काठमाडौँ । नेकपा एमालेका महासचिव शंकर पाेखरेलले प्रतिनिधिसभा निर्वाचनका क्रममा पार्टी सचिव याेगेश भट्टराईलाई जिम्मेवारी नदिएको भन्ने सामाजिक सञ्जालमा फैलिएको चर्चाप्रति स्पष्टीकरण दिएका छन्।

शनिबार सामाजिक सञ्जालमार्फत प्रतिक्रिया दिँदै पोखरेलले निर्वाचनका समयमा भट्टराईले महासचिवसँग जिम्मेवारी माग्दा नपाएको भन्ने चर्चा भएको देखिएको उल्लेख गरेका छन्।

तर, आफूले भट्टराईलाई वक्ताका रूपमा माग भएका स्थानहरूमा सम्भव भएसम्म सहभागी हुन अनुरोध गरेको बताएका छन्।

पोखरेलका अनुसार उनले भट्टराईलाई समय मिलेसम्म दाङमा समेत आउन आग्रह गरेका थिए।

त्यसबेला भट्टराईले भने ताप्लेजुङ जानुपर्ने कार्यक्रम रहेको जानकारी गराएका थिए। उनले त्यसलाई स्वाभाविक रूपमा लिएको पनि बताएका छन्।

हाल भट्टराईका नाममा प्रसारित केही समाचारप्रति आफू आश्चर्यचकित भएको पोखरेलले उल्लेख गरेका छन्। ‘सायद उहाँको भनाइको अधुरो अंश मात्र सम्प्रेषण भएको हुन सक्छ,’ उनले भनेका छन्।

पोखरेलले भ्रम नपरोस् भन्ने उद्देश्यले मात्र उक्त विषय स्पष्ट पार्न आवश्यक ठानेको बताएका छन्।

हाल सामाजिक सञ्जालमा प्रतिनिधिसभा निर्वाचनका समयमा पार्टीभित्रको भूमिकाबारे विभिन्न टिप्पणी र चर्चा भइरहेका छन्।