काठमाडौं। नेपाली कांग्रेसका वरिष्ठ नेता तथा पूर्वउपप्रधानमन्त्री गोपालमान श्रेष्ठको निधनपछि नेपाली कांग्रेसको केन्द्रीय कार्यसमितिको आकस्मिक बैठक सुरु भएको छ।

श्रेष्ठप्रति श्रद्धाञ्जली अर्पण गर्दै शोक प्रस्ताव पारित गर्न पार्टीले आकस्मिक बैठक बोलाएको हो।

पेटको क्यान्सरको उपचारका क्रममा मंगलबार काठमाडौंस्थित हेलिस अस्पतालमा ८३ वर्षीय श्रेष्ठको निधन भएको थियो। उनको निधनपछि पार्टी नेतृत्वले आकस्मिक बैठकमार्फत शोक प्रस्ताव पारित गर्ने निर्णय गरेको हो।

कांग्रेसले दिवंगत नेता श्रेष्ठको पार्थिव शरीरलाई अन्तिम श्रद्धाञ्जलीका लागि बुधबार बिहान ९ बजेदेखि ११ बजेसम्म पार्टी केन्द्रीय कार्यालय, सानेपामा राख्ने कार्यक्रम तय गरेको छ। सो अवधिमा नेता–कार्यकर्ता, शुभेच्छुक तथा सर्वसाधारणले श्रद्धाञ्जली अर्पण गर्न सक्नेछन्।

पार्टी कार्यालयमा श्रद्धाञ्जली कार्यक्रम सम्पन्न भएपछि श्रेष्ठको पार्थिव शरीरलाई अन्तिम संस्कारका लागि पशुपति आर्यघाट लगिने कांग्रेसले जनाएको छ।

लामो समय नेपाली कांग्रेसको संगठन निर्माण, लोकतान्त्रिक आन्दोलन र सरकारका विभिन्न जिम्मेवारीमा सक्रिय रहेका श्रेष्ठको निधनले पार्टीले अनुभवी र संघर्षशील नेतालाई गुमाएको कांग्रेस नेताहरूले बताएका छन्।
तस्वीरहरू: