Author: nepalone

सुदूरपश्चिम । सुदूरपश्चिम प्रदेशका उद्योग, पर्यटन, वन तथा वातावरणमन्त्री लक्ष्मणकिशोर चौधरीले राजीनामा दिएका छन्  ।

उद्योग, पर्यटन, वन तथा वातावरण मन्त्रालयमा शनिबार बिहान पत्रकार सम्मेलन गरी पदबाट राजीनामा दिएको घोषणा मन्त्री चौधरीले गरेका हुन् । गैरकानुनी ढङ्गले आर्थिक गतिविधिमा संलग्न भएको श्रव्य सामग्री सार्वजनिक भएपछि नैतिकताका आधारमा उनले राजीनामा दिएका हुन् ।

उनले भने, ‘म निर्दोष छु, दोषी भए सजाय भोग्न तयार छु ।’ नेपाली कांग्रेसका नेता एवं मुख्यमन्त्री कमलबहादुर शाह नेतृत्वको सरकारमा उनी नागरिक उन्मुक्ति पार्टीका तर्फबाट मन्त्री भएका थिए ।

काठमाडौं । गृहमन्त्री रमेश लेखकले शुक्रबार पूर्वराजावादी समर्थकहरुबाट आगजनी भएका भवनहरुको अनुगमन गरेका छन् ।

शनिबार गृहमन्त्रीले सुरक्षा निकायका प्रमुखहरुलाई साथमा लिएर भवनहरुको स्थलगत अनुगमन गरेका हुन् । त्यसक्रमममा उनले यो कुनै राजनीतिक दर्शनभन्दा पनि अपराधिक काम भएको भन्दै यसको लागि सरकारले आवश्यक कारबाही गर्ने बताए ।

उनले सञ्चारगृहलगायत सम्पूर्ण नागरिकको जीवन रक्षाका लागि पनि कुनै कसर बाँकी नराख्ने बताए । गृहमन्त्रीले सञ्चार एउटा महत्वपूर्ण अंग भएको हुँदा यसलाई ध्वस्त गर्ने कोशिस लोकतन्त्र कै विरुद्धको गतिविधि भएकाले यसलाई गम्भिरतापूर्वक लिने बताए ।

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले पूर्वराजा ज्ञानेन्द्र शाहको मानसिकता नै आपराधिकस्तरको भएको बताएका छन् ।

शनिबार पत्रकारहरुसँग कुरा गर्दै अध्यक्ष प्रचण्डले यस विषयमा कडा कदम चाल्न सरकारलाई आग्रह गरे । उनले पूर्वराजा ज्ञानेन्द्रलाई त्यसै छाड्न नहुने बताए ।

उनले भने, ‘पूर्वराजा ज्ञानेन्द्र शाहको मानसिकता नै आपराधिक स्तरको भएको पहिला पनि देखिएकै हो । अहिले पनि देखियो । यही नै समय हो सरकारले कडा कदम चालोस् ।’

उनले शुक्रबारको घटना हेर्दा प्रहरी र सरकारको तयारी नभएको देखिएको बताए । उनले भने,‘राजधानीको मुटुमा यस्तो विवेकहीन आपराधिक गतिविधि हुँदा प्रहरी समयमा आउन नसक्नु यसलाई गम्भीर समीक्षा सरकारले गरोस् । र आउने दिनमा पूर्ण तयारीमा लागोस् ।’

काठमाडौं । नेकपा एमालेका महासचिव शंकर पोखरेलले राजावादीको शुक्रबारको हिंसात्मक आन्दोलनबाट नयाँ पुस्ताले राजतन्त्रको निरंकुशता र दमन थाहा पाएको टिप्पणी गरेका छन् ।

सामाजिक संजालमार्फत पोखरेलले पत्रकारसहित दुई जनाको ज्यान जाने गरी भएको उग्र आन्दोलनले राजतन्त्रको निरंकुशता र दमन नभोगेको पुस्तलाई थोरै भए पनि बुझ्ने मौका मिलेको बताएका हुन् ।

उनले भनेका छन्, ‘एकै दिन राजधानीमा दुईवटा जनप्रदर्शन भए । विपक्षमा रहेको समाजवादी मोर्चाले आयोजना गरेको कार्यक्रममा राजावादीहरुको कार्यक्रममा भन्दा धेरै जनताको सहभागिता रह्यो । कार्यक्रम शान्त, मर्यादित र सन्देश मुलुक रह्यो । राजावादीहरुको कार्यक्रम हिंसात्मक, प्रतिशोधात्मक, अराजक रह्यो । व्यवस्थाको विकल्प दिन्छौ भन्नेहरु आन्दोलनका माध्यमबाट अपिल गर्न र सन्देश दिन सक्नु पर्दछ । त्यसमा राजावादीहरु पूर्णतःअसफल भए । बरु उल्टै उनीहरुका क्रियाकलापले राजतन्त्रको निरंकुशता र दमन वेहोर्न नपरेको नयाँ पुस्तालाई त्यसबारेमा थोरै भए पनि बुझ्ने मौका मिल्यो ।’
यस्तो छ पोखरेलको भनाई

हिजो एकै दिन राजधानीमा दुईवटा जनप्रदर्शन भए । विपक्षमा रहेको समाजवादी मोर्चाले आयोजना गरेको कार्यक्रममा राजावादीहरुको कार्यक्रममा भन्दा धेरै जनताको सहभागीता रह्यो । कार्यक्रम शान्त, मर्यादित र सन्देश मुलुक रह्यो । राजावादीहरुको कार्यक्रम हिंसात्मक, प्रतिशोधात्मक, अराजक रह्यो । व्यवस्थाको विकल्प दिन्छौ भन्नेहरु आन्दोलनका माध्यमवाट अपिल गर्न र सन्देस दिन सक्नु पर्दछ । त्यसमा राजावादीहरु पूर्णतःअसफल भए । बरु उल्टै उनीहरुका क्रियाकलापले राजतन्त्रको निरंकुशता र दमन बेहोर्न नपरेको नयाँ पुस्तालाई त्यस वारेमा थोरैभए पनि वुझ्ने मौका मिल्यो ।
आजको युग जनचेतनाले भएको लोकतन्त्रको युग हो । कसैको निहित स्वार्थ, प्रतिसोध वा दुरासयवाट आजको नेपाली समाज प्रभावित हुदैन भन्ने सन्देश पुनः दिनुपर्ने भएको छ ।

हिजोको घटनामा जीवन गुमाएकाहरु प्रति भावपूर्ण श्रद्धान्जली । घाइते सबैको शिघ्रस्वास्थ लाभको कामना । सुरक्षा निकायको संयमताले राजावादीहरुको असलियत उदांगिएको छ । आन्दोलनका नाममा नियोजित रुपमा परिचालित अपराधिक जत्थाको तोडफोड, आगजनी र लुटपाटवाट पीडित भएकाहरुलाई राज्यका तर्फवाट यथोचित सम्वोधन आवश्यक छ । जनतालाई आतंकित बनाउने अपराधिक घटनामा संलग्न व्यक्ति तथा तिनलाई उक्साउने र निर्देशन दिने सबैलाई अविलम्व कार्वाहीको दायरामा ल्याउनु आवश्यक छ ।

काठमाडौँ । ‘राजसंस्था पुनस्र्थापनाका लागि संयुक्त जनआन्दोलन समिति’का संयोजक नवराज सुवेदीले पूर्वराजा ज्ञानेन्द्र शाहलाई पक्राउ गर्ने या नजरबन्दमा राख्ने भन्ने तयारी गरिएको भन्दै विरोध गरेका छन् ।

शनिबार विज्ञप्ति जारी गरी सुवेदीले पूर्वराजा ज्ञानेन्द्रलाई समेत बदनाम गराउने र घटनामा संलग्नता देखाउने उद्देश्यले नजरबन्द गर्ने वा पक्राउ गर्ने भन्ने तयारी भइरहेको समाचारहरू बाहिर आएकाले त्यस अनुरूप कदम चाल्ने प्रयास भएमा देशभरबाट आम नागरिकहरू स्वतःस्फूर्त विरोधमा उत्रने सुवेदीले चेतावनी दिएका छन् ।

चैत्र १५ गते बिहान ११ बजेदेखि काठमाडौँको तिनकुनेमा आयोजना गरिएको आन्दोलन घोषणा सभामा सङ्घर्ष समितिका पदाधिकारी, केन्द्रीय नेताहरू मञ्चमा पुगेर सभालाई सम्बोधन गर्न नपाउँदै सरकार पक्षबाट नियोजित घुसपैठ गराइएको सुवेदीको बताएका छन् । त्यसपछि प्रहरी दमनका कारण सभा बिथोलिएको उनले दाबी गरेका छन् ।

आन्दोलनका कमान्डर दुर्गा प्रसाईँ लगायतलाई पक्राउ पुर्जी जारी गर्ने, कार्यक्रम पश्चात् जनआन्दोलन समितिका सदस्य सचिव रविन्द्र मिश्र, आन्दोलन परिचालन संयोजक धवल शमशेर राणा तथा अधिवक्ता स्वागत नेपाल लगायतलाई पक्राउ गर्ने र आफूलाईसमेत घरमै नजरबन्दमा राख्ने कार्य भएको सुवेदीले विज्ञप्तिमा उल्लेख गरेका छन् ।

काठमाडौँ । प्रहरीले राष्ट्रिय प्रजातन्त्र पार्टीका वरिष्ठ नेता रविन्द्र मिश्र र महामन्त्री धवलशमसेर राणलाई पक्राउ गरेको छ ।

काठमाडौँ उपत्यका अपराध अनुसन्धान कार्यालय टेकुका प्रहरी उपरीक्षक अङ्गुर जिसीका अनुसार उनीहरुलाई शुक्रबार राति पक्राउ गरिएको हो ।

तीनकुनेमा शुक्रबार दिउँसो घटेको घटनाका सन्दर्भमा आवश्यक सोधपुछका लागि उनीँलाई पक्राउ गरिएको प्रहरीले जनाएको छ । राजसंस्था पुनःस्थापना लागि जनआन्दोलन समितिका संयोजक नवराज सुवेदीलाई भने प्रहरीले घरमै नियन्त्रणमा राखेको छ ।

त्यसैगरी प्रहरीले अधिवक्ता स्वागत नेपाल र अन्य केहीलाई पनि पक्राउ गरेको जनाएको छ ।

काठमाडौं । जिल्ला प्रशासन कार्यालय काठमाडौंले कर्फ्युको समयावधि लम्ब्याएको छ । यसअघि प्रशासनले शुक्रबार राति १० बजेसम्म कर्फ्यु लागू गरेकोमा स्थिति सहज भइनसकेकाले शनिबार बिहान ७ बजेसम्मका लागि लम्ब्याइएको जनाएको छ ।

यो समयमा काठमाडौं महानगरपालिकाभित्र देहायका चार किल्ला तोकी सो सीमाना भित्र कसैले आवत जावत गर्न, कुनै पनि प्रकारको भेला, जुलुस प्रदर्शन, सभा, बैठक, घेराउ गर्न नपाउने उल्लेख छ ।

काठमाडौं । नेपाली कांग्रेसले राजधानीको तिनकुनेलगायत केही स्थानमा शान्तिपूर्ण प्रदर्शनका नाममा भएका हिंसात्मक घटनाको निन्दा गरेको छ ।

शुक्रबार राति महामन्त्रीद्वय विश्वप्रकाश शर्मा र गगन थापाले संयुक्त विज्ञप्ति जारी गरी व्यक्तिको घर, मिडिया हाउस, पार्टी कार्यालय, सपिङ मल, सरकारी कार्यालय, सर्वसाधारणको सवारी साधनमा भएको तोडफोड र आगजनीलाई गम्भीरतापूर्वक लिएको बताएका हुन् ।

विज्ञप्तिमा भनिएको छ, लोकतान्त्रिक गणतन्त्रको स्थापना ०६२/०६३ को जनआन्दोलनबाट सोझै भएको होइन, आन्दोलनले केवल प्रतिनिधिसभा पुनस्र्थापित गरेको थियो । संसद मार्फत अन्तरिम संविधान हुँदै संविधानसभाको निर्वाचन र त्यो निर्वाचनबाट चुनिएका नेपाली जनताका प्रतिनिधिहरुको संविधानसभाको पहिलो बैठकले देशलाई गणतन्त्रमा लगेको थियो । यो वास्तविकतालाई आजको मितिमा हामी स्मरण गर्न र गराउन चाहन्छौं ।’

उनीहरुले नागरिकमा रहेका कयौं असन्तुष्टिको हल वर्तमान संविधान भित्रैबाट सम्भव भएको बताएका छन् । विज्ञप्तिमा भनिएको छ, ‘नागरिकमा रहेका कयौं असन्तुष्टिको हल वर्तमान संविधान भित्रैबाट सम्भव छ । नागरिकको भावना दृष्टिगत गरेर निरन्तरतामा नविनता दिन हामी दृढ ढंगले प्रतिबद्ध छौं । हामी जान्दछौं कयौं कमजोरी भएका छन्, तिनको निदान खोज्न र समाधान पहिल्याउन हामी दृढ छौं । नेपाली समाजले अपेक्षा गरेका परिवर्तनका सबै आकांक्षा सम्बोधन यही संविधानको दायरा भित्रैबाट क्रमशः गर्न सकिन्छ । लोकतन्त्रको विकल्प अझ समुन्नत लोकतन्त्र हो, कुनै पनि प्रकृतिको राजतन्त्र एक्काइसौं शताब्दीको सचेत नेपालीका लागि विकल्प किमार्थ हुन सक्दैन । नेपाली कांग्रेस सबै राजनैतिक दललाई यसमा स्पष्ट ढंगले उभिन अपील समेत गर्दछ ।’

उनीहरुले घाइतेहरुको उपचारमा गम्भीरतापूर्वक ध्यान दिन सरकारलाई आग्रह गर्दै, हिंसा भड्काउने र हिंसामा सामेल हुने व्यक्तिहरूलाई कडा कानूनी कारबाहीको दायरामा अविलम्ब ल्याउन आग्रह गरेका छन् ।

काठमाडौं । काठमाडौंको तिनकुनेको भवनमा भएको आगलागीमा परी एक पत्रकारको मृत्यु भएको छ । आगलागीमा परी एभिन्यूज टेलिभिजनका पत्रकार सुरेश रजकको मृत्यु भएको हो ।

शुक्रबार दिउँसो प्रहरीसँगको झडपपछि प्रदर्शनकारीले भवनमा आगो लगाएका थिए । भवनमा आगो लगाइएपछि जलेर ज्यान गुमाएको अवस्थामा रजकको शव भेटिएको हो ।

तर जलेर मृत्यु भएका उनको शव नचिनिने अवस्थामा भेटिएको छ । अहिले त्यहाँ प्रहरी पसेर घटनास्थल जाँच प्रकृति मुचुल्का उठाइरहेको छ ।

काठमाडौं । सरकारले राजावादीहरुको प्रदर्शनका कमाण्डर दुर्गा प्रसाईले प्रदर्शनका क्रममा भएको क्षतिको जिम्मेवारी लिनुपर्ने बताएको छ ।

शुक्रबार साँझ पत्रकार सम्मेलन गरी गृह मन्त्रालयका सहसचिव छवि रिजालले घटनाको जिम्मेवारी प्रसाईंले लिनुपर्ने बताएका हुन् ।

उनले सरकारले आन्दोलनका कमान्डर प्रसाईंलाई कारबाहीको दायरमा ल्याइने पनि बताए । राजतन्त्र फर्काउनुपर्ने मागसहित प्रसाईंको नेतृत्वमा शुक्रबार राजावादीको प्रदर्शन हुँदा तोडफोड र आजगनीको घटना भएका थिए ।

काठमाडौं । प्रहरीको गोली लागी घाइते भएका एक प्रदर्शनकारीको मृत्यु भएको छ । काठमाडौंको तिनकुनेमा राजावादीको प्रदर्शनमा प्रहरीको गोली लागी घाइते भएका काठमाडौंको कीर्तिपुर नगरपालिका–४ का सविन महर्जनको मृत्यु भएको गृह मन्त्रालयका सहसचिव छवि रिजालले जानकारी दिएका छन् ।

गोली लागेपछि उनलाई उपचारका लागि त्रिवि शिक्षण अस्पताल लगिएको थियो । अस्पतालकाअनुसार महर्जनको घाँटीमा गोली लागेको थियो । प्रदर्शनस्थलमा तनाव भएसँगै प्रहरीले गोली चलाएको थियो ।

काठमाडौं । राजावादीको प्रदर्शन हिंसात्मक बनेपछि प्रधानमन्त्री केपी शर्मा ओलीले आकस्मिक मन्त्रिपरिषदको बैठक बोलाएका छन् ।

प्रधानमन्त्रीले आज साँझ मन्त्रिपरिषद्को आकस्मिक बैठक बोलाएका हुन् । राजावादी प्रदर्शनकारी हिंसात्मक हुन थालेपछि दिउँसो सुरक्षा समितिको बैठक बसेको थियो ।

काठमाडौँको तिनकुने क्षेत्रमा राजावादी तोडफोड र आगजनीमा उत्रिएपछि जिल्ला प्रशासन कार्यालय काठमाडौँले कफ्र्यु आदेश जारी गरेको छ ।

काठमाडौं । राजसंस्था पुनस्र्थापनाका लागि संयुक्त जनआन्दोलन परिचालन समितिले देश आजदेखि संक्रमणकालमा प्रवेश गरेको जनाएको छ ।

समितिका प्रवक्ता स्वागत नेपालले शुक्रबार विज्ञप्ति जारी गरी आजदेखि देश संक्रमणकालमा प्रवेश गरेको भन्दै गणतन्त्र कागजमा मात्रै सीमित रहेको जनाएका हुन् । पुरानो संसदीय व्यवस्थावादीहरूले नयाँ सहमतिको मार्ग प्रशस्त नगर्ने हो भने स्थिति थप भयावह हुने समेत समितिले चेतावनी दिएको छ ।

विज्ञप्तिमा भनिएको छ, ‘आजदेखि देश संक्रमणकालमा प्रवेश गरेको छ । गणतन्त्र कागजमा मात्र सीमित रहेको छ । यस अवस्थालाई हुने निश्चित रहेकोले तत्काल सर्वपक्षीय वार्ता र संवादमार्फत अघि बढ्न, राष्ट्रिय मानव अधिकारवादी संघसंस्थाहरू समेतलाई स्थितिको गम्भीर र विवेकपूर्ण पर्यवेक्षण गरिदिन समेत आह्वान गर्दछौँ ।’

काठमाडौं । जिल्ला प्रशासन कार्यालय काठमाडौंले तिनकुने क्षेत्रमा कर्फ्यू आदेश जारी गरेको छ । राजावादीको प्रदर्शन अराजक बनेपछि प्रशासनले कर्फ्यू लगाएको हो ।

राजावादीको समूहले निजी व्यक्तिको घरमा ढुंगामुढा गरेर आगजनी गरेका छन् । प्रहरीले प्रदर्शन तितरबितर पार्न दर्जनौँ अश्रुग्यास प्रहार गरेको थियो ।

काठमाडौं । नेकपा माओवादी केन्द्रका अध्यक्ष पुष्कमल दाहाल प्रचण्डले पूर्वराजा ज्ञानेन्द्रलाई राजनीतिक दलहरुको उदारतालाई कमजोरी नठान्न चेतावनी दिएका छन् ।

शुक्रबार समाजवादी मोर्चाले भृकुटीमण्डपमा आयोजना गरेको सभालाई सम्बोधन गर्दै अध्यक्ष प्रचण्डले इतिहासलाई पछाडि फर्काउने दुस्साहस नगर्न चेतावनी दिएका हुन् ।

उनले पूर्वराजा ज्ञानेन्द्रले धेरै गल्ती गरेकाले अहिले त्यसको परिणाम भोगिरहेको बताए । उनले भने, ‘अब अर्को गल्ती गरे भने उनले भोग्न केही पनि बाँकी रहँदैनन् । खबरदार ।’ अध्यक्ष प्रचण्डले मण्डलेहरूले अराजकता मचाउन खोजेको आरोपसमेत लगाए ।

उनले मण्डलेहरुको अराजकता थाहा पाउन तिनकुनेको हर्कत हेरे पुग्ने बताए । उनले भने, ‘मण्डलेहरू कस्ता हुन्छन् भनेर थाहा पाउन कतै जानु पर्दैन । तिनकुनेको हर्कत हेरे पुग्छ । १२ वर्ष ढुंग्रामा हाले पनि कुकुरको पुच्छर बाङ्गो भनेझैँ मण्डलेको आमसभा अराजकतामा परिणत भएको छ । मण्डलेले आतंक सिर्जना गर्न खोजेका छन् । प्रहरीमाथि ढुङ्गामुढा गरेका छन् ।’

उनले समाजवादी मोर्चा र व्यक्तिगत तर्फबाट आत्मआलोचना गर्दै अब जनअपेक्षा अनुसार काम गर्ने र इतिहासमा कुडाकर्कट बनिसकेकाहरूले टाउको उठाउन चाहेको आन्दोलनलाई अन्त्य गर्ने बताए ।

उनले भने, ‘जनयुद्धको नेतृत्वकर्ता, शान्ति सम्झौता, गणतन्त्र घोषणा र संविधान निर्माणको नेताको हैसियतले देशभरका जनतालाई भन्न चाहन्छु, समस्या विगतमा केही त्रुटी गरेकाले पनि पैदा भएका छन् ।

‘हामी गणतन्त्रवादीहरूले केही कमजोरी गरेकैले दलाल, नोकरशाहीहरूले पनि थुप्रै लाभ लिने अवसर प्राप्त गरे । तर, अब त्यसलाई सच्याइनेछ । गल्तीबाट शिक्षा लिएर पुनः मजदुर, किसान, उत्पीडित जनता, महिला, मुस्लिम सबैको पक्षमा काम गर्न अर्को क्रान्तिको नेतृत्व गर्न हामी तयार भएका छौं । यो कुरा मञ्चबाट औपचारिकताको लागि मात्र भनिराखेको छैन । एउटा नयाँ आन्दोलन, नयाँ क्रान्तिको नेतृत्वद्वारा अहिले देखिएको समस्या समाधान गर्न चाहन्छौं ।’

उनले प्रधानमन्त्री केपी शर्मा ओली राजावादीहरुले मिलेको आशंका व्यक्त गरे । उनले सरकारले उल्टो काम गरेको देख्दा प्रधानमन्त्री ओली राजावादीसँग मिलेको हुनसक्ने बताए ।

उनले भने, ‘भित्रभित्रै उहाँ, हिजो पनि कहीँ न कहीँ मिल्न खोज्नुहुन्थ्यो। गणतान्त्रिक आन्दोलन हाम्रो माधवजीको नेतृत्वमा चल्दैगर्दा उहाँ बयलगाढावाला सिद्धान्तको प्रतिपादक हुनुहुन्थ्यो ।’

अध्यक्ष प्रचण्डले प्रधानमन्त्री ओलीलाई नकारात्मक गुरुको संज्ञा दिए । उनले भने, ‘माधवजीले अघि स्वर्ग र नर्कको कुरा गर्नुभयो । उहाँले जे भएको हो, त्यही भन्नुभयो, तर निष्कर्ष त्यो होइन । मलाई नर्कतिर र उनी स्वर्गतिर गएको होइन । उनी नर्कतिर मलाई स्वर्गतिर फर्काइदिएको हो । मलाई स्वर्गमा जान प्रेरित गरे यस अर्थमा केपी ओलीलाई धन्यवाद छ ।’

काठमाडौँ । नेकपा (एकीकृत समाजवादी)का अध्यक्ष माधवकुमार नेपालले फेरि राजावादीहरुलाई वंशको शासन ल्याउने कल्पना नगर्न आग्रह गरेका छन् ।

शुक्रबार काठमाडौँको भृकुटीमण्डपमा समाजवादी मोर्चाले आयोजना गरेको सभालाई सम्बोधन गर्दै अध्यक्ष नेपालले वंशको शासन ल्याउन खोजे त्यसले ठूलो मूल्य चुकाउनुपर्ने बताएका हुन् ।

उनले जनता स्वाधीन र सार्वभौमसत्ता सम्पन्न भएकाले कसैको दासता स्वीकार्न तयार नरहेका बताए । उनले भने, ‘अब यो मुलुक शाही वंशतर्फ फर्कन सक्दैन । राणातन्त्रतर्फ र वंश र परिवारको शासनतिर मुलुक फर्कन सक्दैन, जनता स्वाधीन र सार्वभौमसत्ता सम्पन्न भएकाले कसैको दासता स्वीकार्न तयार छैनन् । वंशको शासन ल्याउन खोजे त्यसले ठूलो मूल्य चुकाउनुपर्नेछ ।’

उनले आजको कार्यक्रम कास्टिङ मात्रै भएको बताए । अध्यक्ष नेपालले सत्तामा बस्नेहरुको कमजोरीका कारण जनता असन्तुष्ट बनेका बताए ।

काठमाडौं । राजावादीको प्रदर्शन बिथोलिएपछि काठमाडौंको तिनकुनेमा एक घरमा आगजनी भएको छ । त्यसअघि घरमा राजावादीहरुको प्रदर्शनमा सहभागीहरुले तोडफोड गरेका थिए ।

तिनकुनेमा राजावादीको प्रदर्शनका क्रममा प्रहरीले हवाइ फायरसमेत गरेको थियो । आगो निभाउन गएको दमकललाई समेत अवरोध गर्न थालेपछि प्रहरीले हवाई फायर गरेको हो ।

काठमाडौं । राजावादीहरूको समूह र प्रहरीबीच तिनकुनेमा झडप भएको छ । राजावादीहरूको समूह तिनकुनेबाट नयाँबानेश्वरतिर प्रवेश गर्न खोजेपछि प्रहरीसँग झडप भएको हो ।

प्रहरीले भिडलाई नियन्त्रणमा लिन अश्रुग्यास प्रहारसमेत गरेको छ । प्रहरीले राजावादीहरूको प्रदर्शनमा सहभागीहरूलाई तिनकुने रिङरोडबाट भित्र छिर्न नदिन नयाँ बार लगाएको थियो । प्रहरीको बार तोडेर बानेश्वरतिर प्रवेश गर्न खोजेपछि स्थिति तनावग्रस्त बनेको हो ।

हस्तक्षेपका क्रममा दुर्गा प्रसाईं सवार गाडी तोडफोड भएको छ । प्रहरीले बल प्रयोग गरेपछि राजावादी नेताहरू तिनकुनेको चौरमा बनाइएको मञ्चबाट भागेका थिए ।

काठमाडौँ । प्रतिनिधिसभाको बैठक यही चैत १७ गते आइतबार बिहान ११ बजे बस्ने गरी स्थगित भएको छ ।
सङ्घीय संसद्का महासचिव पद्यप्रसाद पाण्डेयले शुक्रबार जारी गरेको सूचनामा आज ११ बजे बस्ने भनिएको बैठक दिउँसो १ः१५ मा बस्ने तय भए पनि विशेष कारणले स्थगित भएको उल्लेख छ ।

प्रतिनिधिसभा नियमावली, २०७९ को व्यवस्था बमोजिम सभामुख देवराज घिमिरेले उक्त समय निर्धारण गरेका हुन् ।

विपक्षी दलहरूले कुलमान घिसिङलाई नेपाल विद्युत् प्राधिकरणको कार्यकारी निर्देशकबाट हटाएको विषयमा प्रधानमन्त्रीले जवाफ नदिएसम्म सदन चल्न नदिने अडान लिएपछि प्रतिनिधिसभाको बैठक बस्न सकेको छैन ।

काठमाडौं । राष्ट्रपति रामचन्द्र पौडेल र पूर्वप्रधानमन्त्री डा. बाबुराम भट्टराईबीच भेटवार्ता भएको छ । भट्टराईले शुक्रबार राष्ट्रपति पौडेलसँग भेटवार्ता गरेका हुन् ।

भेटमा लोकतान्त्रिक राज्यप्रणालीमा स्वाभाविक रूपमा बेलाबखत देखापरिरहने राजनीतिक, आर्थिक, सामाजिक, सामरिक, प्रशासनिक क्षेत्रका समस्या दलहरूका नेतृत्वले नै आपसी सम्वाद र सहमतिबाट समाधान गर्नुपर्नेमा कुराकानी भएको भट्टराईले जानकारी दिएका छन् ।

भेटपछि भट्टराईले भनेका छन्, ‘आज सम्माननीय राष्ट्रपति श्री रामचन्द्र पौडेलज्यूसंग राष्ट्रपति निवासमा भेटेर देशको समसामयिक परिस्थितिवारे संवाद गर्ने सुअवसर प्राप्त भयो । देशको प्रमुख अभिभावकको नाताले राष्ट्रपतिज्यूमा लोकतान्त्रिक राज्यप्रणालीमा स्वाभाविक रूपमा बेलाबखत देखापरिरहने राजनीतिक, आर्थिक, सामाजिक, सामरिक, प्रशासनिक क्षेत्रका समस्या दलहरूका नेतृत्वले नै आपसी संवाद र सहमतिबाट हल गरून् र जनताले लामो संघर्षबाट प्राप्त गरेको संघीय लोकतान्त्रिक गणतन्त्रको रक्षा गरून् भन्ने सदीक्षा रहेको अनुभूति भयो । सबै जिम्मेवार राजनीतिक दल र नेतृत्वको ध्यानाकर्षण होस्।’