बुटवल। रुपन्देहीको तिलोत्तमा नगरपालिका-५ मणिग्रामस्थित लुम्बिनी कृषि उपज थोक बजारमा ल्याइएका तरकारी बिक्री हुन नसक्दा कुहिएर नष्ट भएपछि किसानहरूले तीव्र असन्तुष्टि जनाएका छन्।

देशका विभिन्न जिल्लाबाट थोक बिक्रीका लागि ल्याइएका काउली, मुला, फूलगोभीलगायतका तरकारी ग्राहक अभावका कारण सडेर फाल्नुपरेको किसानहरूको गुनासो छ। बुटवल उपमहानगरपालिका–६ मा रहेको बुटवल कृषि उपज थोक बजार केन्द्र तथा अन्य हाटबजारमा समेत बिक्रीको अवसर नपाउँदा उत्पादन नष्ट हुने अवस्था आएको उनीहरूले बताएका छन्।

किसानहरूले बजारमा व्यापारीहरूको सिन्डिकेटका कारण नयाँ किसानहरूले आफ्नो उत्पादन बिक्री गर्न नपाएको आरोप लगाएका छन्। बजार व्यवस्थापनको कमजोरी र पहुँचको अभावले आफूहरू प्रत्यक्ष मारमा परेको उनीहरूको भनाइ छ। उत्पादन गरेर बजारसम्म ल्याए पनि उचित बिक्रीको वातावरण नहुँदा ठूलो आर्थिक क्षति व्यहोर्नुपरेको उनीहरूले बताएका छन्।

नेपाल किसान महासंघ लुम्बिनी प्रदेशकी अध्यक्ष रीता केसीले बुटवलस्थित फलफूल तथा तरकारी थोक बजार केन्द्रमा व्यापारीहरूको सिन्डिकेटका कारण स्वदेशी उत्पादनको बिक्रीमा समस्या उत्पन्न भएको आरोप लगाइन्। उनका अनुसार भारतीय तरकारी तथा फलफूलले सहजै बजार पाउने तर स्वदेशी उत्पादनले स्थान नपाउने अवस्था चिन्ताजनक छ।

उनले बजार केन्द्रको पुनः टेन्डर प्रक्रियामा भइरहेको ढिलाइप्रति असन्तुष्टि जनाउँदै किसानका लागि छुट्याइएका सटरहरू व्यापारीहरूले कब्जा गरेको आरोप समेत लगाइन्। विभिन्न जिल्लाबाट ल्याइएका तरकारी बजारमा स्थान नपाएको पनि उनले बताइन्।

किसानहरूले पटक–पटक अनुरोध गर्दा पनि बिक्रीको उचित व्यवस्था नभएपछि अन्य हाटबजारमा गाडीमै राखेर बेच्न खोज्दा समेत अवरोध गरिएको गुनासो गरेका छन्। तरकारी बिक्री हुन नसक्दा लाखौँ रुपैयाँ बराबरको क्षति व्यहोर्नुपरेको भन्दै किसानहरूले यसको क्षतिपूर्ति कसले दिने भन्ने प्रश्नसमेत उठाएका छन्।