काठमाडौं । रामेछापमा वृद्ध दम्पतीलाई घरमै बन्धक बनाएर डकैती गरेको आरोपमा प्रहरीले पाँच जनालाई पक्राउ गरेको छ।

पक्राउ पर्नेमा सिन्धुली घ्याङलेक–२ का २५ वर्षीय सुमन जर्घा मगर, रामेछाप खाँडादेवी–२ का ३२ वर्षीय दीर्घराज मोक्तान, सोही ठाउँका ३३ वर्षीय पशुपति श्रेष्ठ, झापा दमक–७ का ४४ वर्षीय पिताम्बर तहतराज र धनकुटा बेलाहारा–५ का ३८ वर्षीय गुणराज विश्वकर्मा छन्।

प्रहरीका अनुसार उनीहरूले १८ भदौको राति खाँडादेवी–२ मझुवा नेवारटोलस्थित ८५ वर्षीय बखतमान लामा र उनकी ८६ वर्षीया श्रीमती कान्छीमाया तामाङलाई घरमै बन्धक बनाएका थिए। वृद्ध दम्पतीको मुखमा प्लास्टिकको टेप लगाएर आँखामा पट्टी बाँध्नुका साथै ज्यान मार्ने धम्की दिई गरगहना र नगद लुटिएको रामेछापका प्रहरी निरीक्षक कमल राउतले बताए।

प्रहरीले पक्राउ परेकाहरूको साथबाट नगद, मोबाइल, मोटरसाइकल, लुटपाटमा प्रयोग भएको कपडा, सुनका औँठी, पुराना सिक्का र बुद्धचित्तका २२ दाना बरामद गरेको जनाएको छ।

अनुसन्धानका क्रममा उनीहरू अन्य चोरी तथा लुटपाटका घटनामा समेत संलग्न रहेको खुलेको प्रहरीको दाबी छ। पशुपति श्रेष्ठमाथि रामेछापको महादेव मन्दिरको दानपेटिका फुटाएर चोरी गरेको तथा खसी र बोका चोरी गरेको आरोपमा समेत अनुसन्धान भइरहेको छ। उनीविरुद्ध काठमाडौंमा सिक्री लुटपाटसम्बन्धी मुद्दा चलेको पनि प्रहरीले जनाएको छ।