काठमाडौं । नेकपा (एमाले) का सचिव डा. राजन भट्टराईले राष्ट्रिय स्वतन्त्र पार्टी (रास्वपा) शक्तिशाली बन्दै गएको कारण गम्भीर रूपमा विश्लेषण गर्नु आवश्यक रहेको बताएका छन्।

शनिबार काठमाडौंमा आयोजित निर्वाचन मूल्यांकन तथा परराष्ट्र नीति विषयक अन्तरक्रिया कार्यक्रममा बोल्दै उनले रास्वपाले हालैका निर्वाचनमा देखाएको ‘चमत्कारिक’ सफलता कुनै साधारण घटना नभएको उल्लेख गरे। उनका अनुसार यस्तो परिणाम किन र कसरी सम्भव भयो भन्ने विषय अझै अध्ययन र खोजतलासको खाँचो छ।

डा. भट्टराईले भने, ‘आज शक्तिशाली रूपमा उदाएको दल निकै फरक तरिकाले अघि आएको छ। यसको उदय नै चमत्कारिक छ। यससँग के–कस्ता पक्ष जोडिएका छन् भन्ने कुरा अझै खोजतलासको विषय बनेको छ।’

उनले मुलुकमा भूराजनीतिक संवेदनशीलता बढिरहेको उल्लेख गर्दै यस अवस्थामा राजनीतिक दलहरूले आपसी संवाद बढाई राष्ट्रिय एकताको ढाँचा मजबुत बनाउँदै अघि बढ्नुपर्नेमा जोड दिए। विदेशनीतिसम्बन्धी विषयमा दलहरूले साझा समझदारी बनाउँदै समग्र राष्ट्रहितका लागि सार्वजनिक बहस सुरु गर्नु अपरिहार्य रहेको उनले बताए।