एजेन्सी। चिनियाँ प्रविधि कम्पनी अनरले वर्ल्ड आर्टिफिसियल इन्टेलिजेन्स कन्फरेन्स २०२६ मा विश्वकै पहिलो ‘रोबोट फोन’ सार्वजनिक गरेको छ। कम्पनीका अनुसार यो उपकरणले परम्परागत स्मार्टफोनको अवधारणालाई नयाँ स्तरमा पुर्‍याउँदै कृत्रिम बुद्धिमत्ता (एआई) र मेकानिकल प्रविधिको संयोजन प्रस्तुत गरेको हो।

यस फोनको सबैभन्दा ठूलो विशेषता यसको ४-डिग्री-अफ-फ्रिडम टाइटेनियम एलोय मेकानिकल गिम्बल प्रणाली हो। फोनभित्रै जडान गरिएको यो प्रणालीले क्यामरा मोड्युललाई स्वतन्त्र रूपमा घुम्न, चलायमान वस्तुलाई पछ्याउन, संगीतको लयअनुसार प्रतिक्रिया दिन तथा एआईले दिएको प्रतिक्रिया शारीरिक हाउभाउमार्फत अभिव्यक्त गर्न सक्षम बनाउँछ। आवश्यकता पर्दा एउटा बटन थिचेर गिम्बल बाहिर निस्कने र प्रयोग नभएको अवस्थामा फोनभित्रै लुक्ने व्यवस्था गरिएको छ।

अनरका अनुसार गिम्बल प्रणालीमा प्रयोग भएका माइक्रो–मोटरहरू परम्परागत विकल्पभन्दा करिब ७० प्रतिशत साना छन्। यसले हिँड्दा हुने कम्पन (वाकिङ शेक) ९६ प्रतिशतसम्म कम गर्दै सीआईपिए ५ दशमलव ५  स्तरको इमेज स्टेबिलाइजेसन प्रदान गर्ने कम्पनीको दाबी छ। क्यामरा मोड्युल ३६० डिग्रीसम्म घुम्न सक्ने र ९० तथा १८० डिग्रीका स्मार्ट मोसन ट्रान्जिसनमार्फत सिनेमाटिक भिडियो रेकर्डिङलाई सहज बनाउने सुविधा पनि यसमा समावेश गरिएको छ।

एआई क्षमताका हिसाबले पनि यो उपकरणलाई परम्परागत स्मार्टफोनभन्दा निकै फरक बनाइएको छ। फोनमा रहेको होनर योयो एआई ले प्रयोगकर्ताको एउटै आदेशमा धेरै काम क्रमशः आफैं सम्पन्न गर्न सक्छ। जस्तै, एन्टी-मोसन सिकनेस मोड सक्रिय गर्ने, स्क्रिनको ब्राइटनेस मिलाउने, अलार्म सेट गर्ने र ट्याक्सी बुक गर्ने जस्ता काम न्यूनतम मानवीय हस्तक्षेपमै गर्न सक्ने कम्पनीले जनाएको छ।

कम्पनीले प्रदर्शनका क्रममा फोनले रियल-टाइम डेटा विश्लेषण गरी फुटबल विश्वकप फाइनलमा स्पेनले अर्जेन्टिनालाई ३-१ ले पराजित गर्ने अनुमान प्रस्तुत गरेको देखाएको थियो। त्यसक्रममा फोनको गिम्बल प्रणालीले टाउको हल्लाएजस्तो प्रतिक्रिया जनाउँदै एआई विश्लेषणलाई शारीरिक अभिव्यक्तिसँग जोडेको थियो। यो केवल प्रदर्शनका लागि गरिएको एआई डेमो भएको कम्पनीले जनाएको छ।

फोटोग्राफीका लागि फोनमा फ्ल्यागशिप स्तरको ट्रिपल रियर क्यामरा सेटअप दिइएको छ। यसमा २०० मेगापिक्सेलको ४डी गिम्बल मुख्य क्यामरा, ५० मेगापिक्सेलको अल्ट्रा-वाइड लेन्स र २०० मेगापिक्सेलको पेरिस्कोप टेलिफोटो लेन्स समावेश छन्।

अनरले यो उपकरणलाई एआरआरआई सँगको रणनीतिक साझेदारीअन्तर्गत विकसित गरेको पहिलो उत्पादन पनि जनाएको छ। यसमा एआरआरआई-लग सी इन्कोडिङ, एलयूटी कलर ग्रेडिङ, सी-लग, फोकस लक र ह्वाइट ब्यालेन्स लकजस्ता व्यावसायिक भिडियो निर्माणका सुविधा समावेश गरिएका छन्, जसले विशेषगरी व्यावसायिक भिडियो निर्माता र कन्टेन्ट क्रिएटरलाई लक्षित गरेको छ।

यो रोबोट फोन मार्च २०२५ मा सार्वजनिक गरिएको होनर अल्फा स्ट्रेटेजी अन्तर्गतको पहिलो प्रमुख उत्पादन हो। कम्पनीले स्मार्टफोन निर्माता मात्र नभई एआई-आधारित टर्मिनल इकोसिस्टम कम्पनी बन्ने दीर्घकालीन रणनीतिअनुसार यो उपकरण विकास गरिएको जनाएको छ।

अनरका अनुसार रोबोट फोन हार्डवेयरमा गरिएको सामान्य सुधार मात्र नभई एआई र मेकानिकल प्रविधिको संयोजनमार्फत स्मार्टफोनलाई थप अन्तरक्रियात्मक, बुद्धिमान र प्रयोगकर्तासँग प्रत्यक्ष संवाद गर्न सक्ने उपकरणका रूपमा विकास गर्ने दिशामा महत्वपूर्ण कदम हो।