काठमाडौं । नेपाली कांग्रेसका सांसद प्रकाशसिंह कार्कीले भोटेकोशी बाढीपछि सम्पर्कविहीन भएका नागरिकको खोजीलाई थप प्रभावकारी बनाउन विशेष उद्धार टोली परिचालन गर्न सरकारसँग माग गरेका छन्।

बिहीबार प्रतिनिधिसभाको बैठकमा बोल्दै उनले विपद्मा आफ्ना परिवारका सदस्य गुमाएका तथा उनीहरूको अवस्थाबारे जानकारी पर्खिरहेका परिवारको पीडा निकै गहिरो रहेको बताए। बेपत्ताको खोजीलाई प्राथमिकतामा राख्दै राज्यका सबै उपलब्ध स्रोतसाधन परिचालन गर्नुपर्ने उनको भनाइ थियो।

सांसद कार्कीका अनुसार बाढीपछि सोलुखुम्बुका मात्रै ५१ जना नागरिक सम्पर्कविहीन छन्। उनीहरूको अवस्थाबारे सरकारले तत्काल खोजी गरी परिवार तथा सम्बन्धित पक्षलाई यथाशीघ्र जानकारी गराउनुपर्ने उनले बताए।

त्यसैगरी, सोलुखुम्बुका विभिन्न क्षेत्रमा जङ्गली भालुको आतंक बढ्दै गएको विषयसमेत उनले सदनमा उठाए।

भालुको बासस्थान पहिचान गरी मानव–वन्यजन्तु द्वन्द्व घटाउने गरी आवश्यक व्यवस्थापन गर्न सरकारको ध्यानाकर्षण गराए।