Author: nepalone

त्रिपोली । लिबियाको अवैध आप्रवासन नियन्त्रण विभागले १७७ गैरकानुनी आप्रवासीलाई नाइजेरिया फिर्ता पठाएको घोषणा गरेको छ ।

सन् २०११ मा दिवङ्गत नेता मुअम्मर गद्दाफी शासनको पतनपछि देशमा अस्थिरता र अराजकताका कारण धेरै आप्रवासीहरू प्रायः अफ्रिकीहरूले लिबियाबाट भूमध्यसागर पार गरेर युरोपेली किनारहरूमा जाने छनोट गरेका थिए ।

अन्तर्राष्ट्रिय आप्रवासन सङ्गठनका अनुसार यो वर्ष अहिलेसम्म कुल १५ हजार ५७ अवैध आप्रवासीलाई उद्धार गरी लिबिया फर्काइएको छ ।

‘आज, अवैध आप्रवासन नियन्त्रण विभागको निर्वासन कार्यालयबाट, हामीले त्रिपोली मिटिगा अन्तर्राष्ट्रिय विमानस्थलबाट उडान मार्फत १७७ महिला र केही बाल आप्रवासीहरूलाई नाइजेरिया फिर्ता पठाएको छौँ,’ निर्वासन अधिकारी मोहम्मद ब्रेदाले भने ।

यस समूहमा नौ बालबालिका र आठ शिशुहरू थिए । सोमबार, लिबियाका आन्तरिक मन्त्री इमाद अल–तरबेलसीले युरोपेली सङ्घलाई अवैध आप्रवासन रोक्न थप सहयोग प्रदान गर्न आग्रह गरे । लिबियाको दक्षिणी सिमानाहरू सुरक्षित गर्न यो समस्या समाधान गर्नु धेरै महत्वपूर्ण छ ।

अल–तारबेल्सीले बसाइँसराइको मूल कारणहरूलाई सम्बोधन गर्न आप्रवासीहरूको उत्पत्ति भएका देशहरूमा विकास परियोजनाहरूको लागि पनि आह्वान गरेका छन् ।

जुबा । संयुक्त राष्ट्रका एक दूतले दक्षिण सुडानको नासेर, उलाङ र बालित काउन्टीहरूमा बढ्दो हिंसाको बारेमा गहिरो चिन्ता व्यक्त गरेकी छन् । बढ्दो हिंसाले स्थानीय जनसङ्ख्यालाई असर गरिरहेको र मानवीय कार्यमा बाधा पुर्याइरहेको उनले बताए ।

दक्षिण सुडानका लागि संयुक्त राष्ट्र मानवीय संयोजक अनिता किकी गेबेहोले भनेकी छन्,’हिंसाले पहिले नै कमजोर समुदायहरूलाई ठूलो जोखिममा पारिरहेको छ । म सबै पक्षहरूलाई मानवीय सहयोगलाई आवश्यक परेकाहरू विशेष गरी महिला, बालबालिका र वृद्धवृद्धाहरूसम्म सुरक्षित रूपमा पुग्न अनुमति दिन आग्रह गर्दछु । फेब्रुअरीको अन्त्यमा सुरु भएको हिंसाबाट ५० हजार मानिस विस्थापित भएका छन्, जसमध्ये १० हजार छिमेकी इथियोपियामा भागेका छन् ।’

दक्षिण सुडान र इथियोपियाको सिमानामा अवस्थित नासिरको बाहिरी इलाकामा २० भन्दा बढी व्यक्तिको मृत्यु भएको र धेरै जना घाइते भएको बताइएको छ ।

मार्च ७ मा नासिरमा उद्धार अभियानमा रहेको संयुक्त राष्ट्र सङ्घको हेलिकप्टरमा बिद्रोही समूहले गोली चलाउँदा दक्षिण सुडान पिपुल्स डिफेन्स फोर्सका दर्जनौं सैनिक, एक जनरल र एक संयुक्त राष्ट्र सङ्घका कर्मचारीको मृत्यु भएको थियो ।

‘असुरक्षाका कारण २३ जना मानवीय कामदारहरूलाई स्थानान्तरण गरिएको छ । नासिरमा हैजा उपचार एकाइ बन्द गरिएको छ, जसले गर्दा उलाङ, नासिर र बालिएट काउन्टीहरूमा चलिरहेको प्रकोप झनै खराब भएको छ, जहाँ हालै ८४० हैजाका घटना रिपोर्ट गरिएका छन् ।’

‘मानवीय समुदायले सहायता गर्न सक्दो प्रयास गरिरहेको छ, तर असुरक्षा र विश्वव्यापी कोष कटौतीले महत्वपूर्ण सहायता प्रदान गर्ने हाम्रो क्षमतालाई असर गरिरहेको छ,’ गेबेहोले थपिन् ।

जेनेभा । संयुक्त राष्ट्रसङ्घका मानव अधिकार प्रमुखले जनवरीमा नाजुक युद्धविराम लागु भएपछि गाजामा भएको सबैभन्दा तीव्र इजरायली हवाई आक्रमणमा मङ्गलबार आतङ्कित भएको बताएका छन् । आक्रमणमा सयौँको मृत्यु भएको छ ।

“गत रात गाजामा इजरायली हवाई आक्रमण र गोलाबारीबाट म आतङ्कित छु”, भोल्कर टर्कले एक विज्ञप्तिमा भने, “यसले त्रासदीमा त्रासदी थप्नेछ ।”

इजरायलले मङ्गलबार जनवरी १९ मा युद्धविराम लागू भएपछि यसको सबैभन्दा तीव्र आक्रमण गर्दै सबै बन्धकहरूको फिर्ती नभएसम्म गाजामा लडाइँ जारी राख्ने प्रतिज्ञा गरेको छ ।

हमासद्वारा सञ्चालित क्षेत्रको स्वास्थ्य मन्त्रालयले पछिल्लो आक्रमणमा ३३० भन्दा बढी मानिस मारिएको जनाएको छ ।

अहिलेसम्म आक्रमणको जवाफ नदिएको हमासले इजरायली प्रधानमन्त्री बेन्जामिन नेतन्याहुलाई युद्धविराम वार्तामा गतिरोधपछि ‘युद्ध पुनः सुरु गर्ने’ निर्णय गरेको आरोप लगाएको छ र गाजामा अझै जीवित बन्धकहरूका लागि लडाइँमा फर्कनु ‘मृत्युदण्ड’ हुन सक्ने चेतावनी दिएको छ ।

“यो दुःस्वप्न तुरुन्तै अन्त्य हुनुपर्छ, पछिल्लो १८ महिनाको हिंसाले यो सङ्कटबाट बाहिर निस्कने कुनै सैन्य बाटो छैन भनेर प्रशस्त रूपमा स्पष्ट पारेको छ”, टर्कले भने, “अन्तर्राष्ट्रिय कानूनअनुसार राजनीतिक समाधान नै अगाडि बढ्ने एक मात्र उपाय हो । इजरायलले अझ बढी सैन्य बलको सहारा लिनुले पहिले नै विनाशकारी अवस्था भोगिरहेका प्यालेस्टिनी जनसङ्ख्यामाथि थप दुःख मात्र थप्नेछ ।”

“बन्धकहरूलाई तुरुन्तै र बिना शर्त रिहा गरिनुपर्छ । सबै अनियमित रूपमा थुनामा रहेका व्यक्तिहरूलाई तुरुन्तै र बिना शर्त रिहा गरिनुपर्छ । युद्ध स्थायी रूपमा अन्त्य हुनुपर्छ”, उनले भने, “हामी सबै प्रभावशाली पक्षहरूलाई शान्ति प्राप्त गर्न र नागरिकहरूको थप पीडा रोक्न आफ्नो शक्तिमा सबै कुरा गर्न आग्रह गर्दछौँ ।”

जेरुसेलम। इजरायलले जनवरीको युद्ध विरामपछि उक्त क्षेत्रमा सबैभन्दा घातक आक्रमण गरेपछि गाजामा रहेका इजरायली बन्धकहरूका परिवारहरूले मंगलबार प्रधानमन्त्री बेन्जामिन नेतन्याहुलाई ‘बन्धकहरूको हत्या र बेपत्ता हुने काम रोक्न’ माग गरेका छन् ।

“बन्धकहरूका परिवारहरूले आज बिहान प्रधानमन्त्री, रक्षामन्त्री र वार्ता टोलीका प्रमुखसँग बैठकको माग गर्छन्, जसमा उनीहरूलाई बन्धकहरूलाई सैन्य दबाबबाट कसरी जोगाउने र उनीहरूलाई कसरी फिर्ता ल्याउने इच्छा छ भनेर आश्वासन दिइनेछ”, बन्धक एवं बेपत्ता परिवार मञ्चले एक विज्ञप्तिमा भनेको छ, “बन्धकहरूको हत्या र बेपत्ता हुन रोक्नुहोस्, पहिले, तिनीहरूलाई फिर्ता गर्नुहोस्–त्यसपछि अरू सबै कुरा भन्दै बन्धकका परिवारहरूले माग गर्नेछन् ।”

बन्धकहरूका परिवारहरूले मंगलबार पछि जेरुसेलममा नेतन्याहुको कार्यालय बाहिर विरोध प्रदर्शनको आह्वान गरेका छन् । इजरायलले जनवरी १९ मा युद्ध विराम सुरु भएयता सबैभन्दा तीव्र आक्रमण गर्दै सबै बन्धकहरू फिर्ता नहुँदासम्म गाजामा लड्ने प्रतिज्ञा गरेको छ ।

“बन्धकहरूका परिवारहरूले आफ्ना प्रियजनहरूको भाग्यका लागि जिम्मेवार सरकारी अधिकारीहरूसँग बैठकका लागि याचना गरिरहेका छन् । उनीहरूको याचना अनुत्तरित छ”, परिवारहरूले एक वक्तव्यमा भनेका छन्, “अब स्पष्ट हुन्छ – सरकारी अधिकारीहरूले उनीहरूसँग भेटघाट गरेनन् किनकि उनीहरूले युद्ध विरामको विस्फोटको योजना बनाइरहेका थिए, जसले उनीहरूका परिवारका सदस्यहरूलाई बलि चढाउन सक्छ ।”

हमासको सन् २०२३ अक्टोबरको आक्रमणमा पक्राउ गरिएका दुई सय ५१ बन्धकमध्ये ५८ जना अझै पनि गाजामा राखिएका छन् तीमध्ये ३४ जना इजरायली सेनाले मृत भएको बताएको छ ।

बीबीसी । इजरायली सेनाले गाजापट्टीमा व्यापक हमला गरेको छ । गाजाको हमासद्वारा सञ्चालित नागरिक रक्षा एजेन्सीले इजरायली सेनाको आक्रमणबाट कम्तिमा ३४ प्यालेस्टिनीहरू मारिएका छन् भने ७० जना घाइते भएका छन् ।

इजरायल रक्षा बलले हमाससँग सम्बन्धित आतंकवादी लक्ष्यहरुलाई लक्षित आक्रमण गरिरहेको बताएको छ । जनवरी १९ मा युद्धविराम सुरु भएदेखि गाजामा भएको यो ठूलो हवाई आक्रमण हो । गाजामा युद्धविराम बढाउने वार्ताहरू सम्झौतामा पुग्न असफल भइरहेका बेला यो आक्रमण भएको हो ।

इजरायली प्रधानमन्त्री बेन्जामिन नेतान्याहू र रक्षामन्त्री काट्जले मंगलबार बिहान हमलाको आदेश दिएका थिए । चिकित्सक र प्रत्यक्षदर्शीहरूका अनुसार मध्य गाजाको देइर अल–बलाहमा तीन घर, गाजा शहरको एउटा भवन र खान युनिस र रफाहमा लक्षित गरी आक्रमण गरिएको छ।

तेहरान । इरानका उपविदेशमन्त्री काजेम घरिबाबादीले आफ्नो देश संयुक्त राष्ट्रसङ्घको आणविक संस्थाका प्रमुख राफेल ग्रोसीसँगको भेटवार्तापछि उनको देश संस्थासँग सहकार्य गर्न ‘प्रतिबद्ध’ रहेको बताएका छन् ।

घरिबाबादीले एक्समा एक पोस्टमा भियनामा अन्तर्राष्ट्रिय आणविक ऊर्जा एजेन्सी (आइएइए) का प्रमुखसँग भएको वार्ता ‘खुला र रचनात्मक’ भएको बताए । “आफ्नो राष्ट्रिय सुरक्षा र चासोको रक्षा गर्दा इरान आफ्नो सुरक्षा दायित्वको ढाँचाभित्र आइएइएसँग सहयोग गर्न प्रतिबद्ध छ”, उनले आणविक हतियारको प्रसारलाई रोक्ने उद्देश्यले एजेन्सी प्रोटोकललाई उल्लेख गर्दै भने ।

आफ्नो पोस्टमा ग्रोसीले ‘इरानको आणविक कार्यक्रमको शान्तिपूर्ण प्रकृतिको विश्वसनीय ग्यारेन्टी प्रदान गर्न सहयोग अपरिहार्य’ भएको बताए ।

यसअघि सोमबार विदेश मन्त्रालयका प्रवक्ता इस्माइल बगााईले बैठक ‘एजेन्सीसँग हाम्रो चलिरहेको संलग्नताको एक हिस्सा’ भएको बताएका थिए ।

घरिबाबादीले शुक्रबार बेइजिङमा आफ्ना रुसी र चिनियाँ समकक्षीहरूसँग वार्तामा भाग लिएपछि अस्ट्रियाको राजधानीमा भएका छलफलहरू भएका हुन् ।

“इरानको शान्तिपूर्ण आणविक सुविधाहरू विरुद्धको खतरा बढेको छ, हामीले आइएइएसँग परामर्श तीव्र पार्नु स्वाभाविक हो”, बगाईले भने ।

मार्च ७ मा अमेरिकी राष्ट्रपति डोनाल्ड ट्रम्पले इरानका सर्वोच्च नेता आयतोल्ला अली खामेनीलाई देशको आणविक कार्यक्रममा नयाँ वार्ताको आग्रह गर्दै पत्र लेखेका थिए  तर अस्वीकार गरेमा सम्भावित सैन्य कारबाहीको चेतावनी दिएका थिए ।

इरानले पत्र प्राप्त गरेको पुष्टि गरेको छ । बगाईले सोमबार ‘मूल्याङ्कन पूरा भएपछि’ जवाफ दिइने बताए ।
दशकौँदेखि संयुक्त राज्य अमेरिकाको नेतृत्वमा रहेका पश्चिमी देशहरूले तेहरानले आणविक हतियार विकास गर्न खोजिरहेको आशङ्का गर्दै आएका छन् ।

इरानले यी दाबीहरू अस्वीकार गर्दै आफ्ना आणविक गतिविधिहरू ऊर्जा उत्पादन सहित केवल शान्तिपूर्ण उद्देश्यका लागि भएको जोड दिंदै आएको छ ।

सन् २०१५ मा इरानले संयुक्त राष्ट्र सुरक्षा परिषद्का पाँच स्थायी सदस्यहरू–बेलायत, चीन, फ्रान्स, रुस र संयुक्त राज्य अमेरिकाका साथै जर्मनीसँग आफ्नो आणविक गतिविधिहरू सीमित गर्ने सम्झौतामा हस्ताक्षर गरेको थियो ।

तर सन् २०१८ मा ट्रम्पले एकतर्फी रूपमा अमेरिकालाई सम्झौताबाट बाहिर निकालेका थिए ।
तेहरान एक वर्षसम्म सम्झौता अन्तर्गतका आफ्नो दायित्वप्रति प्रतिबद्ध रह्यो तर त्यसपछि युरेनियम समृद्धिकरण स्तरहरू ६० प्रतिशतसम्म बढाउँदै तिनीहरूबाट पछि हट्न थाल्यो ।

यी स्तरहरू आणविक बम विकास गर्न आवश्यक ९० प्रतिशत सीमाभन्दा धेरै नजिक छन् र सम्झौताअन्तर्गत इरानको समृद्धिकरण सीमा तीन दशमलव ६७ प्रतिशतभन्दा धेरै माथि छन् ।

हालैका महिनाहरूमा इरानले आफ्नो आणविक गतिविधिहरूमा प्रतिबन्धको बदलामा तेहरानमाथि प्रतिबन्धहरू हटाएको सम्झौतालाई पुनर्जीवित गर्ने प्रयासमा बेलायत, फ्रान्स र जर्मनीसँग धेरै चरणको वार्ता गरेको छ ।

लन्डन । बेलायत सरकारले युक्रेनमा कुनै पनि युद्धविरामको रक्षा गर्न तथाकथित गठबन्धनको एक हिस्साका रूपमा ‘उल्लेखनीय सङ्ख्यामा’ राष्ट्रहरूले सेना उपलब्ध गराउने बताएको छ ।

बेलायतले ‘३० भन्दा बढी देशले’ कुनै न कुनै रूपमा समूहमा योगदान गर्ने अपेक्षा गरेको प्रधानमन्त्री किर स्टार्मरका प्रवक्ताले पत्रकारहरूलाई बताए ।

प्रधानमन्त्रीले हप्तान्तमा भने, ‘विभिन्न देशहरूबाट विभिन्न क्षमताहरू हुनेछन्, तर इच्छुक राष्ट्रहरूको गठबन्धनले के प्रदान गर्न सक्छ भन्ने सम्बन्धमा अहिले परिचालन छलफलहरू भइरहेका छन्”, प्रवक्ताले भने, “हामीले ३० भन्दा बढी देश संलग्न हुने अपेक्षा गरिरहेका छौँ । स्पष्ट रूपमा योगदान क्षमताहरू फरक हुनेछन्, तर यो एक उल्लेखनीय बल हुनेछ, उल्लेखनीय सङ्ख्याका देशहरूले सैनिक प्रदान गर्नेछन् र ठूलो समूहले अन्य तरिकाहरूमा योगदान गर्नेछ ।”

अमेरिकी राष्ट्रपति डोनाल्ड ट्रम्पले गत महिना युद्ध अन्त्य गर्न रुससँग प्रत्यक्ष वार्ता सुरु गरेपछि स्टार्मर र फ्रान्सका राष्ट्रपति इमानुएल म्याक्रोनले गठबन्धन स्थापना गर्ने प्रयासको नेतृत्व गरिरहेका छन् । युक्रेनलाई सुरक्षा ग्यारेन्टी प्रदान गर्न र रुसी राष्ट्रपति भ्लादिमिर पुटिनलाई कुनै पनि युद्धविराम उल्लङ्घन गर्नबाट रोक्न अमेरिकी समर्थनसँगै यो समूह आवश्यक रहेको उनीहरुले बताएका छन् ।

स्टार्मर र म्याक्रोनले युक्रेनमा बेलायती र फ्रान्सेली सेनालाई भूमिमा राख्न इच्छुक रहेको बताएका छन् तर अन्य कति देशहरू पनि यस्तै गर्न इच्छुक छन् भन्ने स्पष्ट छैन ।

बेलायती प्रधानमन्त्रीले शनिबार करिब २६ जना अन्य नेता र युरोपेली सङ्घ (इयु) तथा नाटोका प्रमुखहरूको भर्चुअल कलमा योजना अब ‘परिचालन चरण’ मा जाने बताएका थिए ।

दर्जनौँ सैन्य प्रमुखहरू बिहीबार ती छलफलहरूलाई अगाडि बढाउन बेलायतमा भेट्ने भएका छन् ।
केही देशले लजिस्टिक वा निगरानीमा योगदान दिन सक्ने सम्भावना बढाउँदै स्टार्मरले गठबन्धनलाई समर्थन गर्ने कुनै पनि प्रस्तावलाई स्वागत गरेको बताएका छन् ।

उनका प्रवक्ताले इन्जिनियरिङ सहयोग, विमानस्थलहरूको प्रयोग र चालक दलका सदस्यहरूको आवासलाई योगदान दिन सकिने क्षेत्रका रूपमा प्रकाश पारेका थिए ।

ओटावा । क्यानाडाका प्रधानमन्त्री मार्क कार्नीले युक्रेनी राष्ट्रपति भोलोदिमर जेलेन्स्कीलाई पश्चिमी प्रान्त अल्बर्टामा जुनमा हुने जी–७ शिखर सम्मेलनमा आमन्त्रण गरेका छन् ।

गत हप्ता कार्यभार सम्हाल्नुभएका कार्नीले सप्ताहन्तमा युक्रेनी नेतासँग कुरा गर्नुभएको उल्लेख गर्दै एक सरकारी अधिकारीले भने, “राष्ट्रपति जेलेन्स्कीलाई जुनमा अल्बर्टामा हुने जी–७ बैठकमा आमन्त्रित गरिएको छ ।”

अमेरिकी राष्ट्रपति डोनाल्ड ट्रम्प सत्तामा फर्किएपछि रुस–युक्रेन युद्धतर्फ सात शक्तिशाली प्रजातन्त्रको समूहबीचको अनिश्चित दृष्टिकोणका बीचमा यो निमन्त्रणा आएको हो ।

गत हप्ता क्युबेकमा भएको जी–७ विदेशमन्त्रीहरूको बैठकअघि ट्रम्प प्रशासनले युक्रेनको ‘क्षेत्रीय अखण्डता’ का लागि लडाइँलाई समर्थन गर्ने शब्दावली र रूसी ‘आक्रमण’ को सन्दर्भलाई बेवास्ता गरेको थियो ।

तर त्यस्तो भाषा शुक्रबार जी–७ बैठकमा जारी विदेशमन्त्रीहरूको अन्तिम बयानमा समावेश थियो । यो रुसले अमेरिकी नेतृत्वको युद्धविराम पहलका सर्तहरू तत्काल स्वीकार गरेन भन्ने सन्दर्भमा सम्भवतः वासिङ्टनमा निराशाको सङ्केत हो ।

यस हप्ता पेरिस र लन्डनको भ्रमण गरिरहेका कार्नीले सामाजिक सञ्जालमा पोस्ट गर्दै जेलेन्स्कीले आफ्नो कलमा ‘युक्रेनको रक्षा र शान्तिलाई अगाडि बढाउनका लागि विश्वव्यापी प्रयासहरू’ बारे अपडेट दिएको बताए ।

“क्यानाडा रुसी आक्रमणविरुद्ध युक्रेनको स्वतन्त्रताको लडाइँलाई दृढतापूर्वक समर्थन गर्दछ”, उनले भने ।
जेलेन्स्कीले सामाजिक सञ्जालमा पोस्ट गर्दै कार्नीसँगको कुराकानीलाई ‘राम्रो र सारगर्भित’ भनेका छन् ।

उनले ‘क्यानाडालाई सहयोग, विशेष गरी रक्षा प्याकेजहरू र हाम्रो ऊर्जा क्षेत्रको समर्थनका लागि धन्यवाद दिएको’ र ‘मस्कोमाथि दबाब बढाउनुपर्ने सही बुँदाहरू’ उठाएकामा कार्नीको प्रशंसा गरेको बताए ।

यस वर्षको जी–७ अध्यक्षता गर्ने क्यानाडाले जुन १५–१७ मा अल्बर्टाको कानानास्किसमा शिखर सम्मेलनको आयोजना गर्नेछ ।

ट्रम्पले आज रुसी राष्ट्रपति भ्लादिमिर पुटिनसँग युक्रेनमा युद्धविरामको प्रस्तावबारे छलफल गर्ने कार्यक्रम छ ।