काठमाडौं । प्रधानमन्त्री सुशीला कार्कीले युवाले नातावाद, कृपावाद र भ्रष्टाचार नसहने बताएकी छिन् ।

प्रजातन्त्र दिवसको अवसरमा बिहीबार सैनिकमञ्च टुँडीखेलमा आयोजित कार्यक्रमलाई सम्बोधन गर्दै उनले गत भदौ २३ र २४ गतेको जेन–जी विद्रोह त्यसकै परिणति भएको दाबी गरिन् ।

‘म स्पष्ट रूपमा भन्न चाहन्छु– युवालाई तिरष्कार गरेर कुनै राष्ट्र शान्त रहन सक्दैन । युवामा ऊर्जा छ, नैतिक क्रोध छ र परिवर्तनको आकांक्षा छ,’ उनले भनिन्, ‘उसले नातावाद, कृपावाद र भ्रष्टाचार सहँदैन । त्यो असन्तोषलाई दबाएर होइन, सम्बोधन गरेर मात्र राष्ट्र अघि बढ्न सक्छ ।’

प्रधानमन्त्री कार्कीले प्रजातन्त्र जनताको मुहारमा झल्किनुपर्ने बताएकी छन् ।

‘प्रजातन्त्रको वास्तविक झल्को अन्त कहीँ होइन, आममानिसको मुहारमा झल्किने आनन्ददायी मुस्कान र उनीहरूका निस्फिक्री निद्रामा झल्कनुपर्छ,’ उनले भनिन् ।

सोही क्रममा उनले आगामी फागुन २१ गते हुने प्रतिनिधिसभा सदस्य निर्वाचनलाई स्वस्थ, निष्पक्ष र शान्तिपूर्ण वातावरणमा सम्पन्न गर्न सरकारले सम्पूर्ण शक्ति लगाएको पनि बताइन् । निर्वाचनले नयाँ युगको ढोका उघार्ने उनको दाबी छ ।