काठमाडौं । नेकपा एमालेका अध्यक्ष तथा पूर्वप्रधानमन्त्री केपी शर्मा ओली, पूर्वगृहमन्त्री रमेश लेखक र लुम्बिनी प्रदेशका पूर्वएमाले सांसद रेखा शर्माको बन्दीप्रत्यक्षीकरण रिटमा आज सुनुवाई हुँदैछ ।

न्यायाधीशहरू विनोद शर्मा र सुनिलकुमार पोखरेलको संयुक्त इजलासमा सुनुवाई हुने भएको हो । प्रधानमन्त्री तथा मन्त्रिपरिषद् कार्यालयसमेतलाई विपक्षी बनाउँदै ओली पत्नी राधिका शाक्य, लेखक पत्नी यशोधा र रेखाको पति चिन्तामणि शर्माले गैरकानुनी ढंगले पक्राउ गरेको भन्दै रिहा माग गरेका छन् ।

तर, प्रधानमन्त्री बालेन्द्र शाह (बालेन)ले ओली कानुनभन्दा माथि नभएको भन्दै कारबाही गर्न पक्राउ गरेको लिखित जवाफ पेश गरिसकेका छन् ।

यही १६ चैतमा न्यायाधीश मेघराज पोखरेलको एकल इजलासले ओलीको पक्राउ गरेको प्रकरणमा सरकारको नाममा कारण देखाउ आदेश जारी गरेको थियो ।

त्यसबेला न्यायाधीश पोखरेलले निवेदक राधिकाको मागअनुसार ओलीलाई रिहा गर्न अस्वीकार गरेको थियो ।

ओली १४ चैतको बिहानै भक्तपुरको गुण्डुस्थित निवासबाट पक्राउ परेका हुन् । स्वास्थ्य अवस्थाका कारण उनी त्रिवि शिक्षण अस्पतालमा छन् । लेखक र शर्मा भने प्रहरी हिरासतमा छन् ।