काठमाडौं। वैदेशिक रोजगार विभागले २०५७ सालदेखि दर्ता भएका मुद्दाका फाइलहरूको डिजिटल अभिलेखीकरणलाई तीव्र बनाएको छ।

विभागका अनुसार जेनजी आन्दोलनका क्रममा ध्वस्त भएपछि बाँकी रहेका फाइलहरूलाई सुरक्षित राख्न डिजिटल अभिलेखीकरणको काम भइरहेको छ। साथै, नयाँ मुद्दा अनलाइनबाटै दर्ता गर्ने व्यवस्था पनि कार्यान्वयनमा ल्याइएको छ।

नयाँ प्रणालीअनुसार उजुरीकर्ताले अनलाइनमार्फत निवेदन दर्ता गरेपछि विभागको प्रणालीले स्वतः कानुनी ढाँचा (टेम्प्लेट) तयार गरी मुद्दा दर्ता गर्नेछ।

लामो समयदेखि अलपत्र अवस्थामा रहेका मुद्दा तथा अनुसन्धानसम्बन्धी फाइल खोज्ने, वर्गीकरण गर्ने र व्यवस्थित अभिलेख तयार गर्ने अभियान पनि विभागले सञ्चालन गरिरहेको जनाएको छ। दशकौँदेखि प्रयोगविहीन रहेका फाइलहरूलाई व्यवस्थित गरी डिजिटल प्रणालीमा समावेश गर्ने काम भइरहेको विभागको भनाइ छ।

सबै फाइल डिजिटलाइज गरिसकेपछि आवश्यक अनुसन्धान अघि बढाई पीडितलाई न्याय दिलाउने प्रक्रिया थप प्रभावकारी बनाइने विभागले जनाएको छ।

वैदेशिक रोजगार क्षेत्रलाई पूर्ण रूपमा प्रविधिमैत्री बनाउने उद्देश्यले श्रम, रोजगार तथा सामाजिक सुरक्षा मन्त्रालयले नयाँ डिजिटल प्लेटफर्म विकास गरिरहेको छ। डिजिटलाइजेसनको सम्पूर्ण काम सम्पन्न भएपछि विभागले औपचारिक रूपमा नयाँ प्रणाली सञ्चालनमा ल्याउने तयारी गरेको छ।

नयाँ प्रणाली लागू भएपछि उजुरीकर्ताले आफ्नो मुद्दाको अवस्था अनलाइनमार्फत आफैं हेर्न सक्ने व्यवस्था हुनेछ।