काठमाडौँ । राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाहले प्रतिनिधिसभा सदस्य निर्वाचनमा १४ लाख १७ हजार २८९ रुपैयाँ खर्च भएकाे विवरण निर्वाचन आयाेगमा बुझाएका छन् ।

आयोगमा बुझाइएको विवरणअनुसार सबैभन्दा बढी घरदैलो तथा प्रचार कार्यक्रम सञ्चालनमा खर्च गरिएको देखिएको छ। सो शीर्षकमा ४ लाख ५० हजार रुपैयाँ खर्च भएको उल्लेख छ।

सवारी साधन भाडा (२ वटा सवारी, १५ दिन) मा २ लाख २३ हजार ५०० रुपैयाँ खर्च गरिएको छ।

पार्टी तथा क्षेत्रीय निर्वाचन कार्यालय सञ्चालनका लागि पानी खर्च शीर्षकमा १ लाख ९० हजार रुपैयाँ, स्टेशनरी खर्चमा २२ हजार ९८० रुपैयाँ खर्च भएको विवरणमा उल्लेख गरिएको छ।

प्रचार-प्रसारका लागि प्रयोग गरिएका सामग्रीतर्फ फ्लेक्स, ब्यानर तथा झण्डा मा १ लाख ७५ हजार ७८४ रुपैयाँ र ब्यानर तथा स्टिकर मा १ लाख १९ हजार ५०५ रुपैयाँ खर्च गरिएको उल्लेख गरिएको छ।

साथै मतदाता प्रशिक्षण कार्यक्रम, खाजा खर्च तथा अन्य व्यवस्थापनका शीर्षकमा पनि रकम खर्च भएको विवरणमा देखिन्छ।

निर्वाचन कानुनअनुसार उम्मेदवारले निर्वाचन सम्पन्न भएपछि आफूले गरेको खर्चको विवरण तोकिएको समयभित्र सार्वजनिक गरी आयोगमा बुझाउनुपर्ने व्यवस्था छ। सोही प्रावधानअनुसार शाहले आफ्नो निर्वाचन खर्चको विस्तृत विवरण आयोगमा बुझाएका हुन्।

उनी झापा-५ मा यही २१ फागुनमा भएकाे निर्वाचन लडेका थिए । त्यहाँ उनी निर्वाचित भए । अब उनी प्रधानमन्त्री बन्ने बाटाेमा छन् ।