काठमाडौं । बागमती प्रदेशका मुख्यमन्त्री इन्द्रबहादुर बानियाँको घर र कार्यालयमा सम्पत्ति शुद्धीकरण विभागले छापा मारेको छ।

अवैध सम्पत्ति लुकाएको आशंकामा विभागले सोमबार यो कारबाही गरेको हो।

हेटौंडाको सानोपोखरास्थित बानियाँ निर्माण सेवा (बीएनएस) र त्यही क्षेत्रमा रहेको उनको निवासमा छापा मारेर विभागले विभिन्न कागजातहरू बुझेर लगेको स्रोतले जनाएको छ।

यस्तै, काठमाडौंको नक्साल र सुन्धारामा समेत विभागले छापा मारेको बताइएको छ।

नेपाली कांग्रेस बागमती प्रदेश सभापति समेत रहेका बानियाँ केही वर्षअघिसम्म निर्माण व्यवसायसँग सक्रिय रूपमा आबद्ध थिए।

हाल पनि उनी विभिन्न व्यावसायिक कम्पनीहरूमा लगानीकर्ता रहेको स्रोतहरूको दाबी छ।