काठमाडौं। सुधन गुरुङ रास्वपाको उपसभापति बन्ने चर्चा हुन थालेको छ।

चितवन महाधिवेशनमा केन्द्रीय सदस्य पदमा उम्मेदवारी नदिएका उनी उपसभापति पदका लागि लबिङ गरिरहेका छन्। भनिन्छ, यसका लागि रास्वपा सभापति रवि लामिछाने पनि सकारात्मक छन्।

महाधिवेशन भएको करिब महिना दिन बित्न लाग्दासमेत रास्वपाले बाँकी रहेका केन्द्रीय सदस्य तथा पदाधिकारीको मनोनयन गर्न सकेको छैन। यसको प्रमुख कारण बालेन पक्ष रहेको रास्वपा स्रोत बताउँछ। बालेन पक्षले मनोनयन गरिनुपर्ने सदस्य तथा पदाधिकारीको सूची अझै बुझाएको छैन। यसकै कारण मनोनयनमा ढिलाइ भएको रास्वपा स्रोतको दाबी छ।

वरिष्ठ नेताको पदमा प्रधानमन्त्री बालेन्द्र शाह (बालेन) नै निर्विकल्प छन्। यद्यपि विधानमा दुई वा दुईभन्दा बढी वरिष्ठ नेता रहने व्यवस्था भए पनि बालेनकै लागि उक्त व्यवस्था संशोधन गरिएको नेताहरू बताउँछन्।

यस्तै, एक उपसभापति पदका लागि गृहमन्त्री सुधन गुरुङको सम्भावना बलियो देखिएको स्रोतको दाबी छ। उक्त पदमा प्रधानमन्त्री शाहका विश्वासपात्र तथा भौतिक पूर्वाधार मन्त्री सुनिल लम्सालले पनि दाबी गरिरहेका छन्।

तर पार्टी सभापति रवि लामिछाने भने लम्सालभन्दा गुरुङलाई उपसभापति बनाउने पक्षमा रहेको स्रोतले जनाएको छ।