एजेन्सी । बेलायतका प्रधानमन्त्री एन्डी बर्नहम र फ्रान्सका राष्ट्रपति इमानुएल म्याक्रोनबीच बिहीबार हुने वार्तामा इङ्ग्लिस च्यानल हुँदै हुने अवैध आप्रवासन नियन्त्रण, युक्रेनलाई सहयोग तथा युरोपको सुरक्षा मुख्य एजेन्डा बन्ने भएको छ।

वार्ताअघि दुवै नेताले बुधबार ब्रिटिस म्युजियममा राजा चार्ल्स तृतीयसँग भेट गरेका थिए। सो क्रममा फ्रान्सबाट लन्डन ल्याइएको ११औँ शताब्दीको ऐतिहासिक बायक्स टेपेस्ट्रीको प्रदर्शनीको पूर्वावलोकन गरिएको थियो।

नर्मन विजयको इतिहास चित्रण गर्ने उक्त कलाकृतिलाई बेलायत र फ्रान्सबीचको साझा इतिहास तथा पछिल्लो समय बढ्दै गएको सहकार्यको प्रतीकका रूपमा प्रस्तुत गरिएको छ।

दुई देशबीचको वार्तामा इङ्ग्लिस च्यानल पार गरेर बेलायत प्रवेश गर्ने आप्रवासी रोक्ने विषय प्राथमिकतामा रहनेछ। बेलायत र फ्रान्सले साना डुङ्गामार्फत हुने अवैध आवागमन नियन्त्रणका लागि संयुक्त प्रयासलाई थप प्रभावकारी बनाउने तयारी गरेका छन्।

बेलायती प्रधानमन्त्रीको कार्यालय डाउनिङ स्ट्रिटका अनुसार आगामी सातामा ४५ जना फ्रान्सेली अधिकारीको विशेष टोली समुद्री क्षेत्रमा परिचालन गरिनेछ। पछिल्लो गर्मीमा सन् २०१९ यताकै कम सङ्ख्यामा आप्रवासीले साना डुङ्गामार्फत च्यानल पार गरेको बेलायतको दाबी छ।

तर प्रधानमन्त्री बर्नहमले यसलाई उपलब्धि मानेर ढुक्क हुने अवस्था नरहेको बताएका छन्। उनका अनुसार मानव तस्करीमा संलग्न गिरोहले सुरक्षा रणनीति परिवर्तन गरिरहेकाले नियन्त्रण अभियानलाई निरन्तर कडा बनाउनुपर्ने आवश्यकता छ।

वार्ताको अर्को प्रमुख विषय युक्रेन रहनेछ। बर्नहमले बेलायतमा सरकार परिवर्तन भए पनि युक्रेनप्रतिको समर्थनमा कुनै परिवर्तन नआएको बताएका छन्। म्याक्रोनले पनि युक्रेनलाई सहयोग गर्ने विषयमा बेलायत र फ्रान्सबीचको समन्वयलाई निरन्तरता दिनुपर्नेमा जोड दिएका छन्।

युक्रेनलाई उपलब्ध गराउने एससीएएलपी लामो दूरीका क्षेप्यास्त्रका लागि आवश्यक केही सामग्रीबारे बेलायतले सार्वजनिक गरेको जानकारीबारे पनि छलफल हुने अपेक्षा गरिएको छ।

यसैगरी मध्यपूर्वको सुरक्षा अवस्था र हर्मुज जलघाँटी पुनः सञ्चालनमा ल्याउने विषय पनि वार्ताको एजेन्डामा पर्न सक्ने डाउनिङ स्ट्रिटले जनाएको छ।

म्याक्रोनले अमेरिकी सुरक्षामाथिको निर्भरता घटाउँदै युरोपको रणनीतिक तथा सुरक्षा क्षमता बलियो बनाउनुपर्ने धारणा राख्दै आएका छन्। यसका लागि उनले बेलायतलाई महत्वपूर्ण साझेदारका रूपमा हेरेका छन्।

बेलायततर्फ पनि युरोपेली सङ्घसँग सम्बन्ध सुधार र सहकार्य विस्तार गर्ने नीति अघि बढिरहेको छ। त्यसैले म्याक्रोन र बर्नहमबीचको भेटलाई आप्रवासन नियन्त्रणमा मात्र सीमित नभई बेलायत–युरोप सम्बन्ध र युरोपेली सुरक्षाको आगामी दिशाबारे छलफलका रूपमा पनि हेरिएको छ।

म्याक्रोनले बेलायत र फ्रान्सबीच सबै विषयमा समान धारणा नरहे पनि दुई देशबीच पारस्परिक सम्मान कायम रहेको बताएका छन्। किङ्स कलेज लन्डनका राजनीति प्राध्यापक आनन्द मेननले भने दुई देशबीच बढेको निकटता अब व्यावहारिक उपलब्धिमा रूपान्तरण हुनुपर्ने र युरोपेली सङ्घसँगको सम्बन्धमा समेत ठोस प्रगति आवश्यक रहेको बताएका छन्।