काठमाडौं । बजारमा ग्यासको चरम अभाव भएपछि नेकपा एमालेकी सांसद यशुदाकुमारी बरालले सरकारमाथि कडा प्रश्न उठाएकी छन्।

प्रतिनिधिसभाको आजको बैठकमा बोल्दै बरालले ग्यास नपाउँदा सर्वसाधारणको दैनिकी प्रभावित भएको भन्दै सरकार र सम्बन्धित निकाय बेखबरजस्तै बनेको आरोप लगाइन्। उनले जनताले भोगिरहेको समस्याको तत्काल समाधान खोज्न सरकारसँग माग गरिन्।

‘सरकारलाई जनताको अवस्थाबारे ध्यान छ कि छैन ? जनता भोकमरीमा पर्न थाले,’ उनले प्रश्न गरिन्, ‘के हिजोको सरकारले ग्यास च्याम्बरमा मान्छे हालेर मारेको थियो ? आजको सरकारले जनतालाई भोकै मारेर मार्न थालेको हो ?’

बरालले बजारमा ग्यास अभाव हुनुको कारण, मूल्यवृद्धिको औचित्य र खाना पकाउने आधारभूत साधन नपाएर नागरिकले भोग्नुपरेको अवस्थाबारे सरकारले जवाफ दिनुपर्ने बताइन्।

नैतिकताको कुरा गर्ने सरकारको व्यवहारमाथि प्रश्न उठाउँदै उनले विगतको सरकारको नैतिकता खोज्नेहरू अहिले किन मौन बसेको भन्दै प्रश्न गरिन्।

‘हिजोको सरकारको नैतिकता खोज्नेहरू आज किन चुप छन् ? नैतिकता भनेको जनता मर्नु हो ?’ उनले भनिन्।

बरालले सभामुख डोलप्रसाद अर्यालमार्फत सरकारलाई ग्यास अभावको कारण र समाधानबारे तत्काल सदनलाई जानकारी गराउन निर्देशन दिन आग्रह गरिन्।

‘जनताका समस्या किन समाधान हुँदैनन् ? ग्यासको समस्या किन छ ? यो कुराको तत्काल जानकारी पाउनुपर्छ,’ उनले भनिन्, ‘सम्मानित सदनमार्फत म सरकारलाई निर्देशन दिन माग गर्दछु।’

नागरिक दिनप्रतिदिन निराश र पीडित बन्दै गएको उल्लेख गर्दै बरालले प्रधानमन्त्री बालेन्द्र शाहलाई ग्याससहित अत्यावश्यक सामग्रीको सहज आपूर्ति सुनिश्चित गर्न गम्भीर भएर काम गर्न आग्रह गरिन्।