Author: nepalone

पेरिस । फ्रान्सको दक्षिणपन्थी आन्दोलनका ऐतिहासिक नेता जीन–मारी ले पेनको मङ्गलबार ९६ वर्षको उमेरमा निधन भएको छ ।

केही हप्तादेखि स्याहार केन्द्रमा रहनुभएका ले पेनको मङ्गलबार मध्याह्न (११०० जीएमटी) मा ‘आफन्तहरूको उपस्थितिमा’ निधन भएको परिवारले विज्ञप्तिमार्फत जनाएको छ ।

नेसनल फ्रन्टका सह–संस्थापक ले पेनले सन् २००२ मा कडा आप्रवासन विरोधी मुद्दाका साथ राष्ट्रपति चुनावको दोस्रो चरणमा पुगेर फ्रान्सलाई तरङ्गित बनाएका थिए ।

उनीमाथि प्रायः जातिवाद र यहुदी विरोधी भएको आरोप लगाइन्थ्यो र उनले यहुदी नरसंहारलाई इतिहासको विवरणका रूपमा खारेज गरेको कुरा कुख्यात छ । 

उनकी छोरी मरिन ले पेनले सन् २०११ मा पार्टीको नेतृत्व सम्हाले र आफ्नो आन्दोलनलाई उनको चरमपन्थी प्रतिष्ठाबाट टाढा राख्ने प्रयासमा जीन–मारीलाई चार वर्षपछि पार्टीबाट निष्कासन गरे । 

नेसनल र्याली (आरएन) नाम परिवर्तन भएपछि पार्टीले उल्लेखनीय प्रगति गरेको छ । यसले गत वर्षको युरोपेली संसद् चुनावमा ठूलो सफलता हासिल गर्यो र त्यसपछि फ्रान्सको आम निर्वाचनमा सबैभन्दा ठूलो एकल पार्टी बन्यो । 

आरएन पार्टीका प्रमुख तथा मरिन ले पेनका दाहिने हात जोर्डन बार्डेलाले सावधानीपूर्वक शब्दमा जीन–मेरी ले पेनले ‘सधैँ फ्रान्सको सेवा गरेको’ बताए । 

“इन्डोचाइना र अल्जेरियामा फ्रान्सेली सेनाको सिपाही, राष्ट्रिय सभा र युरोपेली संसद्मा जनताको प्रतिनिधिका रूपमा उहाँले सधैं फ्रान्स र यसको पहिचान र सार्वभौमिकताको रक्षा गर्नुभयो”, २९ वर्षीय बार्डेलाले एक्समा भने, “आज म उहाँको परिवार, उहाँका प्रियजनहरू र निस्सन्देह मरिनको शोकको सम्मान गर्नुपर्दछ भनेर दुःखका साथ सोच्दैछु ।” 

यसैबीच राष्ट्रपति इम्यानुएल म्याक्रोनले फ्रान्सेली दक्षिणपन्थी नेता जीन–मारी ले पेन ‘ऐतिहासिक व्यक्तित्व’ थिए भन्दै उनको परिवारप्रति समवेदना व्यक्त गरेको राष्ट्रपतिको कार्यालय एलिसीले बताएको छ । 

“हाल नेसनल र्याली पार्टीका रूपमा रहेको दलका सह–संस्थापक ले पेन ‘दक्षिणपन्थको एक ऐतिहासिक व्यक्तित्व’ हुनुहुन्थ्यो”, एलिसीले एक संक्षिप्त वक्तव्यमा भन्यो, “फ्रान्सको राजनीतिक जीवनमा उहाँको भूमिकाको इतिहासले निर्णय गर्नेछ ।”

दोहा । इजरायल र हमासबीच गाजामा युद्धविरामलाई सुदृढ पार्ने उद्देश्यले वार्ता जारी रहेको र पक्षहरूबीच ‘प्राविधिक बैठकहरू’ भइरहेको मध्यस्थकर्ता कतारको विदेश मन्त्रालयले मङ्गलबार जनाएको छ । 

“दुवै पक्षबीच प्राविधिक बैठकहरू अझै पनि भइरहेका छन्”, मन्त्रालयका प्रवक्ता माजेद अल–अन्सारीले सम्झौताको विवरणमा तल्लो स्तरका अधिकारीहरूसँगको बैठकलाई उल्लेख गर्दै भने, “अहिले कुनै प्रमुख बैठकहरू भइरहेका छैनन् ।” 

मध्यस्थकर्ताहरू कतार, इजिप्ट र संयुक्त राज्य अमेरिका गाजामा विनाशकारी सङ्घर्ष अन्त्य गर्न असफल भएका इजरायल र हमासबीचको वार्तामा महिनौँदेखि संलग्न छन् ।

अन्सारीले जारी बैठकहरूमा ‘धेरै मुद्दाहरू छलफल भइरहेको’ भन्दै तर ‘वार्ताको अखण्डताको रक्षा गर्न’ विवरणहरूमा जान अस्वीकार गरे । 

गत हप्ताको अन्त्यमा हमासले दोहामा अप्रत्यक्ष वार्ता पुनः सुरु भएको बताएको थियो भने इजरायलले कतारको राजधानीमा वार्ता जारी राख्न वार्ताकारहरूलाई अधिकार दिएको बताएको थियो । 

डिसेम्बरमा मध्यस्थताको अघिल्लो चरण दुवै पक्षले एक अर्कालाई दोष दिँदै समाप्त भएको थियो । हमासले इजरायलमाथि ‘नयाँ शर्तहरू’ राखेको आरोप लगाएको थियो भने इजरायलले हमासमाथि सम्झौतामा ‘बाधाहरू’ खडा गरेको आरोप लगाएको थियो ।

डिसेम्बरमा ग्यास–धनी खाडी इमिरेटले संयुक्त राज्य अमेरिकामा डोनाल्ड ट्रम्पको चुनावी विजयपछि वार्तामा ‘गति’ फर्किरहेको छ भन्ने आशावादिता व्यक्त गरेको थियो । 

एक महिनाअघि दोहाले आफ्नो मध्यस्थता रोकेको र हमास र इजरायलले ‘इच्छा र गम्भीरता’ देखाएपछि पुनः सुरु हुने बताएको थियो । 

ब्राजिल । ब्राजिलले इन्डोनेसिया ब्रिक्स समूहको पूर्ण सदस्य भएको घोषणा गरेको छ । सन् २०२५ मा ब्रिक्सको अध्यक्षता गर्ने ब्राजिलले सन् २०२३ मा जोहानेसबर्ग शिखर सम्मेलनमा इन्डोनेसियाको उम्मेदवारीलाई नेताहरूले समर्थन गरेको बताएको छ ।

ब्राजिलको विदेश मन्त्रालयले ब्रिक्समा इन्डोनेसियाको प्रवेशलाई स्वागत गरेको छ । यसले इन्डोनेसिया र अन्य ब्रिक्स सदस्यहरूले विश्वव्यापी शासन संस्थाहरूको सुधारलाई समर्थन गर्ने बताएको छ ।

“ब्राजिल सरकारले इन्डोनेसियालाई ब्रिक्समा प्रवेश गरेकोमा स्वागत गर्दछ । सबैभन्दा ठूलो अर्थतन्त्र र दक्षिणपूर्व एशियामा सबैभन्दा बढी जनसङ्ख्या भएको राष्ट्रको रूपमा इन्डोनेसियाले अन्य ब्रिक्स सदस्यहरूसँग विश्वव्यापी शासन संस्थाहरूको सुधारको लागि महत्त्वपूर्ण योगदान गर्दछ,”ब्राजिलको विदेश मन्त्रालयले विज्ञप्तिमार्फत जानकारी गराएको छ ।

इन्डोनेसियाले नयाँ सरकारको स्थापनापछि मात्र ब्रिक्समा सामेल हुने आफ्नो रुचिबारे समूहलाई औपचारिक रूपमा जानकारी गरायो ।

ब्रिक्स देशहरूले सन् २०२४ मा इन्डोनेसियाको सदस्यतालाई सर्वसम्मतिले अनुमोदन गरेको विज्ञप्तिमा भनिएको छ ।

ब्रिक्स औपचारिक समूहको रूपमा सन् २००६ मा जि–८ आउटरिच शिखर सम्मेलनको बैठक पछि सुरु भयो । सन् २००६ मा न्यूयोर्कमा विदेश मन्त्रीहरूको पहिलो बैठकमा समूहलाई औपचारिकता दिइएको थियो ।

पहिलो ब्रिक्स शिखर सम्मेलन सन् २००९ मा रूसको येकातेरिनबर्गमा भएको थियो । सन् २०१० मा न्यूयोर्कमा भएको ब्रिक्स विदेश मन्त्रीहरूको बैठकमा दक्षिण अफ्रिकालाई समावेश गरी ब्रिकलाई ब्रिक्समा विस्तार गर्ने सहमति भएको थियो ।

बीबीसी । भूकम्पका कारण तिब्बत क्षेत्रमा कम्तीमा ९५ जनाको मृत्यु भएको र सयौँ घरहरू भत्किएको चिनियाँ अधिकारीहरूले बताएका छन् ।

चिनियाँ निकायहरूका अनुसार नेपाल–चीन सीमामा अवस्थित सगरमाथा क्षेत्रनजिकै केन्द्रबिन्दु बनाएर गएको उक्त भूकम्पछि कैयौँ परकम्पहरू मापन गरिएको छ ।

नेपालको राष्ट्रिय आपत्कालीन कार्यसञ्चालन केन्द्रका अनुसार चीनमा म्याग्निट्यूड ७ मापन गरिएको उक्त भूकम्पको क्षमता नेपालमा ५.३ म्याग्निट्यूड थियो भने नेपालबाट भूकम्पको केन्द्रबिन्दु औसत दूरी ९० किलोमिटर छ। चिनियाँ निकायहरूले भने उक्त भूकम्पको म्याग्निट्यूड ६.८ भएको जनाएका छन् ।

भूकम्प गएपछि तिब्बतको शिगात्से सहरमा सयौँ भवनहरू भत्किएका र १३० जना घाइते भएको पुष्टि चिनियाँ अधिकारीहरूले गरेका छन्। उक्त क्षेत्रमा विद्युत् र जल वितरण प्रणाली अवरुद्ध भएको छ ।

नयाँदिल्ली । भारतले आफ्नो बहुप्रतीक्षित ‘स्पेस डकिङ प्रयोग’ (स्पाडेक्स) मिशन दुई दिनका लागि स्थगित गरेको घोषणा गरेको छ । स्पेसडकिङ तब हुन्छ, जब दुई अन्तरिक्ष यान अन्तरिक्षमा जोडिन्छन् ।

भारतीय अन्तरिक्ष अनुसन्धान सङ्गठन (इसरो) का अनुसार मङ्गलबार बिहान हुने भनिएको परीक्षण अब बिहीबार सारिएको छ ।

“स्पेस डकिङ प्रक्रियालाई आज पहिचान गरिएको असफल परिदृश्यको आधारमा ग्राउन्ड सिमुलेशनहरू मार्फत थप प्रमाणीकरण आवश्यक छ,” इसरोले जनाएको छ ।

इसरोले ३० डिसेम्बरमा ध्रुवीय उपग्रह प्रक्षेपण वाहन (पिएसएलभी–सी६०), एसडीएक्स०१ (चेजर) र एसडीएक्स०२ (लक्ष्य) का साथ स्पाडेक्स मिशन प्रक्षेपण गर्यो ।

ल्हासा । चीनमा मङ्गलबार बिहान सिचाङ स्वायत्त क्षेत्रको डिङ्ग्री काउन्टीमा गएको ६८ म्याग्निच्युडको भूकम्पपछि माउन्ट कोमोलाङ्मा क्षेत्र अस्थायी रूपमा बन्द गरिएको छ ।

हालसम्म भूकम्पमा परी ५३ जनाको मृत्यु भएको र ६२ जना घाइते भएको क्षेत्रीय प्रकोप राहत मुख्यालयले जनाएको छ ।

डिङ्ग्री संस्कृति तथा पर्यटन ब्यूरोका अनुसार कोमोलाङ्मा क्षेत्रमा होटल भवन र वरपरको क्षेत्र अस्तव्यस्त रहेको र पर्यटक तथा कर्मचारी सुरक्षित रहेका छन् ।

डिङ्ग्रीमा रहेको चाइनिज एकेडेमी अफ साइन्सेजको किमोलुङ स्टेशनको विद्युत् कटौती भएको छ ।

मौसम पूर्वानुमान महाशाखाले डिङ्ग्रीको तापक्रम माइनस १८ डिग्री सेल्सियसदेखि शून्यभन्दा तलसम्म रहेको जनाएको छ ।

बर्लिन। गत वर्ष जर्मनीमा विद्युतीय कारहरूको बिक्री २७ दशमलव ४ प्रतिशतले घटेको आधिकारिक तथ्यांकले सोमबार देखाएको छ।

समग्रमा, सन् २०२४ मा युरोपको सबैभन्दा ठूलो कार बजारमा लगभग २ दशमलव ८ लाख नयाँ विद्युतीय कार दर्ता भएको थियो। यो अघिल्लो वर्षको तुलनामा एक प्रतिशतले कम भएको केबिए संघीय यातायात प्राधिकरणले जनाएको छ।

तीमध्ये, केवल तीन लाख ८० हजार ६०९ विद्युतीय कार थिए, जुन १३ दशमलव ५ प्रतिशतको बजार हिस्सा बराबर छ।

इवाई विश्लेषक कन्स्टान्टिन गलले भन्नुभयो,“सन् २०२३ को अन्त्यमा सरकारी अनुदान फिर्ता लिएपछि जर्मनीमा विद्युतीय कारहरूको माग सुस्त भएको छ। नयाँ इभि मोडलहरूको उच्च मूल्य, कमजोर चार्जिङ पूर्वाधार र दायरा सीमितताहरूले पनि धेरै उपभोक्ताहरूलाई विद्युतीय कार छनौट गर्न निरुत्साहित गरेको छ।”

विद्युतीय कारहरूको घट्दो बिक्रीले जर्मनीको फराकिलो अटो उद्योगले सामना गर्ने चुनौतीहरूलाई रेखांकित गर्छ। यस क्षेत्रले कमजोर माग र विद्युतीय सवारी साधन समस्यासँग सङ्घर्ष गरेको छ । निर्माता र आपूर्तिकर्ताहरूले गत वर्ष धेरै रोजगार कटौतीको घोषणा गरेको थियो।

फेब्रुअरी २३ गते हुने निर्वाचनअघि अटो उद्योगको संकट राजनीतिक मुद्दा बनेको छ।

केही आलोचकहरूले जर्मनीको सामान्य आर्थिक मन्दीलाई विद्युतीय सवारीसाधनमा सँग जोडेका बताएका छन्। यसले विद्युतीय कार निर्माताहरूलाई कमजोर बनाएको छ।

अर्थ कार निर्माताहरूले आगामी वर्ष बिक्रीमा सामान्य वृद्धि भन्दा बढी आशा गर्न सक्ने अवस्था नरहेको उनले बताए।

बागमती । बाराको अमलेखगञ्जबाट चितवनको लोथरसम्म पेट्रोलियम पाइप लाइन विस्तारको काम छिट्टै अगाडि बढाइने भएको छ ।

मोतीहारी–अमलेखगञ्ज पाइप लाइनको काम सकिएपछि चितवनको लोथरसम्म पाइप लाइन विस्तार गर्ने लक्ष्यसहित काम अघि बढाउन लागिएको हो ।

अमलेखगञ्जबाट चितवनको लोथरसम्म ६९ किलोमिटरमा निर्माण हुने सो पेट्रोलियम पाइप लाइनको काम अगाडि बढाउने विषयमा उच्चस्तरीय प्राविधिक टोलीबाट फिल्ड अध्ययनको काम सकिएर डिपिआर निर्माण भइरहेको नेपाल आयल निगमका प्रवक्ता इञ्जिनियर मनोज ठाकुरले जानकारी दिए ।

‘नेपाल र भारत दुवै देशका उच्चस्तरीय प्राविधिक टोलीबाट अध्ययनको काम भइसकेको छ’, प्रवक्ता ठाकुरले भने, ‘टोलीले अध्ययन गरेर अहिले डिपिआर तयार गरिरहेको छ ।’

पाइप लाइन विस्तार गरी लोथरमा एक लाख लिटर पेट्रोलियम पदार्थ भण्डारण गर्नेगरी काम अघि बढ्ने उनको भनाइ छ । अमलेखगञ्जबाट लोथरसम्म पेट्रोलियम पाइप लाइन विस्तार भई सञ्चालमा आएपछि पश्चिमी र उत्तरी नेपालमा पेट्रोलियम पदार्थको अभाव नहुने उनको विश्वास छ ।

यसैगरी मोतिहारी–अमलेखगञ्ज पेट्रोलियम पाइप लाइन विस्तारको काम सकिएसँगै पाइप लाइनबाटै पेट्रोलियम पदार्थको आयात गर्न परीक्षण सुरु गरेको छ ।

मोतिहारी–अमलेखगञ्ज पेट्रोलियम पाइप लाइन विस्तारको सम्पूर्ण काम सकिएको र तत्काल परीक्षणका लागि पाइप लाइनबाटै पेट्रोल र मट्टितेल ल्याइएको नेपाल आयल निगम मधेस प्रादेशिक कार्यालय अमलेखगञ्जका प्रमुख प्रलयङ्कर आचार्यले जानकारी दिए ।

‘पाइप लाइन परीक्षण गर्न तत्कालका लागि विस्तार गरिएको पाइप लाइनबाटै पेट्रोल पाँच हजार पाँच सय केएल र एक हजार केएल मट्टितेल ल्याएका छौँ’, उनले भने, ‘पाइप लाइनबाट ल्याइएको पेट्रोलियम पदार्थको परीक्षण भइरहेको छ ।’ त्यो सँगै पाइप लाइनबाटै पेट्रोलियम पदार्थको नियमित आयात गर्न आवश्यक तयारी भइरहेको उनको भनाइ छ ।

दुवै देशका प्रधानमन्त्रीले संयुक्त रूपमा पाइप लाइनको उद्घाटन गर्ने वा कसरी नियमित आयात सुरु गर्ने विषयमा छलफल भइरहेको जनाउँदै उनले जनवरी २०२५ देखि पाइप लाइनबाटै पेट्रोलियम पदार्थको नियमित आयात गर्ने भनिए पनि आवश्यक तयारी पूरा नभएकाले केही दिन ढिला हुने बताए ।

काठमाडौं । भूकम्पबाट तिब्बतमा ९ जनाको मृत्यु भएको छ । सिजाङ स्वायत्त क्षेत्रको सिगात्सेको दिङ्ग्रे काउन्टीमा मङ्गलबार बिहान गएको ७ म्याग्निच्यूडको भूकम्पबाट ९ जनाको मृत्यु भएको चिनिया समाचार संस्था सिन्ह्वालाई उदृत गर्दै ग्लोलब टाइम्सले जनाएको छ ।

सिन्ह्वा समाचार एजेन्सीका अनुसार भूकम्पबाट यस क्षेत्रमा घर भत्किएका छन् । स्थानीय प्रशासनले उद्धार कार्यका लागि यातायात, जलस्रोत, आवास तथा शहरी–ग्रामीण विकास, नगरपालिकाका पदाधिकारी र गाउँपालिकाका कार्यकर्तालाई परिचालन गरेको छ ।

भूकम्पबाट बच्न स्थानीय बासिन्दाहरूलाई सुरक्षित स्थानान्तरणको व्यवस्था गरिरहेको दिङ्ग्रे काउन्टीका गभर्नरले बताएका छन् ।

भूकम्पको धक्का नेपालमा पनि महसुस गरिएको थियो । भूकम्पपछि मानिसहरु घर बाहिर निस्केका थिए । नेपालमा भने भूकम्पको क्षतिको विवरण संकलन भइरहेको प्रहरीले जनाएको छ ।

दिङ्गे काउन्टी दक्षिण नेपालको सङ्खुवासभा र ताप्लेजुङ तथा दक्षिणपूर्वमा भारतको सिक्किम राज्यसँग सीमा जोडिएको छ ।

भूकम्पको काठमाडौँ उपत्यकासहित आसपास, तराई एवं पूर्वी नेपालका झापा, मोरङ, सुनसरी, उदयपुर, खोटाङ, ओखलढुङ्गा, भोजपुर, धनकुटा, तेह्रथुम, पाँचथर, इलाम, सोलुखुम्बु, सङ्खुवासभा, ताप्लेजुङ लगायत जिल्लामा महसुस गरिएको थियो ।

भूकम्पको धक्का महसुस भएपछि सर्वसाधारण घरबाहिर खुला स्थानमा निस्किएका थिए । केन्द्रका वरिष्ठ भूकम्पविद् लोकविजय अधिकारीले नेपालको पूर्वी सीमाबाट उत्तरतर्फ करिब एक सय किलोमिटर टाढा दिङ्गेमा शक्तिशाली भूकम्प गएको बताए ।