काठमाडौं । नेकपा एमालेका तथा तथा कोशी प्रदेशका पूर्वमुख्यमन्त्री भीम आचार्य चुनावी मैदानबाट स्वेच्छिक रूपमा ‘आउट’ भएका छन् ।

उनले आगामी प्रतिनिधिसभा निर्वाचनमा कतैबाट उम्मदेवार नबन्‍ने बताए ।

नेपालवान एचडीसँग उनले भने ‘म यसपटक कतैबाट चुनाव लड्दिनँ । मलाई चुनाव लड्ने इच्छा छैन । यसबारे मैले पार्टीमा पनि भनिसकेको छु ।’

उनी २०७९ को प्रतिनिधिसभा निर्वाचनमा सुनसरी– २ बाट निर्वाचित भएका थिए । त्यसअघि उनी प्रदेशसभा निर्वाचन लड्दै कोशीका मुख्यमन्त्री भए ।

त्यसअघि २०७० को संविधान सदस्य हुँदै उनी पर्यटनमन्त्री भएका थिए । तर, यसपटक उनले निर्वाचन नलड्ने भएका हुन् ।

एमालेको एघारौँ महाधिवेशनमा उनी उपाध्यक्षमा पराजित भएका थिए । अध्यक्ष केपी शर्मा ओलीले आचार्यलाई केन्द्रीय सदस्यमा मात्रै राख्‍न खोजेपछि उनी उपाध्यक्ष पदमा लडेका थिए ।

त्यसबेला उनलाई अध्यक्षका अर्का उम्मेदवार ईश्‍वर पोखरेलले पनि आफ्नो टिममा राखेन । यसपछि उनी असन्तुष्ट थिए ।

अन्ततः निर्वाचन नलड्ने निर्णयमा आचार्य पुगेका हुन् ।