बीबीसी । संयुक्त राष्ट्रसङ्घको एक नयाँ प्रतिवेदनका अनुसार विश्वको जनसङ्ख्या ८ अर्ब २० करोडबाट १० अर्ब ३० करोड पुग्ने अनुमान गरिएको छ । विश्व जनसङ्ख्या दिवसका अवसरमा बिहीबार सार्वजनिक भएको ‘वर्ल्ड पपुलेशन प्रस्पेक्ट्स’ले पृथ्वीमा मान्छेको सङ्ख्या ‘सन् २०८० को दशकको मध्यसम्म सर्वोच्च बिन्दुमा पुगेर बिस्तारै कम हुँदै जाने’ प्रक्षेपण गरेको छ ।

उक्त प्रतिवेदनमा हाल जन्मिएका मानिसहरू औसतमा ७३.३ वर्षको उमेरसम्म बाँच्ने पनि प्रक्षेपण गरिएको छ। यो उमेर सन् १९९५ को भन्दा ८.४ वर्ष धेरै हो । आधा शताब्दीभन्दा बढी समयदेखि संयुक्त राष्ट्रसङ्घले सदस्य राष्ट्रहरूको राष्ट्रिय जनगणनाको तथ्याङ्क, जन्म र मृत्यु दर तथा अन्य जनसाङ्ख्यिक सर्वेक्षणका आधारमा विश्वको जनसङ्ख्याको अनुमान गर्दै आएको छ ।

सन् २०२४ को ‘वर्ल्ड पपुलेशन प्रस्पेक्ट्स’ले ‘चारमध्ये एक जनाको बसोबास जनसङ्ख्याको आकार सर्वोच्च बिन्दुमा पुगिसकेको देशमा रहेको’ उल्लेख गरेको छ ।

तर १२६ देश तथा क्षेत्रहरूमा भने आगामी तीन दशकसम्म जनसङ्ख्या वृद्धि देखिनेछ। यसमा भारत, इन्डोनेशिया, पाकिस्तान र अमेरिकाजस्ता विश्वकै धेरै जनसङ्ख्या रहेका देशहरू छन् ।