काठमाडौं । नेकपा माओवादी केन्द्रका वरिष्ठ नेता जनार्दन शर्माले नेकपा एकीकृत समाजवादीसँगको पार्टी एकता तत्कालका लागि रोक्न माग गरेका छन् । पार्टीको महाभिवेशन आयोजन समितिको सचिवालय बैठकमा उनले एकता प्रक्रियालाई स्थगन गरी पार्टीको पुनर्गठन, वैचारिक स्पष्टता र जनपक्षीय दिशातर्फ ध्यान केन्द्रित गर्न आग्रह गरेका हुन् ।

शर्माले हतारमा गरिने एकताले देशको राजनीतिक संकट समाधान नगर्ने दाबी गर्दै यस्तो कदमले कम्युनिष्ट आन्दोलनको विघठन दोहो¥याउने चेतावनी दिएका छन् । उनका अनुसार, बिना पर्याप्त गृहकार्य र वैचारिक स्पष्टता गरिएको एकता केही नेताहरूको व्यक्तिगत स्वार्थ पूर्तिमा सीमित हुनेछ र दीर्घकालीन दृष्टिले हानिकारक परिणाम ल्याउनेछ ।

उनले शहीद, बेपत्ता र घाइते योद्धाहरूको सपना र त्यागलाई बेवास्ता गर्दै गरिएको एकता क्रान्तिकारी धार कमजोर पार्ने र दक्षिणपन्थी अवसरवादलाई बल पु¥याउने ठहर गरेका छन् । यसअघि बैठकमा पार्टी अध्यक्ष प्रचण्डले भने माओवादी केन्द्र र एकीकृत समाजवादीबीच एकताको सैद्धान्तिक तथा नीतिगत विषय टुंगिएको जानकारी दिएका थिए ।

उनका अनुसार, नेतृत्व तहमा संगठनात्मक विषयहरू पनि करिब–करिब अन्तिम चरणमा पुगेका छन् । तर कसरी दुवै पार्टीलाई एकताबद्ध गर्ने भन्ने विषयमा अझै छलफल भइरहेको बताइएको छ । बैठकमा प्रचण्ड, नारायणकाजी श्रेष्ठ, वर्षमान पुन, पम्फा भुसाल, हरिबोल गजुरेल, अग्निप्रसाद सापकोटा, मात्रिका यादवलगायत नेताहरू उपस्थित थिए । तीमध्ये जनार्दन शर्माले हतारमा एकता गर्न नहुने र गम्भीर तयारीपछि मात्र अघि बढ्नुपर्ने मत प्रस्तुत गरेका हुन् ।