Author: nepalone

काठमाडौं । सुदन गुरुङलगायत जेन–जी आन्दोलनकारीले पक्राउका लागि सरकारलाई दबाब दिइरहेका बेला नेकपा एमाले नेता महेश बस्नेतले आज पत्रकार सम्मेलन गर्ने भएका छन् । एक महिलाले साइबर ब्युरोमा उनीविरुद्ध दिएको उजुरीमाथि अनुसन्धान अघि बढेका बेला महेश बस्नेतलाई पक्राउ गर्न दबाब दिइएको छ । बस्नेतले ब्युरोमा गएर बयान समेत दिएका छन् ।

जेन–जी आन्दोलनमा आफ्नो घर आगजनी र लुटपाटपछि आक्रोशित बनेका बस्नेतले जेन–जीका नाममा आतंककारी गतिविधि गर्नेहरूको पहिचान गरेर कारबाही गर्ने बताएका थिए । त्यसयता उनको र सुदन गुरुङबीच आरोप–प्रत्यारोप चलिरहेको छ । बस्नेतले आज पार्टी कार्यालयमा पत्रकार सम्मेलन गरेर सबै विषय प्रष्ट पार्ने बताएका छन् । उनकै पहलमा एमाले अध्यक्ष केपी शर्मा ओली गुण्डुमा बसिरहेका छन् ।

काठमाडौँ । हालैको बाढी र पहिरोबाट क्षति पुगेका व्यक्तिगत घरहरूको पुनर्निर्माण अब प्रदेश सरकारमार्फत हुने भएको छ । सञ्चार तथा सूचना प्रविधि मन्त्री जगदीश खरेलले यसबारे जानकारी दिँदै प्रदेश सरकारले प्रमुख जिम्मेवारी लिने स्पष्ट पारेका छन् ।

पत्रकारहरूसँग कुराकानी गर्दै मन्त्री खरेलले भने, ‘सरकारको निर्णयअनुसार व्यक्तिगत आवासको पुनर्निर्माण प्रदेश सरकार मातहत हुनेछ। संघीय सरकार र स्थानीय तहले आवश्यक सहयोग पुर्‍याउने छन् ।’
पहिलो चरणमा स्थानीय सरकारमार्फत राहत वितरण गर्ने तयारी पनि सरकारले गरिरहेको मन्त्री खरेलले बताएका छन् ।

राजमार्ग पुनः सञ्चालनको पहल
मन्त्री खरेलका अनुसार बाढी पहिरोले अवरुद्ध मेची राजमार्गलाई एक हप्ताभित्र अस्थायी रूपमा सञ्चालनमा ल्याउने लक्ष्य राखिएको छ । साथै, बीपी राजमार्ग पनि दुई–तीन दिनभित्र सञ्चालन हुने गरी काम अघि बढाइएको छ ।

जनधनको क्षति
मनसुनजन्य विपत्तिबाट हालसम्म ५२ जनाको ज्यान गएको, ५ जना अझै बेपत्ता रहेको र ४८ जना घाइते भएका जानकारी मन्त्री खरेलले दिए । चार हजारभन्दा बढी नागरिकलाई सुरक्षाकर्मीहरूले उद्धार गरिसकेको उनले बताएका छन् ।

काठमाडौं । अबिरल वर्षा र बाढी–पहिरोको कारण आज (बुधबार) पनि देशका विभिन्न राजमार्गको सात ठाउँमा सडक पूर्णरूपमा अवरुद्ध भएको छ । विभिन्न सडकका पाँच स्थानमा भने एकतर्फी गाडी गुडिरहेका प्रहरीले जनाएको छ ।

संखुवासभाको भोटखोला र मकालुमा कोशी राजमार्ग, इलामको इलाम नगरपालिका–९ मा मेची राजमार्ग, रसुवाको गोसाइँकुण्डमा पासाङ ल्यामु सडक, काभ्रेको रोसी गाउँपालिका–११ स्थित माम्तीखोला, सोही वडाको डालाबेसी, बुल्ढुंगा र बाँझोखेतमा सडक अवरुद्ध छ ।

त्यस्तै सिन्धुलीको सुनकोशी गाउँपालिका–१ नेपालथोकमा पनि पहिरोले सडक अवरुद्ध अवस्थामा छ । त्यसैगरी आज धनकुटाको पाख्रिवास नगरपालिका–५ मा मध्यपहाडी लोकमार्ग, धनकुटाकै साँघुरीगढी गाउँपालिकामा कोशी लोकमार्गमा एकतर्फी गाडी चलेका छन् ।

त्यस्तै मकवानपुरको भिमफेदी गाउँपालिका–८ बगुवा खोलास्थित कान्ती लोकपथ, मकवानपुरकै बकैया गाउँपालिका– ११ घट्टेपाखामा पनि सवारी साधन एकतर्फी गुडिरहेका छन् । सिन्धुलीको मरिण गाउँपालिका– २ सिन्दुरेस्थित मदन भण्डारी राजमार्ग पनि आज एकतर्फी बन्द भएको छ । एकतर्फी बन्द भएका सडकमा चापमा गाडी चरिहेका प्रहरीले जनाएको छ ।

हेर्नुस् कुन राजमार्ग छन् अवरुद्ध ?

काठमाडौं । आगामी २१ फागुनमा प्रतिनिधिसभा निर्वाचन मिति तोकिएको केही दिनमै निर्वाचन आयोगले नयाँ राजनीतिक दलहरूलाई छिटोभन्दा छिटो दर्ता प्रक्रिया पूरा गर्न आह्वान गरेको छ । निर्वाचन मिति घोषणासँगै दल दर्तामा कुनै कानुनी अवरोध नरहेको भए पनि समयाभावका कारण ढिलाइ नगर्न आयोगले स्पष्ट पारेको छ ।

निर्वाचन आयोगका कार्यवाहक प्रमुख आयुक्त रामप्रसाद भण्डारीका अनुसार, ‘संविधान र प्रचलित कानुनअनुसार नयाँ दलहरू निर्वाचनको लागि आवश्यक तयारीसहित आयोगमा निवेदन दिन सक्छन् । तर समय कम भएकाले प्रक्रियामा ढिलाइ गर्नु उपयुक्त हुँदैन ।’

हाल आयोगमा १२२ राजनीतिक दल दर्ता छन् । आगामी निर्वाचनमा भाग लिन चाहने नयाँ वा हाल दर्ता दलहरूले आयोगले चाँडै निकाल्ने विशेष सूचनाको आधारमा पुनः दर्ता प्रक्रिया पूरा गर्नु पर्नेछ ।

दल दर्ताको प्रक्रिया के हो ?
राजनीतिक दलसम्बन्धी ऐन, २०७३ अनुसारः
–कम्तीमा ५ सय मतदाताको समर्थन ।
–दलको विधान, घोषणापत्र, झन्डा र चुनाव चिन्हको नमुना ।
–२१ सदस्यीय केन्द्रीय समिति ।
–सदस्यहरूले अरू कुनै दलमा नरहेको घोषणापत्र ।
– आवश्यक प्रमाणपत्रहरू सहित आयोगमा निवेदन दिनु पर्नेछ ।

निर्वाचन अवधि कहिलेदेखि ?
निर्वाचन आयोग ऐन, २०७३ अनुसार, मतदान मितिभन्दा १२० दिन अगाडिदेखि अन्तिम नतिजा सार्वजनिक नभएसम्मको समयलाई निर्वाचन अवधि भनिन्छ । त्यसअनुसार, यो पटक २० कात्तिकदेखि निर्वाचन अवधि सुरु हुनेछ ।

जेन–जी आन्दोलन र नयाँ दलहरूको सम्भावना
२३–२४ भदौमा भएको जेनजी आन्दोलनले युवाहरूमा नयाँ राजनीतिक चेतना सिर्जना गरेको छ । यसै सन्दर्भमा नयाँ दल दर्ताको चाप बढ्न सक्ने आंकलन आयोगले गरेको छ । आन्दोलनमा सक्रिय युवाहरूलाई लक्षित गर्दै सरकारले मतदाता नामावली संकलनमा रहेको कानुनी अड्चन अध्यादेशमार्फत हटाइसकेको छ । अब कात्तिक मसान्तसम्म नयाँ मतदाता नामावली अद्यावधिक हुनेछ ।

निर्वाचन मिति घोषणा भइसकेको भए पनि दल दर्ता गर्न कुनै रोक छैन । तर आयोगले भनेको जस्तै, समय सीमाभित्र आवश्यक कागजात र मापदण्डहरू पूरा गरेर दर्ता प्रक्रिया छिटो सक्न आवश्यक छ । नयाँ दलहरूका लागि यो समय निर्णायक सावित हुन सक्छ ।

काठमाडौं । सशस्त्र प्रहरीकी प्रहरी निरीक्षक (इन्सपेक्टर) डा. महिमा सिटौलालाई सेवाबाट हटाउने तयारी गरिएको छ । बिदा स्वीकृत नगराई लामो समयदेखि सिटौला कार्यालयमा उनुपस्थित रहेका कारण उनलाई सेवाबाट हटाउने तयारी गृह मन्त्रालयले गरेको हो ।

गृह मन्त्रालयले आज सूचना जारी गर्दै सशस्त्र प्रहरीको बलम्बुस्थित अस्पतालमा कार्यरत सिटौला गत साउन १४ गतेदेखि कार्यालयमा अनुपस्थित रहेको जनाएको छ ।

‘बिदा स्वीकृत नगराई बिना सूचना लामो समयसम्म अनुपस्थित रही सम्पर्क स्थापित गर्न नसकिएको र तपाईले पदीय जिम्मेवारी एवं आचरण विपरीतको कार्य गरेको देखिएको हुँदा तपाईलाई सशस्त्र प्रहरीको नियमावली अनुसारको कसुरमा विभागीय कारबाही गर्न लागिएको व्यहोरा सूचित गरिन्छ,’ सूचनामा भनिएको छ, ‘तपाईँउपर विभागीय सजाय गर्नु नपर्ने कुनै मनासिव कारण भए बाटोको म्याद बाहेक यो सूचना प्रकाशित भएको मितिले सात दिनभित्र कारणसहित सफाई पेश गर्नु हुन यो सूचना प्रकाशित गरिएको छ ।’

हेर्नुस् सूचना

नेपाल प्रहरीका १८ जनालाई सात दिनभित्र सम्पर्कमा आउन निर्देशन
प्रहरी प्रधान कार्यालयको कानुन शाखाले सूचना जारी गर्दै १८ जना प्रहरी लामो समयदेखि गैरहाजिर रहेका भन्दै उनीहरूलाई सम्पर्कमा आउन सात दिनको समय दिएको हो ।

गैरहाजिर हुनेमा दुई प्रहरी सहायक हबलदार, दुई जना प्राविधिक प्रहरी जवान, एक प्रहरी कार्यालय सहयोगी र बाँकी सबै प्रहरी जवान छन् । लामो सयमदेखि सम्पर्कविहीन भएका उनीहरूलाई एक साताभित्र सम्पर्कमा नआए सेवाबाट हटाइने सूचनामा उल्लेख छ ।
हेर्नुहोस् सूचना

काठमाडौं । नेकपा (एमाले) निकट अनेरास्ववियुले काठमाडौंका मेयर बालेन्द्र शाह र जेनजी अगुवा सुदन गुरुङविरुद्ध दिएको किटानी जाहेरी प्रहरीले बुझेको छ ।

भदौ २३ र २४ गते जेनजी आन्दोलनका क्रममा भएको लुटपाट, तोडफोड र आगजनीमा संलग्नता रहेको भन्दै एमाले अखिलले मेयर बालेन्द्र र हामी नेपालका संस्थापक सुदनविरुद्ध काठमाडौं जिल्ला प्रहरी परिसरमा जाहेरी दिएको हो ।

प्रहरीले जाहेरी बुझेको र सरकारी वकिलसँग छलफल गरेर दर्ता गर्ने नगर्ने २४ घण्टाभित्र निर्णय लिने जानकारी दिएको अखिलका महासचिव दीपक धामीले बताएका छन् । मंगलबार अखिलका नेताहरू बालेन र सुदनलाई पक्राउ गर्नुपर्ने मागसहित किटानी जाहेरी लिएर काठमाडौं जिल्ला प्रहरी परिसर पुगेका हुन् ।

गत भदौ २४ गते भएको जेनजी आन्दोलनका क्रममा सिंहदरबार, संसद भवन, सर्वोच्च अदालत लगायत राज्यका महत्वपूर्ण निकाय जलाउनमा बालेन र सुदनको हात रहेको उनीहरूको आरोप छ ।

यसअघि तत्कालीन प्रधानमन्त्री एवम् एमाले अध्यक्ष केपी शर्मा ओली र तत्कालीन गृहमन्त्री रमेश लेखकलाई पक्राउ गर्न माग गर्दै सुदनको समूह प्रहरी परिसर पुगेको थियो भने सामाजिक सञ्जालमार्फत ओली र लेखकलाई पक्राउ गर्नुपर्ने दबाब दिइरहेको छ । त्यसैको प्रतिक्रिया स्वरुप एमाले अखिल प्रहरी कार्यालय पुगेको हो ।

‘दण्डहिनतालाई टुलुटुलु हेरेर बस्दैनौं’
अनेरास्ववियुले दिएको किटानी जाहेरीलाई प्रहरीले एक दिन समय मागेको पूर्व अध्यक्ष समिक बडालले जानकारी दिएका छन् । ‘हामीले जाहेरी दिएका छौं । सरकारी वकिलसँग सल्लाह गरेर २४ घण्टामा यसको निर्णय दिन्छौं भन्नु भएको छ । सरकारी वकिलको कार्यालयको निर्णयपछि मात्रै हामी थप निर्णय गर्नेछौं,’ उनले भने ।

बडालले थप न्यायिक निरुपणका लागि आफूहरू सम्बन्धित ठाउँमा जान तयार रहेको बताए । ‘हामी कानुनी राज्यको पक्षधर भएको संगठन हौं। हामीले मुलुकको विधिको शासनको वकालत गर्दै यहाँसम्म आएका छौं । दण्डहिनतालाई प्रश्रय दिनु हुँदैन भनेर हामी यहाँ उपस्थित भएका छौं,’ उनले भने ।

उनले राष्ट्रिय सम्पदाहरू तोडफोड र आगजनी गर्नेहरूलाई अनुसन्धान गरेर दोषीहरूलाई कारबाहीको दायरामा ल्याउनुपर्ने बताए । उनले त्यसका लागि आवश्यक प्रमाणहरू पनि बुझाएको बताए । ‘जेनजीका नाममा बालबालिकाको हत्या भएको छ । सिंहदरवार, अड्डा अदालत जलेका छन् । राष्ट्रिय सुरक्षामा खतरा महसुस भएको छ । हामी दण्डहिनतालाई टुलुटुलु हेरेर बस्दैनौं,’ उनले भने ।

त्यस्तै अखिलका महासचिव दीपक धामीले जेनजी आन्दोलनपछि देश आतंकित बनेको बताए । उनले यस्तो बेला राज्यका सबै नियकाहरू परिचालित हुनुपर्नेमा कोही व्यक्तिहरूले सरकारी कार्यालयहरूमा हुकुमी शासन चलाइरहेको आरोप लगाए ।

‘प्रहरीलाई कुटीकुटी मारिएको छ । विद्यार्थीलाई गोली हानिएको छ । शान्तिको प्रतीकको रूपमा रहेको देशमा विध्वंश मच्चाइएको छ । त्यो हुनु हुँदैन । हामी पनि त्यही समूहका युवाहरू हौं । अनधिकृत मान्छेहरू सिंहदरवार छिरेर हुकुमी शासन लाद्नु हुँदैन,’ उनले भने ।

काठमाडौँ । धरान उपमहानगरपालिकाका मेयर हर्क साम्पाङले वैधता बिनाको सरकारलाई प्रहरीले पनि नटेर्ने रहेछ भन्दै कटाक्ष गरेका छन्। सामाजिक सञ्जाल फेसबुक पेजमा लेख्दै उनले यस्तो टिप्पणी गरेका हुन् ।

पूर्व प्रधानमन्त्री केपी शर्मा ओली र पूर्व गृहमन्त्री रमेश लेखकविरुद्ध जेनजी आन्दोलनका घाइते परिवारबाट आएको जाहेरी प्रहरीले दर्ता गरेर अनुसन्धान अघि नबढाइ पूर्व न्यायाधीश गौरीबहादुर कार्की नेतृत्वको न्यायिक जाँचबुझ आयोगलाई पठाएपछि मेयर साम्पाङको यस्तो भनाई बाहिर आएको हो । मेयर साम्पाङले लगातार सुशीला कार्की नेतृत्वको अन्तरिम सरकारको वैधता र चरित्रका विषयमा प्रश्न उठाउँदै आइरहेका छन् ।

काठमाडौं । नेकपा एमालेको विद्यार्थी संगठन अनेरास्ववियुका नेताहरू काठमाडौं महानगरपालिकाका मेयर बालेन्द्र शाह र ‘हामी नेपाल’ का संस्थापक सुदन गुरुङविरुद्ध ‘काउन्टर’ जाहेरी दिन काठमाडौं प्रहरी परिसर पुगेका छन् ।

अनेरास्ववियुका पूर्व अध्यक्ष समिक बडालको नेतृत्वमा अखिलका नेताहरू काठमाडौं प्रहरी परिसर पुगेका हुन् । उनीहरूले सिंहदरबार लगायत सरकारी संरचनामा आगजनी गरिएको, निजी सम्पत्ति ध्वंस गरिएको र प्रहरीहरूको हत्या गरिएकोमा बालेन र सुदनलाई आरोप लगाएका छन् ।

यता आजै ‘हामी नेपाल’ का संस्थापक गुरुङ लगायतले पूर्व प्रधानमन्त्री केपी शर्मा ओली र पूर्व गृहमन्त्री रमेश लेखकविरुद्ध किटानी जाहेरी दिए लगत्तै अनेरास्ववियुले काउन्टर दिएको हो ।

ओली र लेखकविरूद्ध आएको जाहेरी प्रहरीले बुझेर जेनजी आन्दोलनको घटना छानबिनका लागि गठित जाँचबुझ आयोगमा पठाएको छ । जाहेरी लिएर पुगेकामध्ये तीन जनालाई छलफलका लागि प्रहरीले भित्र बोलाएको छ । २४ भदौमा जेनजी आन्दोलनको क्रममा संसददेखि सिंहदरबार र प्रहरी कार्यालयहरूमा तोडफोड र आगजनी भएको थियो ।

काठमाडौं । नेकपा एमाले अध्यक्ष तथा निवर्तमान प्रधानमन्त्री केपी शर्मा ओलीविरुद्ध किटानी जाहेरी दिने प्रयाससँगै सो पार्टीको भ्रातृ संगठन अनेरास्ववियुले काउन्टर दिने तयारी गरेको छ ।

काठमाडौं महानगरपालिकाका मेयर बालेन्द्र शाह र ‘हामी नेपाल’ का संस्थापक सुदन गुरुङविरुद्ध काउन्टर जाहेरी दिन अखिलका नेताहरू काठमाडौं प्रहरी परिसर जाने तयारीमा छन् ।

अखिलका नेताहरूको बैठकले जाहेरी दिन जाने निर्णय लिएको स्रोतले जनाएको छ । सिंहदरबार लगायत सरकारी संरचनामा आगजनी गरिएको, निजी सम्पत्ति ध्वंस गरिएको र प्रहरीहरुको हत्या गरिएकोमा बालेन र सुदनलाई आरोपित गर्दै जाहेरी दिने तयारी गरिएको हो ।

अनेरास्ववियुका महासचिव दीपक धामीले अहिले ५ बजेभित्र किटानी जाहेरी दर्ता गराउने गरीको तयारीमा रहेको जनाएका छन् । हिजो सुदन गुरुङको समूहले ओली र तत्कालीन गृहमन्त्री रमेश लेखकविरुद्ध किटानी जाहेरी दिने प्रयास गरेको थियो । तर, प्रहरीले जाहेरी दिन मानेन ।

यस विषयमा प्रधानमन्त्री सुशीला कार्कीले गृहमन्त्री ओमप्रकाश अर्यालसहित सुरक्षा निकायका प्रमुखलाई बोलाएर राति अबेरसम्म छलफल गरेकी थिइन् । प्रहरी महानिरीक्षक चन्द्रकुवेर खापुङले जाहेरी दर्ताका लागि प्रधानमन्त्रीबाटै लिखित पत्र आउनु पर्ने सुझाव दिएको बताइएको छ ।

काठमाडौं । जेनजी आन्दोलनका क्रममा सिंहदरबार परिसरमा राखिएका सवारीसाधन जलेपछि आजदेखि भारी उपकरण प्रयोग गरेर तिनलाई हटाउन प्रारम्भ भएको छ ।

आगजनीमा क्षतिग्रस्त एक हजार सवारीसाधन सडक विभागका चार वटा भारी उपकरण प्रयोग गरेर ती हटाउन थालिएको विभागले जनाएको छ । हालसम्म २०० वटा चारपाङ्ग्रे र ४०० दुईपाङ्ग्रे सवारीसाधन व्यवस्थापन गरिएको छ ।

जलेका सवारीसाधनको व्यवस्थापन नयाँ बानेश्वरस्थित अन्तर्राष्ट्रिय सम्मेलन केन्द्र परिसरमा गरिएको छ । सिंहदरबारभित्र जलेका सवारीको व्यवस्थापन पूरा भएपछि अन्य स्थानका जलेका सवारी उठाइने विभागका कर्मचारी विष्णुकुमार महर्जनले जानकारी दिए ।

काठमाडौं । संयुक्त राष्ट्रसंघको आह्वानमा शान्ति स्थापनाका लागि युनाइटेड मिसन नेसन्स मिसन इन साउथ सुडानमा (अनमिस) मा सहभागी श्रीनाथ गण शान्तिसेना १४औं डफ्फा बदली भएको छ ।

नयाँ गोरख गण शान्ति सेना १५औं डफ्फाका १७५ जना शान्ति सैनिकको टोली आज कार्यक्षेत्र दक्षिण सुडान प्रस्थान गरेको छ । श्रीनाथ गणका १७६ जना सोमबार फिर्ता भएका सैनिक जनसम्पर्क निर्देशनालयले आज जनाएको छ ।

दक्षिण सुडानमा राष्ट्रसंघीय शान्ति मिसनमा विभिन्न देशका सेनासँग नेपाली सेनाका एक हजार ७५७ जनाले समन्वय र सहकार्यका साथ शान्ति स्थापनामा क्रियाशील छन् ।

काठमाडौं । नेपालका मुख्य राजनीतिक दलभित्र सक्रिय २८ जना युवापुस्ताका नेताहरूले ‘जेनजी आन्दोलन’ लाई केवल सडक आन्दोलन नभई, सत्ता संरचना रूपान्तरणको चेतावनीको रूपमा बुझ्न आग्रह गरेका छन् । उनीहरूले पुराना नेताहरूको निरन्तरताले देशलाई दुर्घटनातर्फ लैजाने भन्दै ‘नेतृत्वको पुस्तान्तरण र दलहरूको पुनर्गठन’ को आह्वान गरेका छन् ।

नेकपा (एमाले), नेकपा माओवादी केन्द्र, एकीकृत समाजवादीलगायतका दलमा आबद्ध युवा नेताहरूले मंगलबार संयुक्त वक्तव्य जारी गर्दै जेनजी आन्दोलनको आत्मा बुझ्न नसक्नेहरू इतिहासबाट फ्याँकिने चेतावनी दिएका छन् ।

‘दलहरू चलाउने होइन, कब्जा गर्ने सोचले मुलुक असफल भयो’
वक्तव्यमा भनिएको छ, ‘राजनीतिक दलहरूलाई नेतृत्व स्थानान्तरण गर्न युवापुस्ताले पटक–पटक आग्रह गर्दै आएका थिए । तर, सत्ताको वरिपरि घुमिरहन चाहने पुराना पुस्ताले त्यो आवाज नसुन्दा अन्ततः सडक आन्दोलनको रूप लिएको हो ।’

उनीहरूको आरोप छ—केही व्यक्तिहरू पालैपालो दल र सत्ता कब्जा गरेर राजनीतिक व्यवस्था नै अपांग बनाइरहेका छन् । ‘अब पनि नसुने, नबुझे देश झन ठूलो दुर्घटनातर्फ जान सक्छ’, उनीहरूले भनेका छन् ।

‘जेनजी आन्दोलन हामीसँगको संघर्ष हो, हामीविरुद्ध होइन’
नेकपा एमालेकी नेतृ उषाकिरण तिम्सेना, अरबिन्द सिंह, अशेष घिमिरे, करूणा पराजुली, विराज थापा लगायत विभिन्न दलका युवा नेताहरूले जारी गरेको वक्तव्यमा भनिएको छ, ‘जेनजी आन्दोलनले हामीलाई गम्भीर आत्ममूल्यांकन गर्न बाध्य पारेको छ । यो आन्दोलनले सन्देश दिएको छ, ‘अब ‘राजनीतिक अवसरवादिता’ को दिन सकियो ।’

उनीहरूले आन्दोलनमा भएका केही तोडफोडजन्य गतिविधिहरूको भर्त्सना गर्दै जेनजी प्रतिनिधिहरूले मागेको निष्पक्ष छानबिन आयोगको समर्थन समेत गरेका छन् ।

‘अर्को चुनाव पुरानै अनुहारहरूसँग भयो भने विश्वासको संकट झन गहिरिन्छ’
उनीहरूका अनुसार, नयाँ निर्वाचनमा युवाहरूको प्रतिनिधित्व सुनिश्चित नहुने हो भने त्यो लोकतान्त्रिक प्रक्रियाको कमजोर पक्ष बन्ने छ । ‘युवापुस्ताले अब आफूलाई नेतृत्वमा उभ्याउनु पर्ने बेला आएको छ । यसका लागि हामी नयाँ पुस्ताको राजनीतिक हस्तक्षेपलाई संस्थागत बनाउनेतर्फ लाग्नु पर्छ’, उनीहरूद्वारा भनिएको छ ।

‘दलहरूको पुनर्गठन अब ढिलो गर्नु आत्मघाती हुन्छ’
वक्तव्यमा भनिएको छ, ‘राजनीतिक अस्थिरता बढाउने शक्तिहरू सक्रिय भइरहेका बेला दलहरू अझै पनि पुरानै नेतामै अडिग हुनु आत्मघाती हुनेछ । दलभित्रको दोस्रो र तेस्रो तहका नेताहरूले अब बोल्नु पर्छ, उठ्नु पर्छ र नेतृत्वको जिम्मेवारी लिनुपर्छ ।’

बागलुङ । बागलुङका धेरैसजो ग्रामीण क्षेत्र बसाइँसराइका कारण सुनसान बन्दै गएका छन् । बसाइँसराइले गाउँ मात्रै सुनसान भएका छैनन् धान, गहुँ र मकै फल्न खेतीयोग्य जमिन पनि बाँझिने क्रम बढेको छ । कतै सिउँडी पलाएका छन्, त कतै बनमाराले ढाकिएका छन् । घर पनि रुग्ण बनेका छन् ।

काठेखोला गाउँपालिका तथा जैमिनी र गलकोट नगरपालिकामा बसाइँसराइ गरे सहर बजार झर्नेको संख्या अत्यधिक छ । गाउँमा बूढापाका र बालबालिका मात्रै छन् । युवा शक्ति विदेश पलायन भइरहेको छ । यही कारणले बर्सेनी जमिन बाँझोमा परिणत हुँदैछ ।

यसले उत्पादनमा असर परेको छ । बागलुङमा कूल एक लाख ७८ हजार ४०६ हेक्टर जमिन रहेको छ । त्यसमध्ये ४६ हजार १४८ हेक्टर जमिनमा खेती गर्न सकिन्छ । हाल ३० हजार ५०३ हेक्टर जमिनमा मात्रै खेती भइरहेको कृषि ज्ञान केन्द्रका सूचना अधिकारी सन्तोष अधिकारीले जानकारी दिए ।

कूल जमिनको २५ प्रतिशत मात्रै खेतीयोग्य जमिन रहेकामा अहिले १७ प्रतिशत जमिनमा मात्र खेती हुने गरेको छ । बागलुङमा १५ हजार ६४५ हेक्टर जमिन बाँझो रहेको र आगामी वर्ष अझै घट्ने देखिएको अधिकारीले बताए । ‘जिल्लामा १४ हजार ६२५ हेक्टर जमिन बाँझो छ, एक हजार २० हेक्टर जमिनमा खती नगरी अन्य प्रयोगका लागि प्रयोग भएको छ’, उनले भने ।

जैमिनी–४ की देवी शर्माले काम गर्ने व्यक्तिको अभावले आफ्नो ८० प्रतिशत बारी झाडीमा परिणत भएको बताइन् । पहिला २० मुरी धान, २२ मुरी मकै र कोदो उत्पादन गरेको सम्झिँदै उनले भनिन्, ‘पैसा दिएर पनि खनजोत गर्ने खेताला पाइन छाडे ।’ काठेखोला–८ लेखानीका मेघराज कँडेलले पछिल्लो १० वर्षमा गाउँको आधाभन्दा बढी खेतीयोग्य जमिन बाँझो बनेको बताए । गाउँमा बूढाबूढी मात्रै रहेकाले काम गर्न नसक्दा खेतीयोग्य जमिन बाँझो बनेको उनको भनाइ छ ।

काठमाडौं । प्रतिनिधि सभा विघटन गरी नयाँ निर्वाचन मिति घोषणा भएपछि नेपाली कांग्रेस र एमाले सर्वोच्च अदालतमा जाने भएका छन् ।प्रधानमन्त्री सुशीला कार्कीको सिफारिसमा भदौ २७ गते शुक्रबारबाट प्रतिनिधि सभा विघटन गरिएकाले बदरको माग गर्दै सर्वोच्च अदालतमा जानका लागि नेकपा एमाले र कांग्रेस आन्तरिक छलफलमा जुटेका हुन् ।

आउँदो निर्वाचन २०८२ साल फागुन २१ गते गर्ने गरी सोमबार निर्वाचन आयोगले कार्यतालिका सार्वजनिक गरेको छ । तर, नेकपा एमालेको प्रचार विभागका प्रमुख राजेन्द्र गौतम प्रतिनिधिसभाको विघटन असंवैधानिक भएकाले संविधान र लोकतन्त्र रक्षाका लागि दलहरुबीच छलफल हुनु स्वभाविक भएको बताउँछन् । गौतमले असंवैधानिक तबरले प्रतिनिधि सभा विघटन भएकाले त्यसविरुद्ध अदालत जान छलफल चल्नु स्वभाविक भएको बताए ।

‘कांग्रेस र एमालेबीच सर्वोच्च अदालतमा जानका लागि छलफल भइरहेको छ । यो स्वभाविक पनि हो । दुई दलबीच छलफल गरेर सहमतिका आधारमा दलहरुलाई साथमा अगाडि बढ्छौं । कानुन व्यवसायीसँग पनि परामर्श गर्छौं’, गौतमले भने, ‘संविधान पक्षधर दलहरूसँग अन्य दलसँग पनि कुरा भइरहेको छ ।’

गौतमले दलहरुबीच सहमति भएर निष्कर्ष निकालेपछि कुन दिने अदालत जाने भन्ने विषय टुंगिने बताएका छन् । उनका अनुसार अदालत जाने मोडेलको विषय भने टुंगिन बाँकी छ । गौतमले भने, ‘अहिले हामी छलफलको चरणमा नै छौं । कसरी जाने, कहिले जाने भन्ने निष्कर्ष निकालेपछि बाँकी काम अगाडि बढ्छ ।’

जेनजी आन्दोलन र त्यसपछिको प्रदर्शनमा भएको तोडफोड तथा आगजनीका कारण सर्वोच्च अदालत, विशेष अदालत र जिल्ला अदालतहरूमा क्षति पुगेको छ। हाल सर्वोच्च अदालतले बन्दीप्रत्यक्षीकरण सुनुवाइ मात्र सुरु गरेको छ । सर्वोच्च अदालतले सर्भरको समस्याले गर्दा नियमित पेशीको काम कारबाही गर्न अझै समय लाग्ने जनाएको छ ।

यस अगाडि नेपाली कांग्रेस, नेकपा एमाले, माओवादी केन्द्रसहित ८ दलले वर्तमान प्रतिनिधि सभा विघटनबारे राष्ट्रपति कार्यालयबाट जारी भएको विज्ञप्तिप्रति गम्भीर ध्यानाकर्षण र असहमति रहेको जनाएका थिए । उनीहरुले प्रतिनिधि सभा विघटन गरिएको भनिएको निर्णय फिर्ता लिई तत्काल संसदको बैठक बोलाई जनता र आन्दोलनरत समूहको माग जननिर्वाचित संस्थाबाटै सम्बोधन हुने वातावरण सिर्जना गर्न उनीहरूको माग थियो ।

पोखरा । गण्डकी प्रदेशका मुख्यमन्त्री निवासमा भएको आगजनी घटनामा संलग्न रहेको आरोपमा प्रहरीले एक युवकलाई पक्राउ गरेको छ ।आगजनीको आरोपमा रुपन्देही घर भई हाल पोखरामा बसोबास गर्दै आएका २२ वर्षीय संजोक थापालाई पक्राउ गरिएको जिल्ला प्रहरी कार्यालय कास्कीले जनाएको छ ।

गत भदौ २४ गते जेनजी समूहको आन्दोलनका क्रममा मुख्यमन्त्री निवासमा आगजनी भएको थियो । त्यसपछि असोज १२ गते पुनः दोस्रो पटक आगजनी भएको घटनामा थापा संलग्न रहेको प्रहरीको दाबी छ । जिल्ला प्रहरी कार्यालय कास्कीका सूचना अधिकारी डिएसपी हरिबहादुर बस्नेतका अनुसार थापालाई नियन्त्रणमा लिएर थप अनुसन्धानको काम भइरहेको छ ।

थापाले राष्ट्र बैंकको कम्पाउण्ड सडक छेउमा रहेको एनआइएमबी बैंकको एटिएम मेशिन ढुङ्गाले प्रहार गरी तोडफोड समेत गरेको कास्की प्रहरीका सूचना अधिकारी डिएसपी हरिबहादुर बस्नेतले जानकारी दिएका छन् ।

काठमाडौं । सरकारले केहि दिनअघिको बाढी–पहिरोबाट घर गुमाएकालाई तत्काल अस्थायी बसोबासको व्यवस्था मिलाउने भएको छ ।

राष्ट्रिय विपद् जोखिम न्यूनीकरण तथा व्यवस्थापन राष्ट्रिय परिषद्को बैठकपछि आयोजित पत्रकार सम्मेलनमा सरकारले यस्तो जानकारी गराएको हो । सरकारले बाढी–पहिरो प्रभावितलाई तत्काल राहत रकम पनि उपलब्ध गराउने भएको छ ।

बाढी–पहिरोबाट कसैको घरभत्केको पाइएमा सरकारले तत्काल अस्थायी आवासमा सार्ने र दीर्घकालीन रूपमा स्थायी आवासको व्यवस्था मिलाउने निर्णय बैठकले गरेको हो । अस्थायी आवासका लागि विपद् प्राधिकरणबाट ५० हजार रुपैयाँ उपलब्ध गराइने छ । सो रकममध्ये २५ हजार रुपैयाँ तत्काल र २५ हजार रुपैयाँ एक लेबल घरको संरचना बनेपछि मापदण्ड अनुसार उपलब्ध गराउने निर्णय बैठकले गरेको छ ।

काठमाडौं । अमेरिकी संस्थाले नेपालमा युवाहरूलाई राजनीतिक रूपमा प्रयोग गरेर चीन र भारतको प्रभाव घटाउने प्रयास गरेको खुलासा भएको छ ।

द सन्डे गार्जियनले अक्टोबर ५ मा प्रकाशित गरेको रिपोर्टअनुसार, अमेरिकास्थित इन्टरनेशनल रिपब्लिकन इन्स्टिच्युटका आन्तरिक कागजातहरूले अमेरिकाले गोप्य रूपमा नेपाली युवाको राजनीतिक सक्रियतासम्बन्धी योजना सञ्चालन गरेको देखाएका छन् ।

‘युवा नेतृत्व : पारदर्शी नीति (युथ लिडरशिप एण्ड ट्रान्सपेरेण्ट पोलिसी)’ नाम दिइएको उक्त योजना अमेरिकाको नेशनल एन्डोमेन्ट फर डेमोक्रेसी (एनईडी) को ३ लाख ५० हजार अमेरिकी डलर बराबरको कोष सहयोगमा सञ्चालन गरिएको थियो ।

रिपोर्टअनुसार, उक्त योजनाको सतही उद्देश्य युवाको राजनीतिक सहभागिता बढाउने, शासन प्रणाली पारदर्शी बनाउने र युवाका सरोकारका विषयमा ध्यान केन्द्रित गर्ने जस्तो देखिए पनि, वास्तविक उद्देश्य भने नेपालमा अमेरिकाप्रति अनुकूल युवा नेतृत्व विकास गरी चीन र भारतको प्रभाव घटाउने थियो ।

रिपोर्ट अनुसार, यो योजना सन् २०२१ जुलाईदेखि २०२२ जुनसम्म सञ्चालन गरिएको थियो । यसअन्तर्गत १८ देखि ३५ वर्ष उमेर समूहका युवाहरूलाई राजनीतिक प्रशिक्षण, आन्दोलन र विरोधका रणनीति, डिजिटल मिडियाको प्रभावकारी प्रयोग जस्ता सीपहरू सिकाइएका थिए । योजनाको कार्यान्वयनका क्रममा अमेरिकाले नेपालको सलुसन कन्सल्टेन्ट प्रालिसँग सम्झौता गरी युवाको राजनीतिक सहभागिता सम्बन्धी अनुसन्धान गराएको थियो । उक्त अनुसन्धानमा हुवावे र जेटिइ जस्ता चिनियाँ कम्पनीका उपकरणहरू प्रयोग नगर्न स्पष्ट निर्देशन दिइएको पनि कागजातमा उल्लेख छ ।

रिपोर्टले जनाएअनुसार, यो परियोजना श्रीलंका लगायतका देशहरूमा आईआरआईले अघि सारेको ‘इमर्जिङ लिडर एकेडेमी’ को मोडलमा आधारित थियो । त्यस मोडलमार्फत अमेरिकाले स्थानीय युवाहरूको सञ्जाल निर्माण गरी राजनीतिक नेतृत्वमा प्रभाव पार्ने रणनीति अपनाएको बताइएको छ ।

इजरायली साइबर खुफिया कम्पनी ‘सायब्रा’ द्वारा गरिएको अनुसन्धानमा नेपालका हालैका ‘जेनेरेसन जेड’ आन्दोलनमा पनि बाह्य हस्तक्षेपको सम्भावना देखिएको उल्लेख छ । सायब्रा अनुसार, सो आन्दोलनसँग सम्बन्धित झण्डै ३४ प्रतिशत सोशल मिडिया गतिविधि नक्कली खाताहरूबाट सञ्चालन गरिएको देखिएको छ ।

द सन्डे गार्जियनको दाबी अनुसार, अमेरिकाले नेपालमा युवा नेतृत्वको नाममा गोप्य राजनीतिक अभियान सञ्चालन गरेर आफ्नो रणनीतिक स्वार्थका लागि प्रयोग गरेको देखिन्छ । नेपालमा लोकतन्त्र र युवाको राजनीतिक भूमिकामा यस किसिमको बाह्य हस्तक्षेपले स्वाधीनता र राजनीतिक स्थायित्वमा चुनौती निम्त्याउन सक्ने विशेषज्ञहरूको चेतावनी समेत उद्धृत गरिएको छ ।

काठमाडौ । गत १७ देखि १९ गतेसम्म परेको अलिरल वर्षा र त्यसपछिको बाढी, पहिरो र अन्य विविध कारणबाट ६२ जनाको ज्यान गएको छ। सरकारी तथ्यांकअनुसार कोशी, मधेश, बागमतीमा बाढी र पहिरोबाट ४६ जनाको मृत्यु भएको हो । यीबाहेक १६ जनाको अन्य विविध कारणबाट मृत्यु भएको छ ।

इलाममा बाढी–पहिरोमा परी मृत्यु हुनेको संख्या ३९ पुगेको छ । इङ्लाखोलाले बगाएर बेपत्ता भएका सन्दकपुर–५ इङला, जमुनाका २४ वर्षीय प्रवेश गुरूङको शव फेलापछि मृतकको संख्या ३९ पुगेको हो । सन्दकपुर–५ इङलाका वडा सदस्य कुमार गुरुङका अनुसार प्रवेश अस्तीदेखि बेपत्ता थिए ।

उनको स्वीटर र हाइनेक मात्र भेटिएको थियो । त्यस स्थानबाट करिब ४०० मिटर तल आज उनको शव फेला परेको वडा सदस्य गुरुङले जानकारी दिएका छन् । योसँगै इलाममा मृत्यु हुनेको संख्या ३९ पुगेको हो । एक जना बेपत्ता छन् । इलाम नगरपालका–६ का महेन्द्र लिम्बु बेपत्ता छन् । उनलाई पहिरोले घरसहित बगाएको थियो ।

काठमाडौं । पाकिस्तानका प्रधानमन्त्री शेहवाज सरिफले हालैको बाढी–पहिरोबाट भएको जनधनको क्षतिप्रति गहिरो दुःख व्यक्त गर्दै शोकाकूल परिवारजनमा हार्दिक समवेदना व्यक्त गरेका छन् ।

‘नेपालमा बाढी र पहिरोबाट भएको जनधनको व्यापक क्षतिबाट म ज्यादै दुःखी छु । म शोकसन्तप्त परिवारप्रति हार्दिक समवेदना व्यक्त गर्दछु। यो कठिन क्षणमा पाकिस्तान सरकार र जनता नेपाल सरकार र नेपाली जनताका साथमा छन्’, सामाजिक सञ्जाल एक्समा उनले लेखेका छन्।

काठमाडौं । जेनजी अलायन्सको टोली अख्तियार दुरूपयोग अनुसन्धान आयोगका प्रमुख आयुक्त प्रेमकुमार राईको राजीनामा माग गरिएको निवेदन दर्ता गरी फर्किएको छ ।

आज (मंगलबार) बिहान अलायन्सका पाँच प्रतिनिधि अख्तियारको कार्यालय टंगालमा पुगेर राजीनामा माग गरिएको निवेदन दर्ता शाखामा दर्ता गरी फर्किएका हुन् । दर्ता गर्न अमित खनाल, रिजन राना मगर, मोनिका निरौला, हेम चौधरी र पेमा लामा पुगेका थिए ।

उक्त अलायन्सले सोमबार प्रेस विज्ञप्ति जारी गरी राईको स्वेच्छिक राजीनामाको माग गरेको थियो । तत्कालीन केपी शर्मा ओली नेतृत्वको सरकारले संसदीय सुनुवाइ नगरी प्रेम राईलाई नियुक्त गरिएको र विभिन्न मुद्दामा समेत मुछिएको आरोप लगाउँदै राजीनामाको माग गरेको छ ।

राईको नाम नेपाल आयल निगमनको जग्गा खरिद प्रकरण, नक्कली भुटानी शरणार्थी प्रकरण र वाइडबडी खरिद प्रकरणमा मुछिएको आरोप छ । आयोगका पदाधिकारीलाई पदबाट हटाउन महाअभियोग लगाउनु पर्छ। जसका लागि संसदको आवश्यकता छ । संसद नभएको अवस्थामा उक्त काम सम्भव नरहेको भन्दै राजीनामाको माग गरेको विज्ञप्तिमा उल्लेख छ ।