काठमाडौं। राष्ट्रिय स्वतन्त्र पार्टी (रास्वपा) का सांसद यज्ञमणि न्यौपानेले लामो समयदेखि विभिन्न मुलुकमा राजदूतको पद रिक्त रहनु सरकारको कार्यशैलीमाथि प्रश्न उठाउने विषय भएको बताएका छन्।

बुधबार प्रतिनिधिसभाको बैठकमा विशेष समय लिएर बोल्दै न्यौपानेले महत्वपूर्ण कूटनीतिक नियोग लामो समय नेतृत्वविहीन राखेर नेपालको परराष्ट्र सम्बन्ध प्रभावकारी बनाउन नसकिने बताए।

‘राजदूतको कुर्सी खाली राखेर कूटनीति बलियो हुँदैन। सरकारले अहिलेसम्म नियुक्ति गर्न किन सकेन ? प्रक्रिया कहाँ रोकिएको छ र कसले रोकेको छ ?’ उनले प्रश्न गरे।

न्यौपानेले योग्यता, क्षमता र विज्ञता भएका नेपाली नागरिक पर्याप्त रहे पनि राजदूत नियुक्तिको प्रक्रिया अघि बढ्न नसकेको भन्दै सरकारको ध्यानाकर्षण गराए।

उनले आफूहरूले सरकारप्रति विश्वास गरेर साथ दिएको उल्लेख गर्दै जनताले अपेक्षा गरेअनुसार सुशासन र प्रभावकारी कार्यसम्पादन देखिनुपर्ने बताए।

प्रधानमन्त्री संयुक्त राष्ट्रसंघको महासभामा सहभागी हुन अमेरिका जाने तयारीमा रहेको प्रसंग निकाल्दै न्यौपानेले अमेरिकामै नेपालको राजदूत नहुनुलाई कूटनीतिक दृष्टिले गम्भीर विषयका रूपमा उठाए।

‘प्रधानमन्त्री महासभामा सहभागी हुन अमेरिका जाँदै हुनुहुन्छ। तर त्यही देशमा नेपालको राजदूत छैन। रिक्त कूटनीतिक नियोगलाई नेतृत्वविहीन राख्नु हुँदैन,’ उनले भने।

उनले तत्काल राजदूत नियुक्त गरेर रिक्त रहेका नेपाली कूटनीतिक नियोगलाई पूर्ण नेतृत्व दिन सरकारसँग माग गरे।

न्यौपानेले नेपालको परराष्ट्र नीति कर्मचारी संयन्त्रको नियमित काममा मात्र सीमित नराखी राजनीतिक तहबाटै प्राथमिकताका साथ सञ्चालन गर्नुपर्ने बताए।

कूटनीतिक नियुक्ति र परराष्ट्र नीतिका विषयमा ढिलासुस्ती नगर्न उनले सरकारलाई आग्रह गरे।