काठमाडौं । इलाम-१ काे चुनावी प्रतिस्पर्धा निकै राेचक भइरहेकाे छ । नेपाली कांग्रेस र श्रम संस्कृति पार्टीका उम्मेदवारबीच निकै कम मतान्तरकाे प्रतिस्पर्धा भइरहेकाे हाे ।

मत गणना जारी छँदा कांग्रेसका निश्कल राईले १३ हजार ६३१ मत प्राप्त गरेका छन् । श्रम संस्कृति पार्टीका उम्मेदवार विनाेद नेम्बाङ लिम्बुले १३ हजार २८६ मत पाएका छन् । राई र नेम्बाङबीचकाे मतान्तर ३४५ काे छ ।

नेकपा एमालेका उम्मेदवार काजिमान कागतेले ११ हजार ५६१ मत पाएका छन् । हालसम्म गणना भएकाे मत ६१ हजार १६१ हाे । अब सूर्याेदय नगरपालिकाकाे वडा नम्बर १३ र १५ काे गणना बाँकी छ । यी दुई वडामा मतदान भएकाे करिब २४ सय मत छ ।

यहाँ सुरुवाती अग्रता एमालेका कागतले लिएका थिए । तर, यतिबेला भने कांग्रेसका राईले लगातार अग्रता लिइरहेका हुन् । उनलाई नेम्बाङले पछ्याइरहेका छन् ।

यहाँ यसअघि एमालेका महेश बस्नेत निर्वाचित भएका थिए । त्यसबेला उनले पूर्वप्रधानमन्त्री तथा नेकपा नेता झलनाथ खनाललाई पराजित गरेका थिए ।

२०७४ अघि भने खनाल पटकपटक निर्वाचित भएका थिए । तर, यसपटक गैरकम्युनिष्ट पार्टीले चुनाव जित्ने छनक देखाएकाे छ ।