Author: nepalone

काठमाडौं । जेन–जी अगुवा रक्षा बमले रौतहटमा राष्ट्रिय स्वतन्त्र पार्टी (रास्वपा)का उम्मेदवारको प्रचारमा प्रयोग गरिएको गाडीले एक चार वर्षीया बालिकालाई ठक्कर दिएको र उनको ज्यान गएको घटनामा सत्य ढाकछोप गर्ने प्रवृत्ति देखिएको भन्दै कडा आलोचना गरेकी छिन् ।

रास्वपा नेता, कार्यकर्ता र समर्थकहरूप्रति लक्षित गर्दै उनले अपराधलाई अपराधकै रूपमा हेर्नुपर्ने र दोषीलाई राजनीतिक संरक्षण दिन नहुने स्पष्ट पारेकी छन् ।

बमले कुनै पनि राजनीतिक दलमा आवद्ध हुँदैमा सत्यलाई गलत र गलतलाई सही साबित गर्ने प्रवृत्ति न्यायका लागि खतरनाक भएको बताएकी छन् । ‘ सहीलाई सही र गलतलाई गलत भन्न सक्ने नैतिक साहस बिना राजनीति होइन, केवल अन्धभक्ति मात्रै बाँकी रहन्छ,’ उनले स्टाटसमा भनेकी छन् ।

नेकपा एमालेका कोशी प्रदेशका मन्त्री राम राना सवार गाडीले ललितपुरमा एक बालिकालाई ठक्कर दिएको घटनालाई लिएर अध्यक्ष केपी शर्मा ओलीले दिएको अभिव्यक्तिले त्यसबेला आक्रोशित बनाएको भन्दै बमले रौतहटमा नाबालिका मारिएको घटनामा रास्वपा नेताहरूबाट आएको अभिव्यक्तिले पनि त्यस्तै बनाएको बताएकी छिन् ।

उनले आज फेरि त्यस्तै गल्ती दोहोरिएको बताइन् । उनले ठक्कर दिने गाडीका चालकलाई कारबाही हुनुपर्ने माग राखेकी छन् ।

‘याद राख्नुहोस् साथीहरू, तपाईंको मनपर्ने पार्टी होस् वा मनपर्ने नेता, अपराध भनेको अपराध नै हो । कसुर अनुसार कारबाही हुन्छ, हुनैपर्छ,’ उनले जोड दिएकी भनिन् ।

सरकारले घटनालाई गम्भीरतापूर्वक लिनुपर्ने भन्दै उनले राजनीतिक खोल ओढेर दोषिलाई उन्मुक्ति दिन काम नगर्न चेतावनी दिएकी छन् ।

नाबालिकालाई ठक्कर दिएको सीसीटीभी फुटेज यतिबेला भाइरल छ, जहाँ घुम्ती सडकमा बायातिरबाट नाबालिका आएको देखिन्छ । तीब्र गतिको रास्वपा उम्मेदवारको प्रचारमा प्रयोग भएको गाडीले ठक्कर दिन्छ ।

पछाडिको टायरले नाबालिकालाई पेलेको देखिन्छ । लगत्तै सडक किनारामा बसिरहेका मानिसहरू आएर नाबालिकालाई उद्धार गर्छन् । तर, उनको मृत्यु भइसक्छ ।

यही भिडियो हेरेर यतिबेला रास्वपा नेताहरूको आलोचना भइरहेको छ । रास्वपा समर्थक र अन्यबीच सामाजिक सञ्जालमा घोचपेज चलिहरेको छ ।

भिडियो सार्वजनिक भएपछि रास्वपा महामन्त्री कविन्द्र बुर्लाकोटीले शुक्रबार घटनाले स्तब्ध भएको भन्दै पीडित परिवारलाई आर्थिक सहायता उपलब्ध गराउने बताएका छन् ।

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछाने, श्रीमती निकिता पौडेलसहित उक्त दलबाट चितवनको तीनवटै निर्वाचन क्षेत्रमा उम्मेदवार बनेका नेताहरूसामु हिन्दु धर्मगुरुले प्रकट गरेको विचार यतिबेला सामाजिक सञ्जालहरूमा भाइरल छ ।

भिडियो बुधबार खिचिएको हो । ती हिन्दु धर्मगुरुले प्रकट गरेको विचारका आधारमा उनी नेपालमा राजा चाहन्छन् । देश फेरि हिन्दुराष्ट्र भएको देख्न चाहन्छन् । अर्थात् उनी राप्रपाका कट्टर समर्थक धर्मगुरु हुन् । किनभने यी दुवै एजेण्डा नेपालको राजनीतिमा राप्रपाले बोकेको छ ।

तर, रास्वपाको घोषणापत्र र अन्य राजनीतिक दस्तावेजले ती धर्मगुरुले भने जसरी देशमा राजा र हिन्दुराष्ट्र पुनःस्थापनाको एजेन्डा बोल्दैन ।

ती हिन्दु धर्मगुरुले प्रष्टै भनेका छन्, ‘नेपालमा कमसेकम हिन्दुराष्ट्र कायम हुनुपर्छ भन्ने आवाज छ । राजासहितको प्रजातन्त्र हुनुपर्छ भन्ने जनताको आवाज छ ।

धर्मसापेक्ष हुनुपर्ने आवाज छ । त्यसो हुनाले तपाईंले यस्तो कुरालाई बुझेर, मनन गरेर । अहिलेसम्म धेरै कुरा गरेँ, कुनै पार्टीले हिन्दुराष्ट्र भन्न नसक्नु, हिन्दु हाम्रो वैदिक सनातनदेखि चलेको धर्म हो यो, धर्म मेटिए केही पनि छैन ।

त्यसो हुनाले यसलाई तपाईंले अगाडि बढाउने हो भने तपाईंप्रति आशा छ र तपाईंले अगाडि बढाउनुहोला । जनता उत्साहजनक छन् ।

धर्म गुरुले देशलाई हिन्दुराष्ट्रसँगै राजतन्त्रात्मक देश बनाउन सुझाउँदा रास्वपा सभापति लामिछाने पूरै हँसमुख देखिए । घरीघरी मुन्टो हल्लाउँदै उनले मौन स्वीकृति जनाएको सन्देश प्रवाह गरे ।

लामिछानको दल रास्वपा घोषणापत्रको आधारमा ‘धर्मनिरपेक्षपन्थी’ हो । तर, दलको घोषणा गरेको स्थल ‘पाशुपत’ क्षेत्र र चुनाव चिह्न ‘घण्टी’ हुँदा हिन्दुराष्ट्र पुनःस्थापनातिर दलीय झुकाव रहेको कतिपयको टिप्पणी हुने गरेको छ ।

उसो त २०७८ को जनगणनाअनुसार नेपालको कुल जनसंख्या २ करोड ९१ लाख ६४ हजार ५७८ मध्ये सबभन्दा धेरै २ करोड ३६ लाख ७७ हजार ७४४ जना (८१.१९ प्रतिशत)ले हिन्दु धर्म मान्छन् ।

भलै यो तथ्याङ्कलाई आदिवासी जनजाति समुदायले मिथ्याङ्क भन्छन् । तर, बहुसंख्यक हिन्दु धर्मावलम्बी जनमत नेपालमा छ । त्यसो हुँदा रास्वपा सभापति लामिछानेले मौन स्वीकृति जनाएर कतै हिन्दु धर्मावलम्बीहरूको मत तान्ने रणनीति त अपनाएको होइन ? टिप्पणी भइरहेको छ ।

पछिल्ला निर्वाचनहरूको मत विश्लेषण गर्ने हो भने कट्टर हिन्दु धर्मावलम्बी मतदाताहरूले नेपाललाई हिन्दुराष्ट्र र राजतन्त्रात्मक व्यवस्थामा लान सक्ने विश्वाशिलो दलको खोजी गरिरहेका छन् ।

यो मनोभावना बुझेर लामिछाने आफ्ना उम्मेदवारहरूसहित मन्दिर गएको देखिएको छ ।

काठमाडौं । बैतडीमा जन्ती लिएर फर्किँदै गरेको बस दुर्घटना हुँदा आठ जनाको मृत्यु भएको छ ।

जिल्लाको पुर्चौडी नगरपालिका –७ को भौनीबाट जन्ती लिएर फर्किँदै गरेको बस सोही वडाको बढ्गाउँ मोडबाट दुई सय मिटर तल खसेको थियो ।

जिल्ला प्रहरी कार्यालय बैतडीका प्रहरी प्रवक्ता बलदेव बडूले दिएको जानकारी अनुसार ६ जनाको घटनास्थलमै र अन्य दुई जनाको स्थानीय स्वास्थ्य चौकीमा उपचारका क्रममा मृत्यु भएको हो ।

मृतकमध्ये एक जना महिला र सात जना पुरुष छन् । मृत्यु हुनेमा बझाङको बित्थडचिर गाउँपालिका–७ बस्ने ४० वर्षीय केशव जोशी, सोही ठाउँका १३ वर्षीय अशोक जोशी, ३५ वर्षीय वसन्त जोशी, ४१ वर्षीय विष्णुदत्त जोशी र ४२ वर्षीय नरेशराज जोशी रहेका छन् ।

केदारस्युँ गाउँपालिकाका ६० वर्षीय मोहनदेव भट्ट, जयपृथ्वी नगरपालिकाका–७ का वसन्तराज रतला र बैतडीको पुर्चौडी नगरपालिका–७ कि ४० वर्षीया पुष्पा अवस्थी रहेका छन् ।

दुर्घटना भएको सुप प्र ०२ ००१ ख १११९ नम्बरको बस हो । दुर्घटनामा ४५ जना घाइते भएका छन् । उनीहरूको उद्धार भइरहेको प्रहरीले जनाएको छ ।

जन्ती बेहुली लिएर बझाङको सुनकुडातर्फ फर्किंदै थियो । उकालो बाटोमा भार अधिक हुनाले दुर्घटना भएको हुन सक्ने प्रहरीले आशंका गरेको छ । प्रहरीले घटनाको अनुसन्धान गरिरहेको छ ।

घटनाप्रति पूर्वप्रधानमन्त्री शेरबहादुर देउवाले दुःख व्यक्त गरेका छन् । उनले दुर्घटनाको खबरले दुःखी भएको बताए ।

‘बैतडीको पुर्चौडीबाट जन्ती बोकेर बझाङतर्फ जाँदै गरेको बस स्थानिय बडुगाउँमा दुर्घटनाग्रस्त भएको खबरले निकै दुखि भएको छु,’ उनले सामाजिक सञ्जाल फेसबुकमा भने, ‘दुर्घटनामा ज्यान गुमाएकाहरूप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गर्दछु ।’

उनले घाइतेहरूको तत्काल उद्धार गरी आवश्यकता अनुसारको उपचारको प्रबन्ध गर्न सरकारको ध्यानकर्षण गराए ।

अर्का पूर्वप्रधानमन्त्री तथा नेकपा संयोजक पुष्पकमल दाहालले पनि बैतडी दुर्घटनाप्रति दुःख व्यक्त गर्दै आफू मर्माहत भएको बताए ।

‘बैतडीको पुर्चौैडीबाट बझाङतर्फ गइरहेको जन्ती बोकेको बस बडुगाउँमा दुर्घटनाग्रस्त भई ठूलो मानवीय क्षति भएको दुःखद खबरले म अत्यन्तै मर्माहत बनेको छु,’ उनले भने, ‘जिल्ला प्रशासनसँग सम्पर्क गर्दा मृतक तथा घाइतेहरूको संख्या अझै यकिन हुन सकेको छैन भन्ने जानकारी प्राप्त भएको छ ।’

उनले मृतकहरूप्रति श्रद्धाञ्जली अर्पण गर्दै शोकसन्तप्त परिवारजनप्रति समवेदना व्यक्त गरे ।

घाइतेहरूको शीघ्र स्वास्थ्यलाभको कामना गर्दै उद्धार, उपचार तथा आवश्यक समन्वयका लागि बैतडीस्थित नेकपाको समितिलाई आवश्यक पहल लिन निर्देशन दिए ।

काठमाडौं । जन्ती लिएर फर्किँदै गरेको बस दुर्घटना हुँदा आठ जनाको मृत्यु भएको छ ।

बैतडीको पुर्चौडी नगरपालिका –७ को भौनीबाट जन्ती लिएर फर्किँदै गरेको बस सोही वडाको बढ्गाउँ मोडबाट दुई सय मिटर तल खसेको थियो ।

जिल्ला प्रहरी कार्यालय बैतडीका अनुसार ६ जनाको घटनास्थलमै र अन्य दुई जनाको स्थानीय स्वास्थ्य चौकीमा उपचारका क्रममा मृत्यु भएको हो ।

दुर्घटना भएको सुप प्र ०२ ००१ ख १११९ नम्बरको बस हो ।

दुर्घटनामा ४५ जना घाइते भएका छन् । उनीहरूको उद्धार भइरहेको प्रहरीले जनाएको छ । जन्ती बेहुली लिएर बझाङको सुनकुडातर्फ फर्किंदै थियो ।

काठमाडौं । नेपाली श्रमजीवी पत्रकारहरूको नेतृत्वदायी संगठन प्रेस चौतारी नेपाल २८ वर्षमा प्रवेश गरेको छ ।

‘समृद्धिका लागि सञ्चार, प्रेस चौतारीको आधार’ भन्ने मूल मन्त्रका साथ अघि बढिरहेको संगठनले २८ वर्ष पुगेको अवसरमा पत्रकारिताको व्यावसायिकता, प्रेस स्वतन्त्रता र जनपक्षीय भूमिकालाई अझ सुदृढ बनाउने प्रतिबद्धता व्यक्त गरेको छ ।

स्थापना दिवसका अवसरमा अध्यक्ष गणेश पाण्डेले विज्ञप्ति जारी गरी प्रेस चौतारी नेपाल अग्रजहरूको संघर्ष, त्याग र बलिदानका कारण आज श्रमजीवी तथा व्यावसायिक पत्रकारहरूको सबैभन्दा भरोसायोग्य संगठनका रूपमा स्थापित भएको उल्लेख गरेका छन् ।

अध्यक्ष पाण्डेले संस्थापक अध्यक्ष स्वर्गीय विजय चालिसे, संस्थापक अग्निशिखासहित संगठनको हितमा योगदान पुर्‍याउँदै जीवन गुमाएका सबै व्यक्तित्वहरूप्रति श्रद्धाञ्जली अर्पण  गरे ।

साथै पूर्वअध्यक्षहरू शम्भु श्रेष्ठ, डा. बालकृष्ण चापागाईँ, गगन विष्ट, राजेन्द्र अर्याल, निवर्तमान अध्यक्ष गणेश बस्नेतलगायत सम्पूर्ण संस्थापक सदस्य, अग्रज, पूर्वपदाधिकारी र सदस्यहरूप्रति सम्मान व्यक्त गरेका थिए ।

शुभकामना सन्देशमा संगठनलाई निरन्तर सक्रिय र गतिशील बनाइराख्न भूमिका खेलेका केन्द्रीय समिति, आयोग, प्रदेश, जिल्ला तथा नगर समितिका पदाधिकारी तथा सदस्य, शुभेच्छुक, समर्थक र सञ्चार क्षेत्रका सरोकारवालाप्रति आभार व्यक्त गरिएको छ ।

प्रेस चौतारी नेपालले स्थापनाकालदेखि नै राष्ट्रिय स्वाधीनता, लोकतन्त्र, प्रेस स्वतन्त्रता, व्यावसायिक मर्यादा र जनपक्षीय पत्रकारिताको स्पष्ट मार्गरेखा तय गर्दै यात्रा अघि बढाउँदै आएको अध्यक्ष पाण्डेको भनाइ छ ।

बदलिँदो राजनीतिक, सामाजिक र प्रविधिगत परिवेशमा पत्रकारितामाथि चुनौती बढ्दै गएको उल्लेख गर्दै उहाँले गलत सूचना, अफवाह र नियोजित भ्रमविरुद्ध सत्य र तथ्यमा आधारित पत्रकारिताको भूमिका अझ महत्त्वपूर्ण बनेको बताए ।

यही सन्दर्भमा २०८२ साललाई प्रेस चौतारी नेपालले ‘प्रशिक्षण वर्ष’ का रूपमा मनाउने निर्णय गरेको जानकारी पनि सन्देशमा दिइएको छ । युवा पत्रकारहरूको सशक्तीकरण, संगठनको संस्थागत सुदृढीकरण र जनविश्वास अभिवृद्धिलाई प्राथमिकतामा राखेर कार्यक्रम अघि बढाइने अध्यक्ष पाण्डेले स्पष्ट पारे ।

देशको समसामयिक राजनीतिक अवस्थाप्रति ध्यानाकर्षण गर्दै सन्देशमा भूराजनीतिक दबाब र प्रतिनिधिसभा निर्वाचनको अन्योलबिच सही पक्षमा दृढतापूर्वक उभिनुपर्ने आवश्यकता औँल्याइएको छ । यस्तो अवस्थामा प्रेस चौतारी नेपालले साहस, अनुशासन र परिणाममुखी भूमिकालाई आत्मसात् गर्नुपर्ने अध्यक्ष पाण्डेको आग्रह छ ।

यसैबिच निर्वाचन आचारसंहिता र निर्वाचन आयोगको सुझावअनुसार यस वर्ष केन्द्रीय समितिबाट प्रदान गरिँदै आएका पुरस्कार फागुन २१ गतेपछि मात्रै वितरण गरिने जानकारी पनि प्रेस चौतारी नेपालले दिएको छ । संगठनले हरके वर्ष विभिन्न विधामा पत्रकारिता पुरस्कार दिँदै आएको छ ।