काठमाडौं । मकवानपुरका ग्रामीण क्षेत्रमा गुणस्तरीय टेलिफोन सेवा उपलब्ध नभएको विषय प्रतिनिधिसभामा उठेको छ।

मकवानपुर निर्वाचन क्षेत्र नम्बर–२ का सांसद प्रशान्त उप्रेतीले थाहा, कैलाश, राक्सिराङ, मनहरी र भीमफेदीलगायतका क्षेत्रमा नागरिकले भरपर्दो टेलिफोन सेवा नपाएको भन्दै सरकारको ध्यानाकर्षण गराएका हुन्।

प्रतिनिधिसभाको बैठकमा बोल्दै उनले फोन गर्दा पटक-पटक ‘हेलो, हेलो’ भन्दै आवाज आए-नआएको सोध्नुपर्ने अवस्था रहेको बताए।

‘हेलो, हेलो । आवाज आइराख्या छ ?’ भनेर हरेकपटक सोध्नुपर्ने अवस्था मकवानपुरका नागरिकले भोगिरहेका छन्,’ उनले भने।

सांसद उप्रेतीले विश्वका मुलुकहरू फाइभजी हुँदै सिक्सजी प्रविधिको परीक्षणमा लागिरहेका बेला नेपालका कतिपय नागरिक भने सामान्य टेलिफोन सेवासमेत सहज रूपमा प्रयोग गर्न नपाउने अवस्थामा रहेको बताए।

उनले प्रविधिको तीव्र विकास, कृत्रिम बौद्धिकता (एआई) को सम्भावना तथा त्यसबाट उत्पन्न हुन सक्ने सुरक्षा चुनौतीबारे विश्वभर बहस भइरहेका बेला नेपालमा भने आधारभूत सञ्चार सेवाकै समस्या रहनु दुःखद भएको बताए।

विशेषगरी ग्रामीण क्षेत्रमा रहेका नागरिकलाई विदेशमा रहेका आफन्तसँग समेत सहज रूपमा कुराकानी गर्न कठिनाइ भइरहेको उनको भनाइ छ।

उप्रेतीले मकवानपुरका ती क्षेत्रमा टेलिफोन तथा सञ्चार सेवा सुधारका लागि तत्काल पहल गर्न सूचना तथा सञ्चार मन्त्रालयको ध्यानाकर्षण गराएका छन्।

उनले सञ्चार सेवा अब विलासिताको विषय नभई नागरिकको आधारभूत आवश्यकता बनिसकेकाले दुर्गम तथा ग्रामीण क्षेत्रलाई पनि गुणस्तरीय दूरसञ्चार सेवासँग जोड्न सरकार गम्भीर हुनुपर्ने बताए।