काठमाडाैं । गणेश चतुर्थीको अवसरमा भक्तपुरको प्रसिद्ध सूर्यविनायक मन्दिरमा मंगलबार बिहानैदेखि श्रद्धालुहरूको घुइँचो लागेको छ। गणेश भगवानको पूजा तथा दर्शनका लागि भक्तपुरसहित काठमाडौं उपत्यकाका विभिन्न स्थानबाट भक्तजनहरू सूर्यविनायक पुगेका छन्।

गणेश चतुर्थीका अवसरमा मन्दिरमा विशेष पूजाआजा तथा नित्य पूजा सम्पन्न गरिएको छ। श्रद्धालुहरूले गणेश भगवानलाई फूल, अक्षता, दूबो, लड्डु तथा विभिन्न फलफूल अर्पण गरी पूजा तथा दर्शन गरेका छन्। मन्दिर परिसरमा बिहानैदेखि भक्तजनहरूको आवतजावत बढेपछि सुरक्षा तथा व्यवस्थापनका लागि स्वयंसेवक र सुरक्षाकर्मीसमेत परिचालन गरिएको छ।

हिन्दू धर्मावलम्बीहरूले गणेशलाई विघ्नहर्ता तथा शुभकार्यका देवताका रूपमा पूजा गर्ने भएकाले गणेश चतुर्थीलाई विशेष धार्मिक महत्वका साथ मनाउने गर्छन्। कुनै पनि शुभकार्य सुरु गर्नुअघि गणेशको पूजा गर्दा बाधा–अड्चन हट्ने र कार्य सफल हुने धार्मिक विश्वास छ।

गणेश चतुर्थीका दिन विशेषगरी दूबो, सिन्दूर, फूल, फलफूल र मिठाई चढाएर गणेशको पूजा गर्ने परम्परा छ। सूर्यविनायक मन्दिरमा वर्षभरि नै भक्तजनहरूको चहलपहल हुने भए पनि गणेश चतुर्थी, मंगलबार तथा अन्य विशेष धार्मिक पर्वका दिन दर्शनार्थीको संख्या उल्लेख्य रूपमा बढ्ने गरेको छ।

यसैबीच, पर्वका कारण सूर्यविनायक क्षेत्र आसपासका सडक तथा बजारमा समेत चहलपहल बढेको छ। भक्तजनहरूको सहज आवागमन र मन्दिर दर्शनलाई व्यवस्थित बनाउन सम्बन्धित निकायले आवश्यक व्यवस्थापन गरेको छ।