काठमाडौं । अब सेयर बजार सातामा चार दिन मात्रै सञ्चालन हुने भएको छ।

सरकारले आइतबार पनि सरकारी कार्यालयमा विदा दिने निर्णय गरेपछि त्यसको असर सेयर बजारमा परेको हो।

यद्यपि, नेप्सेका एक उच्च अधिकारीका अनुसार आवश्यक परे शुक्रबार पनि बजार खोल्नेबारे निर्णय गर्न सकिने सम्भावना रहेको छ।

यसअघि २०७९ जेठ १ गतेदेखि सरकारले शनिबार र आइतबार सार्वजनिक बिदा घोषणा गर्दा नेप्सेले शुक्रबार पनि कारोबार सञ्चालन गरेको थियो। त्यसबेला शनिबार र आइतबार बजार बन्द गरी सातामा पाँच दिन कारोबार हुने व्यवस्था मिलाइएको थियो। तर केही सातामै सरकारको निर्णय फिर्ता भएपछि पुनः आइतबार नै कारोबार हुने गरी व्यवस्था गरिएको थियो।

हाल भने शुक्रबार र शनिबार बजार बन्द हुँदै आएको छ। सरकारको नयाँ निर्णयसँगै तत्कालका लागि शुक्रबार, शनिबार र आइतबार बजार बन्द हुने स्थिति बनेको छ।

अब शुक्रबार बजार सञ्चालन गर्ने वा नगर्ने विषयमा नेप्से सञ्चालक समितिले अलग्गै निर्णय लिनुपर्नेछ।