काठमाडौं । राष्ट्रिय प्रजातन्त्र पार्टी (राप्रपा)की प्रमुख सचेतक खुस्बु ओलीले प्रधानमन्त्री बालेन्द्र शाहको अभिव्यक्तिको बचाउ गर्न खोज्नेहरूलाई लक्षित गर्दै व्यक्ति पूजा र नेता केन्द्रित राजनीतिप्रति कडा टिप्पणी गरेकी छन्।

उनले आफ्ना नेताको बचाउ गर्ने नाममा राष्ट्रिय हित र सार्वभौमिकतामाथि प्रश्न उठाउने गतिविधि स्वीकार्य नहुने बताइन्।

प्रतिनिधिसभा बैठकमा बोल्दै ओलीले प्रधानमन्त्रीले संसदमा दिएको अभिव्यक्ति कूटनीतिक, कानुनी र राष्ट्रिय सुरक्षाको दृष्टिले गम्भीर विषय बनेको उल्लेख गरिन्।

‘प्रधानमन्त्रीज्यूले हिजो व्यक्त गर्नुभएको अभिव्यक्ति कूटनीतिक, कानुनी र राष्ट्रिय सुरक्षाको दृष्टिले अत्यन्त गम्भीर विषय बनेको छ। प्रधानमन्त्री भनेको व्यक्ति होइनन्, संस्था हुन् र हाम्रो राजकीय संस्थाबाट आएको ज्यादै फितलो भाष्यले राष्ट्रिय सङ्कट उत्पन्न गर्ने जोखिम बढेको छ । यसलाई भइहाल्यो, सामान्य विषय हो, उहाँको आशय अर्कै हो भनेर टार्न मिल्ने खालको विषय होइन,’ उनले भनिन्।

संवेदनशील विषयमा सार्वजनिक पदाधिकारीले अत्यन्त सावधानी, जिम्मेवारीबोध र कूटनीतिक परिपक्वतासहित भाषा प्रयोग गर्नुपर्ने उनको भनाइ थियो।

‘आजभोलि केही मानिसहरू आफ्ना नेताले जे भन्यो त्यसलाई सही साबित गर्न देशकै विरुद्ध प्रमाण खोज्न दौहिँरहेका छन् । देशको सीमा, सार्वभौमिकता र राष्ट्रिय स्वाभिमान बहसका विषय हुन सक्छन् तर नेताको एउटा अभिव्यक्तिलाई बचाउन आफ्नो राष्ट्रकै दाबी कमजोर बनाउने काम कदापि राष्ट्रवाद होइन र यो सदनका सम्मानित माननीयज्यूहरूले त्यस किसिमका गतिविधि नगर्न आग्रह गर्न चाहन्छु,’ उनले भनिन्।

ओलीले नेता पूजा र व्यक्ति पूजा गर्ने प्रवृत्ति लोकतान्त्रिक मूल्यका लागि घातक हुने चेतावनीसमेत दिइन्।

‘एकदिन मानिसले आफ्नो नेताको बचाउ गर्दै आफ्नो देशको पक्ष छोडेको यहाँहरूलाई स्मरण पनि रहँदैन । त्यसैले मैले सम्पूर्ण सदनलाई भन्न चाहेँ,’ उनले भनिन्।