काठमाडौं। चार वर्षपछि नेपाली राष्ट्रिय क्रिकेट टोलीको कप्तानीमा फर्किएका सन्दीप लामिछानेले पुनरागमनलाई यादगार बनाएका छन्। उनको नेतृत्वमा नेपालले एसीसी प्रिमियर कपको उपाधि जित्दै सन् २०२७ मा बंगलादेशमा आयोजना हुने एसीसी एसिया कपमा स्थान सुरक्षित गरेको छ।

नेपाल क्रिकेट संघ (क्यान) ले गत महिना रोहित पौडेललाई कप्तानीबाट हटाएर लेग स्पिनर लामिछानेलाई एकदिवसीय टोलीको नेतृत्व सुम्पिएको थियो। कप्तानीमा फर्किएपछि उनले पहिलो प्रतियोगितामै नेपाललाई उपाधि दिलाएका हुन्।

प्रतियोगितामा नेपालले पाँच खेल जित्दा एक खेलमा पराजय व्यहोरेको थियो। टोलीको सफल यात्रामा कप्तान सन्दीपको प्रदर्शन पनि निर्णायक रह्यो। उनले प्रतियोगिताभर १७ विकेट लिएर उत्कृष्ट खेलाडीको पुरस्कार जिते।

बहराइनविरुद्धको पहिलो खेलमै पाँच विकेट लिएका सन्दीपले मलेसियाविरुद्ध दुई, साउदी अरेबियाविरुद्ध तीन र हङकङविरुद्ध चार विकेट लिए। ओमानविरुद्धको सेमिफाइनलमा तीन विकेट लिएका उनले यूएईविरुद्धको फाइनलमा एक विकेट हात पारे।

यूएईलाई ४४ रनले पराजित गर्दै नेपालले उपाधि जितेको हो। सोही खेलमा एक विकेट लिएसँगै सन्दीपले अन्तर्राष्ट्रिय क्रिकेटमा ३०० विकेट पूरा गर्ने पहिलो नेपाली खेलाडीको कीर्तिमानसमेत बनाए। उनले एकदिवसीय अन्तर्राष्ट्रियमा १५८ तथा टी–२० क्रिकेटमा १४२ विकेट लिएका छन्।

सन्दीपले आफ्नो व्यक्तिगत उपलब्धिभन्दा टोलीको सफलता ठूलो भएको बताएका छन्। उपाधि जितेपछि उनले भने, ‘टोलीलाई च्याम्पियन बनाउन योगदान दिन पाउँदा खुसी लागेको छ। तर, यो व्यक्तिगत उपलब्धिभन्दा पनि टोलीको सफलताका लागि हो। टोलीका सबै खेलाडीले उत्कृष्ट प्रदर्शन गरेकाले नै हामी च्याम्पियन बनेका छौँ।’

चार वर्षअघि पहिलोपटक नेपाली टोलीको कप्तानी सम्हालेका सन्दीपको पहिलो कार्यकाल भने अपेक्षाअनुसार सफल हुन सकेको थिएन। उनले कप्तानी गरेको १४ एकदिवसीय खेलमध्ये नेपालले चार खेल मात्र जितेको थियो। नौ खेलमा पराजित हुँदा एक खेल बराबरीमा सकिएको थियो।

सन् २०२२ मा कप्तान बनेका सन्दीपमाथि नाबालिगमाथि बलात्कारको अभियोग लागेपछि उनलाई कप्तानीबाट हटाउँदै निलम्बन गरिएको थियो। लामो कानुनी प्रक्रियापछि अदालतबाट सफाइ पाएपछि उनी पुनः राष्ट्रिय टोलीमा फर्किएका थिए। त्यसपछि छोटो समयमै उनले आफ्नो पुरानो लय समातेका छन्।

दोस्रोपटक कप्तानीको जिम्मेवारी पाउँदा भने सन्दीपले मैदानमा बलिङसँगै रणनीतिक नेतृत्वमा पनि प्रभाव देखाए। आवश्यक समयमा विकेट निकाल्दै उनले खेलको अवस्था आफ्नो टोलीको पक्षमा मोड्न योगदान दिए।

नेपाललाई एसीसी प्रिमियर कपबाट एसिया कपसम्म पुर्‍याउने उनी दोस्रो नेपाली कप्तान बनेका छन्। यसअघि रोहित पौडेलको नेतृत्वमा नेपालले सन् २०२३ को एसिया कप खेलेको थियो।

आठ वर्ष लामो अन्तर्राष्ट्रिय करियरमा अनेक उतारचढाव पार गरेका सन्दीपका लागि पछिल्लो उपलब्धि विशेष बनेको छ। करियर नै संकटमा पर्ने अवस्थामा पुगेका उनी कानुनी लडाइँपछि मैदानमा फर्किएर पुनः राष्ट्रिय टोलीको नेतृत्व सम्हाल्दै अन्तर्राष्ट्रिय क्रिकेटमा नयाँ कीर्तिमान बनाउन सफल भएका छन्।

सन्दीपले एसीसी प्रिमियर कपको उपाधि रसुवा र नुवाकोटका बाढीपीडितलाई समर्पण गरेका छन्। विपद्को पीडामा रहेका नेपालीलाई टोलीको सफलताले केही भए पनि खुसी दिने उनको विश्वास छ।

‘देशलाई दुःख परेको बेला हामीले एसीसी प्रिमियर कपको उपाधि उचाल्दै एसिया कपमा पुग्यौँ। यसले थोरै भए पनि नेपालीको मुहारमा खुसी ल्याएको छ। हामी गौरवान्वित छौँ,’ सन्दीपले भने।