काठमाडौं । आगामी २१ फागुनमा हुने प्रतिनिधिसभा निर्वाचनका लागि उम्मेदवार टुंगो लगाउन नेकपा एमालेको सचिवालय बैठक सुरु भएको छ ।

केन्द्रीय कार्यालय च्यासलमा सुरु भएको बैठकले पार्टीको निर्वाचन क्षेत्रीय समन्वय कमिटी, जिल्ला कमिटी र प्रदेश कमिटीहरू हुँदै सिफारिस भएका उम्मेदवारहरूको नाम टुुंगो लगाउने भएको हो ।

१६५ वटा प्रतिनिधिसभा निर्वाचन क्षेत्रमध्ये ३५ भन्दा बढी उम्मेदवार सर्वसम्मत भएका छन् । अध्यक्ष केपी शर्मा ओलीसहितका नेताहरू सर्वसम्मत भएका हुन् । करिब १३० उम्मेदवार टुंगो लगाउन सचिवालय बैठक बसेको हो ।

एमालेले कुनै दलसँग चुनावी गठबन्धन गर्ने समझदारी गरिसकेको छैन । त्यसो हुँदा एमालेले सबै प्रतिनिधिसभा निर्वाचन क्षेत्रमा उम्मेदवार टुंगो लगाएर उम्मेदवारी दिने तयारी गरेको छ ।

निर्वाचन आयोगले सार्वजनिक गरेको कार्यतालिका अनुसार यही ६ माघमा उम्मेदवारी (मनोनयन) दर्ता गराउनुपर्ने भएको छ ।