काठमाडौं । खाना पकाउने एलपी ग्यासको अभाव भएपछि काठमाडौं उपत्यकाका विभिन्न पाँच स्थानबाट ग्यासको बिक्रीवितरण सुरु गरिएको छ।

ग्यास वितरण सुरु हुनुअघि नै बिहानैदेखि सर्वसाधारणले खाली सिलिन्डर लिएर बिक्री केन्द्रमा लामो लाइन लगाएका छन्।

नेपाल आयल निगमले जिल्ला प्रशासन कार्यालय काठमाडौंसँगको समन्वयमा विभिन्न ग्यास उद्योग तथा ब्रान्डका सिलिन्डर बिक्रीवितरणको व्यवस्था गरेको हो। निगमले ग्यासको अत्यावश्यकता भएका उपभोक्तालाई लक्षित गरी तोकिएका केन्द्रबाट सिलिन्डर उपलब्ध गराउन थालेको जनाएको छ।

काठमाडौंको टेकुस्थित नेपाल आयल निगम परिसर, चावहिलस्थित यातायात कार्यालय परिसर, कीर्तिपुर र बसुन्धरास्थित राधास्वामी परिसर तथा बबरमहलस्थित पुरानो जिल्ला प्रशासन कार्यालय परिसरबाट ग्यास बिक्रीवितरण भइरहेको छ।

ग्यास लिन आउने उपभोक्ताले अनिवार्य रूपमा नागरिकता वा राष्ट्रिय परिचयपत्र साथमा ल्याउनुपर्ने व्यवस्था गरिएको छ। निगमले अत्यावश्यक भएका उपभोक्तालाई मात्र तोकिएको स्थानमा उपस्थित भएर ग्यास खरिद गर्न आग्रह गरेको छ।

बिक्री केन्द्रअनुसार विभिन्न ब्रान्डका ग्यास उपलब्ध गराइएको निगमले जनाएको छ। उपभोक्ताको चापलाई व्यवस्थित गर्न र आवश्यकताअनुसार ग्यास वितरण गर्न प्रशासन तथा सम्बन्धित निकायले समन्वय गरिरहेका छन्।

ग्यास वितरण सुरु हुनुअघि नै बिहानैदेखि सर्वसाधारण बिक्री केन्द्रमा पुगेका थिए। धेरै उपभोक्ता खाली सिलिन्डर बोकेर लामो समयदेखि लाइनमा बसेका कारण विभिन्न केन्द्रमा भीड बढेको छ।

जिल्ला प्रशासन कार्यालय काठमाडौं परिसरबाट भने बिहान ११ बजेदेखि ग्यास वितरण सुरु गरिएको छ। ग्यास पाउने आशामा सर्वसाधारण बिहानैदेखि सिलिन्डर लिएर लाइनमा बसेका थिए।

नेपाल आयल निगमले एलपी ग्यासको आयात नियमित रूपमा भइरहेको र सम्बन्धित उद्योगहरूले आफ्ना विक्रेतामार्फत पनि ग्यासको बिक्रीवितरण गरिरहेको बताउँदै आएको छ। तर बजारमा सहज रूपमा ग्यास उपलब्ध हुन नसकेको भन्दै उपभोक्ताले अतिरिक्त बिक्री केन्द्रमार्फत ग्यास वितरणको माग गर्दै आएका छन्।

निगमले अनावश्यक रूपमा ग्यास सञ्चय नगर्न र अत्यावश्यक अवस्थामा मात्र तोकिएका बिक्री केन्द्रमा पुगेर ग्यास खरिद गर्न उपभोक्तालाई आग्रह गरेको छ।

तस्बिर : साइराम उपरकोटी/नेपाल फोटो लाइब्रेरी