काठमाडौं । सार्वजनिक खरिद अनुगमन कार्यालयले काममा ढिलाइ गर्ने र सम्झौतामा उल्लेख गरिएका जिम्मेवारी पूरा नगर्ने चार निर्माण तथा आपूर्ति कम्पनीलाई कालोसूचीमा राखेको छ।

कार्यालयले साउन २८ गते गरेको निर्णयका आधारमा साउन २९ गते सार्वजनिक सूचना जारी गर्दै चारवटै कम्पनीलाई सार्वजनिक खरिद ऐन, २०६३ को दफा ६३ (१) अनुसार कालोसूचीमा राखेको जनाएको छ। कालोसूचीको अवधिभर सम्बन्धित कम्पनीले सरकारी तथा सार्वजनिक निकायबाट हुने खरिद प्रक्रियामा सहभागी हुन पाउने छैनन्।

हुम्लाको पूर्वाधार विकास कार्यालयको सिफारिसपछि बाजुराको गोत्री–४ मा रहेको पूर्ण निर्माण सेवालाई तीन वर्षका लागि कालोसूचीमा राखिएको छ। उक्त कम्पनीका मुख्य व्यक्ति कालीबहादुर शाही रहेका छन्।

बाँकेको नरैनापुर गाउँपालिकाको सिफारिसमा जमुनाह गाउँ–५, नरैनापुरमा रहेको सैयद गाजी फत्ते निर्माण सेवा एक वर्षका लागि कालोसूचीमा परेको छ। कम्पनीका मुख्य व्यक्ति ताहिर खाँ हुन्।

त्यस्तै, कृषि तथा वन विज्ञान विश्वविद्यालयको केन्द्रीय कार्यालय रामपुर, चितवनको सिफारिसमा कालिकोटको तिलागुफा–७ स्थित जीडीएस कन्स्ट्रक्सनलाई पनि एक वर्षका लागि कालोसूचीमा राखिएको छ। सो कम्पनीका मुख्य व्यक्ति सुरेन्द्रबहादुर बम हुन्।

महालेखापरीक्षकको कार्यालय, अनामनगरको सिफारिसमा काठमाडौं–२२ मा रहेको टिम एसिया नेपाल प्रालि पनि एक वर्षका लागि कालोसूचीमा परेको छ। उक्त कम्पनीका मुख्य व्यक्ति विक्रम सिंह बुढाथोकी रहेको सार्वजनिक खरिद अनुगमन कार्यालयले जनाएको छ।

कार्यालयका अनुसार कालोसूचीमा परेका अवधिभर यी कम्पनीले सार्वजनिक निकायबाट सञ्चालन हुने कुनै पनि खरिदसम्बन्धी कारबाहीमा भाग लिन पाउने छैनन्।