काठमाडौं। खाना पकाउने ग्यासको अभाव चुलिँदै गएपछि त्यसको विरोधमा विद्यार्थीहरू सिलिन्डर बोकेर सिंहदरबार पुगेका छन्।

अखिल क्रान्तिकारी विद्यार्थी संघले बुधबार सिंहदरबारको दक्षिण गेटमा प्रदर्शन गर्दै तत्काल ग्यास आपूर्ति सहज बनाउन सरकारसँग माग गरेको हो।

बजारमा ग्यास नपाउँदा विद्यार्थी तथा सर्वसाधारणले भोगिरहेको सास्तीप्रति सरकारको ध्यानाकर्षण गराउन प्रदर्शन गरिएको विद्यार्थी संगठनले जनाएको छ।

प्रदर्शनका क्रममा विद्यार्थीहरूले ग्यासका सिलिन्डर बोकेर सरकारविरुद्ध नाराबाजी गरेका थिए। उनीहरूले बजारमा पर्याप्त मात्रामा खाना पकाउने ग्यास उपलब्ध गराउन माग गर्दै अभावको समस्या तत्काल समाधान गर्न आग्रह गरे।

विद्यार्थीहरूले ग्यासको कृत्रिम अभाव सिर्जना गर्ने र कालोबजारी गर्नेहरूमाथि कडाइ गर्न पनि सरकारसँग माग गरेका छन्।

बजारमा ग्यास हुँदाहुँदै उपभोक्ताले सहज रूपमा पाउन नसक्ने अवस्था अन्त्य गर्नुपर्ने उनीहरूको भनाइ छ।