रबार बसेको समिति बैठकमा विभिन्न कारागार तथा हिरासतमा रहेका थुनुवा र कैदीबन्दीको मानव अधिकार अवस्थासम्बन्धी निरीक्षण तथा अवलोकन उपसमितिको प्रतिवेदन २०८३ माथि छलफल भएको थियो। बैठकमा बाल सुधार गृहमा रहेका बालबालिकाको मानव अधिकार अवस्थासम्बन्धी निरीक्षण तथा अवलोकन उपसमितिले समितिमा पेस गरेको प्रतिवेदन २०८३ पारित गर्ने तयारीसमेत भइरहेको छ।

बैठकमा गृहमन्त्री सुधन गुरुङ, कानुनमन्त्री सोविता गौतम, प्रहरी महानिरीक्षक दानबहादुर कार्कीलगायत सहभागी थिए।

छलफलका क्रममा सभापति बास्कोटाले समितिमा बोल्दा प्रयोग गरिने भाषा, शब्द र व्यवहारप्रति सबै सचेत हुनुपर्ने बताइन्। समितिमा विभिन्न मन्त्रालय तथा सरकारी निकायका प्रमुखदेखि अन्य उच्च पदस्थ अधिकारीलाई आमन्त्रण गरिने भएकाले बैठकमा हुने गतिविधि आम नागरिकले समेत नियालिरहेको उनको भनाइ थियो।

‘समितिमा हामीले आमन्त्रण गर्ने व्यक्तिहरू कुनै न कुनै संगठनका प्रमुख, कुनै न कुनै मन्त्रालयदेखि लिएर निकायका प्रमुख भएर काम गरिरहनुभएको स्थिति भएकोले यहाँ बोलिने भाषा, प्रयोग गरिने शब्द र व्यवहारप्रति हामी सचेत हुनुपर्छ,’ उनले भनिन्।

उनले समिति बैठकमा छलफल गर्दा विषयान्तर नगर्न पनि सदस्य तथा आमन्त्रित व्यक्तिहरूलाई आग्रह गरिन्। विषय उठाउँदा भाषाको प्रयोगमा समेत संवेदनशील र जिम्मेवार बन्नुपर्ने उनको भनाइ थियो।

‘समितिमा बोल्ने विषयमा विषयान्तर नभई हामीले प्रयोग गर्ने भाषामा पनि त्यत्तिकै सचेत र संवेदनशील भएर विषय उठान गरिदिनुहुन्छ भनेर माननीय सदस्यहरू र आमन्त्रित सम्पूर्ण व्यक्तित्वहरूमा हार्दिक अनुरोध गर्न चाहन्छु,’ सभापति बास्कोटाले भनिन्।