काठमाडौं। काठमाडौंका विभिन्न स्थानमा शनिबार खाना पकाउने एलपी ग्यास लिन उपभोक्ताको भीड लागेको छ।

जिल्ला प्रशासन कार्यालय काठमाडौं र नेपाल आयल निगमको समन्वयमा विभिन्न बिक्री केन्द्रबाट ग्यास वितरण गरिएपछि उपभोक्ता सिलिन्डर लिन लाइनमा बसेका हुन्।

काठमाडौंको बसुन्धरास्थित राधास्वामी परिसरमा नेपाल, एचपी, एभरेस्ट/सुगम, भानु र ओम ब्रान्डका ग्यास वितरण भइरहेको छ। ग्यास लिन पुगेका उपभोक्ता सिलिन्डरसहित लामबद्ध भएर बसेका छन्।

त्यस्तै, बबरमहलस्थित पुरानो जिल्ला प्रशासन कार्यालय परिसरमा पनि ग्यास लिन उपभोक्ताको लामो लाइन लागेको छ। उक्त स्थानमा जिल्ला प्रशासन कार्यालय काठमाडौं र नेपाल आयल निगमको समन्वयमा ग्यास उद्योगीमार्फत विभिन्न ब्रान्डका ग्यास बिक्रीवितरण भइरहेको छ।

ग्यास अभावको गुनासो बढिरहेका बेला निगमले उपभोक्तालाई सहज रूपमा ग्यास उपलब्ध गराउने उद्देश्यले काठमाडौंका विभिन्न स्थानबाट प्रत्यक्ष बिक्रीको व्यवस्था गरेको हो।

निगमले एलपी ग्यासको आयात नियमित भइरहेको र सम्बन्धित उद्योगहरूले आफ्ना विक्रेतामार्फत पनि नियमित रूपमा बिक्रीवितरण गरिरहेको जनाएको छ।

अत्यावश्यक भएका उपभोक्तालाई लक्षित गरी विशेष बिक्री केन्द्रबाट ग्यास उपलब्ध गराउने व्यवस्था गरिएको निगमको भनाइ छ।

तस्वीरहरू: