काठमाडौं । राष्ट्रिय प्रजातन्त्र पार्टी (राप्रपा) का केन्द्रीय कार्यसम्पादन समिति सदस्य जनकराज पाठकले पार्टीको महाधिवेशनअघि हुने आन्तरिक प्रतिस्पर्धा स्वस्थ, मर्यादित र पूर्णतः प्रजातान्त्रिक हुनुपर्ने बताएका छन् ।

महाधिवेशन नजिकिँदै गर्दा पार्टीभित्र फरक धार, समूह र नेतृत्वका पक्षमा देखिएको प्रतिस्पर्धालाई स्वाभाविक रूपमा लिनुपर्ने उल्लेख गर्दै पाठकले प्रतिस्पर्धाका नाममा आरोप-प्रत्यारोप, अपमान, गुटगत कटुता तथा व्यक्तिगत चरित्रमाथिको प्रहार नगर्न आग्रह गरेका छन् ।

‘महाधिवेशनअघि हुने आन्तरिक प्रतिस्पर्धा स्वाभाविक हो। तर त्यो प्रतिस्पर्धा स्वस्थ, मर्यादित र पूर्णतः प्रजातान्त्रिक हुनुपर्छ’, पाठकले बताए ।

उनका अनुसार एउटै पार्टीभित्र फरक धार, फरक समूह र फरक नेतृत्वको पक्षमा उभिनु लोकतान्त्रिक अधिकार हाे ।

यस्तो अधिकार सबैलाई हुने भन्दै उनले प्रतिस्पर्धालाई स्वस्थ बहस र विचारको माध्यम बनाउनुपर्नेमा जोड दिएका छन् ।

‘एउटै पार्टीभित्र फरक धार, फरक समूह र फरक नेतृत्वको पक्षमा उभिनु लोकतान्त्रिक अधिकार र संगठनको जीवन्तताको प्रमाण हो । यसरी उभिन सबैलाई छुट हुन्छ,’ उनले भनेका छन् ।

तर प्रतिस्पर्धाका नाममा हुने व्यक्तिगत आक्षेप र कटुताले पार्टीलाई कमजोर बनाउने उनको भनाइ छ ।

‘महाधिवेशनअघि हामी प्रतिस्पर्धी हौँ, शत्रु होइनौँ । आज मत फरक हुन सक्छ, तर भोलि एउटै झण्डामुनि एउटै अभियानका सहयात्री हुनुपर्छ, यो सत्य भुल्नु हुँदैन,’ पाठकले लेखेका छन् ।

महाधिवेशन नेतृत्व छनोट गर्ने अवसर भएको भन्दै उनले यसलाई सम्बन्ध तोड्ने माध्यम बनाउन नहुने बताएका छन् । उनका अनुसार प्रतिस्पर्धा संगठन भाड्न नभई अझ बलियो बनाउन केन्द्रित हुनुपर्छ ।