Author: nepalone

काठमाडाैँ – राष्ट्रिय स्वतन्त्र पार्टी (रास्वपा)का सभापति रवि लामिछानेको राहदानीविरुद्ध परेको जाहेरी प्रहरीले दर्ता गर्न अस्वीकार गरेको छ।

प्रहरी स्रोतका अनुसार रविकाे नागरिकता विवादमा सर्वोच्च अदालतले गरेको फैसलाको पूर्णपाठ नआइसकेकाले यो जाहेरी दर्ता नगरिएको हो।

खारेज भएको नागरिकताका आधारमा राहदानी लिएको भन्दै युवराज पौडेल (सफल) मंगलबार दिउँसाे जाहेरी लिएर काठमाडौं प्रहरी परिसर पुगेका थिए।

उनले नेपाल नागरिकता ऐन २०६३ को दफा १०(१)अन्तर्गत कायम नरहेको नागरिकता प्रयोग गरेर रविले अमेरिकी नागरिक भएको समयमा नेपाली राहदानी लिई अध्यागमन ऐन, २०४९ को दफा ५ बिपरितको दण्डनीय कार्य गरेको भन्दै अध्यागमन ऐन, २०४९ को दफा १० बमोजिम कारबाहीको माग गरेका थिए।

विराटनगर – नेकपा एमालेका स्थायी कमिटी सदस्य एवं प्रदेश नं १ का इन्चार्ज देवराज घिमिरे सभामुखमा निर्वाचित भएपछि रिक्त भएको इन्चार्जको पद हत्याउन नेताहरूले लबिङ तीव्र पारेका छन् ।

एमालेको १० औँ महाधिवेशनपछि घिमिरेलाई प्रदेश नं १ को इन्चार्जको जिम्मेवारी दिइएको थियो । पदीय जिम्मेवारीका कारण घिमिरेले पार्टीका सबै पदबाट राजीनामा गरेपछि प्रदेश नं १ को भूगोलमा रहेका ६ जना नेताहरूले आफू इन्चार्ज हुन पाउनु पर्ने भन्दै नेताहरूसँग लबिङ बढाएका हुन् ।

प्रदेश नं १ मा रहेका ९ जना स्थायी कमिटी सदस्य मध्ये हिक्मत कार्की मुख्यमन्त्री र अग्नि खरेल झापा जिल्ला इन्चार्ज हुनुहुन्छ । हालका प्रदेश सहइन्चार्ज मध्ये विनोद ढकाल र जीवन घिमिरे पोलिटब्युरो सदस्य हुन् । उहाँहरू दुवै जनाको दाबी नपुग्ने पार्टी नेताहरू बत्ताउँछन् ।

राष्ट्रपतिको निर्वाचनभन्दा अघि बस्ने एमाले सचिवालयको बैठकले नेताहरूको जिम्मेवारी व्यापक रूपमा हेरफेर गर्ने तयारी छ । सोही क्रममा प्रदेश १ को इन्चार्जमा पनि नयाँ नेतालाई पठाउने तयारी पार्टी नेतृत्वले गरेको छ ।  इन्चार्जको दौडमा गुरु बराल, भानुभक्त ढकाल, राजेन्द्र गौतम, शेरधन राई, शिवमाया तुम्बाहाम्फे  छन् ।

गुरु बरालले आफू पुरानो र प्रदेश नं १ को भूगोललाई नै केन्द्रित गरेर राजनीति गरेकोले उक्त पद आफूले पाउनु पर्ने दाबी पेस गर्दै आउनु भएको छ । अर्का नेता शेरधन राई आफू पूर्व मुख्यमन्त्री समेत भइसकेकोले पार्टीलाई मिलाएर लैजान र संगठन विस्तार गर्न सहज हुने दाबी गर्दै आउनुभएको छ । जनसंगठन सञ्चालन संयन्त्रका संयोजक भानुभक्त ढकाल अर्का सशक्त दावेदार हुनुुहुन्छ ।

प्रदेश नं १ कै बासिन्दा भएपनि काठमाडौं केन्द्रित भएर बढी काम गरेकोले आफूलाई भूगोलमा गएर पार्टीको काम गर्न इच्छा भएको ढकालले नेतृत्वसँग भन्दै आउनुभएको छ । भूगोलको जिम्मेवारी पाएमा आफ्नो निर्वाचन क्षेत्र मोरङ ३ मा पनि पार्टीको पकड बढाउन सकिने ढकालको योजना छ । तर खगराज अधिकारी गण्डकीको मुख्यमन्त्री भएपछि उक्त संगठन विभागको प्रमुख रिक्त गराएर आफूले उक्त विभागको नेतृत्व लिन चाहेको पनि ढकालले निकटस्थलाई बताउँदै आउनुभएको छ ।

अर्का दाबेदार राजेन्द्र गौतम हुनुहुन्छ । प्रदेश सहइन्चार्ज र संखुवासभाको समेत इन्चार्ज गौतम आफू पुरानो नेता भएको र पछिल्लो पाँच वर्षमा कुनै पनि राजकीय जिम्मेवारी प्राप्त नगरेकोले अब प्रदेश १ को इन्चार्ज पद आफूले पाउनु पर्ने दाबी गर्दै आउनुभएको छ ।

पार्टीको कानुन विभाग प्रमुख शिवमाया तुम्बाहाम्फेले पनि इन्चार्जको लागि सशक्त दाबी गर्दै आउनुभएको छ । महिलाले पनि प्रदेशको इन्चार्ज सीप कुशलतापूर्वक चलाउन सक्छन् भन्ने देखाउन आफूले त्यो पदमा दाबी गरेको उहाँको भनाइ छ । पूर्व मुख्यमन्त्री भीम आचार्य पनि भित्रभित्रै प्रदेशको इन्चार्ज आफूले पाउनु पर्ने भन्दै नेताहरूसँग लबिङमा हुनुहुन्छ । पार्टीका कतिपय नेताहरू चाहिँ सचिव योगेश भट्टराईलाई प्रदेश नं १ को इन्चार्ज बनाएर भूगोलमा खटाउनु पर्ने लबिङ गर्दै आएका छन् ।

काठमाडौं – सूचना वर्गीकरणका लागि तयार पारेको प्रस्ताव स्थगन गरी नयाँ शिराबाट छलफल गरी अगाडि बढाउने समझदारी भएको छ ।

मुख्यसचिवको नेतृत्वमा रहेको सूचना वर्गीकरण समितिले सरकारी सूचनालाई ८७ बुँदामा वर्गीकरण गरिएकोमा सरोकारवाला पक्षले नेपाल सरकारको ध्यानाकर्षण गराएपछि सोमबार दिउँसो प्रधानमन्त्री तथा मन्त्रिपरिषदको कार्यालय सिंहदरबारमा सरोकारवाला पक्षसँग छलफल गरिएको थियो ।

छलफलका क्रममा सूचना वर्गीकरण गर्दा नेपालको संविधान र सूचनाको हक सम्बन्धि प्रचलित कानुनको प्रतिकूल हुन नहुने र वास्तविक सूचना प्रवाहित गर्दा राजनीतिक प्रणाली र लोकतन्त्र बलियो हुनेमा सरोकार पक्षले सरकारको ध्यानाकर्षण गराएका छन् ।

छलफलमा नेपाल सरकारका मुख्यसचिव एवं समितिका संयोजक शंकरदास बैरागीले आफूहरुले सूचनाको हक कुण्ठित गर्न नभएर सूचना व्यवस्थित गर्न वर्गीकरणको प्रस्ताव अगाडि सारेको बताए । उनले सरोकार पक्षको मागलाई समेत ध्यानमा राखेर प्रस्ताव परिमार्जन गरिने प्रतिवद्धता व्यक्त गरे ।

छलफलमा नेपाल पत्रकार महासंघका अध्यक्ष बिपुल पोखरेलले लोकतान्त्रिक प्रणालीमा जनतालाई शक्तिशाली बनाउन सूचनाको हकको व्यवस्था गरिएकाले वर्गीकरणको प्रस्ताव फिर्ता लिएर नयाँ ढंगले छलफल गर्न नेपाल सरकारसँग आग्रह गरे ।

छलफलका क्रममा सरकारका प्रतिनिधि र सञ्चार क्षेत्रका प्रतिनिधिहरुबिच अहिले अगाडि बढाएको प्रस्तावलाई फिर्ता गरी सरोकारवाला पक्षसँगको समझदारीमा नयाँ प्रस्ताव लैजाने समझदारी भएको छ ।

मुख्यसचिवको अध्यक्षमा भएको अनौपचारिक छलफलमा नेपाल पत्रकार महासंघका अध्यक्ष बिपुल पोखरेल, सूचना, सञ्चार तथा प्रविधि मन्त्रालयका सचिव, पत्रकार महासंघका प्रतिनिधिहरु र प्रधानमन्त्रीको प्रेस टिमका प्रतिनिधिहरु लगायत उपस्थित थियो ।

मोरङ – नेकपा एमालेका महासचिव शङ्कर पोखरेलले सात राजनीतिक दलको साझा नीतिका आधारमा सरकार निर्माण भएको बताउनु भयो ।
सोमबार विराटनगर विमानस्थलमा सञ्चारकर्मीसँग कुरा गर्दै उहाँले यस्तो बताउनु भयो । उहाँले सरकार सञ्चालन गर्न पनि सात राजनीतिक दलको साझा नीति र कार्यक्रमबाट हुने बताउनुभएको छ ।

“राष्ट्रिय सहमति कायम गर्नु भनेको सत्तापक्षका उम्मेदवारका लागि सबैको सहमति खोज्नु हो”, महासचिव पोखरेलले भन्नुभयो । केन्द्र र सातवटै प्रदेशमा सत्तापक्षको बहुमत रहेकाले राष्ट्रपतिमा सत्तापक्षको उम्मदेवार विजयी हुने विश्वास उहाँले व्यक्त गर्नुभयो । उहाँले नेपाली कांग्रेसले प्रतिपक्षमा बसेर राज्यको प्रमुख दाबी गर्न नमिल्ने बताउनुभयो ।

काठमाडौं – मन्त्रीपरिषदको बैठक आज दिउँसो ४ बजे बस्ने भएको छ । प्रधानमन्त्री तथा मन्त्री परिषदको कार्यालय सिंहरबारमा बस्ने भएको हो ।

आज बस्ने मन्त्रीपरिषदको नियमित बैठक भएकाले सो बैठकमा राष्टपति निर्वाचनका वारेमा छलफल हुने स्रोतले जनाएको छ ।

काठमाडौं – नेकपा (एमाले) का महासचिव शंकर पोखरेलले सत्ता समिकरणमा फेरबदल ल्याउने उद्देश्यसहित निःवर्तमान गृहमन्त्री रवि लामिछानेलाई नागरिकता प्रकरणमा मुद्दा हालेकाे बताउनुभएकाे छ ।

एमाले महासचिव पोखरेलले सत्ता समिकरणमा फेरबदल ल्याउन सकिन्छ कि भनेर निःवर्तमान गृहमन्त्री लामिछानेलाई नागरिकता प्रकरणमा मुद्दा हालिएको बताउनुभएकाे हाे । आइतबार सन्चारकरमीसँग कुराकानी गर्दै उहाँले लामिछानेको नागरिकता प्रकरणले सत्ता समिकरणमा फेरबदल नहुने स्पष्ट पार्नुभयाे।

उहाँले राजनीतिक मिसन अदालती प्रक्रियाले उत्पन्न गरेको प्रश्नहरुका कारण नबिथोलिने भन्दै समस्याहरुको समाधान गरिने बताउनुभयाे। उहाँले विगतमा पिआर लिएर विदेशमा बसेका थुप्रै व्यक्तिहरु नेपाल फर्किंदा स्वतः नेपाली नागरिक भएका आम अभ्यास रहेको भए पनि कसैले प्रश्न नउठाएको बताउनुभयाे।

उहाँले भन्नुभयाे–‘सामान्यतया अभ्यासमा के हुनेगर्छ भन्ने कुरालाई उहाँले आम अभ्यासलाई रवि लामिछानेले प्रयोगमा ल्याउनु भयो। आम अभ्यासमा जे भइराखेको छ त्यही अभ्यासमा उहाँ हिड्न खोज्नुभयो। तर अदालतले चाहीँ भाषालाई समात्यो। मुद्दा परिसकेपछि अदालतले भाषालाई समाउने कुरा चाहीँ स्वभाविक पनि होला। तर नेपालका सन्दर्भमा भन्ने हो भने थुप्रै व्यक्तिहरु पिआर लिएर विदेशमा बसेकाहरु फर्केर आउँदाखेरी स्वतः नेपाली नागरिक भएका छन्। कसैले प्रश्न उठाएको छ र?’

महासचिव पोखरेलले रवि लामिछानेको नागरिकता प्रकरणमा सर्वोच्च अदालतले देखाएको सक्रियता चमत्कारिक रहेको टिप्पणी गर्नुभयाे।

उहाँले अदालतमा त्यस्तै प्रकृतिका मुद्दाहरुको निरुपण गर्न उदासिन हुने र प्रक्रिया नै अगाडी नबढ्ने स्थिति हुने तर कतिपय मुद्दाहरुको फटाफट निर्णय हुने गरेको भन्दै यसको यथोचित जवाफ अदालतले दिनुपर्ने बताउनुभयाे।

उहाँले प्रधानन्यायाधीशको महाअभियोग प्रकरणका सन्दर्भमा संसदले लेखेको पत्रका बारेमा सर्वोच्चले देखाएको सक्रियता भने अस्वभाविक रहेको उल्लेख गर्नुभयाे। उहाँले आफूहरुले सर्वोच्च अदालतको फैसलालाई सम्मान गर्ने बताउनुभयाे।

काठमाडौं – स्वास्थ्य तथा जनसंख्यामन्त्री पदम गिरीले नर्समैत्री नीति बनाउन सक्रिय भूमिका खेल्ने बताउनुभएकाे छ । बिरामीको सेवामा चौबिसै घण्टा खटिने नर्सहरूको सेवा–सुविधा वृद्धि गर्नका लागि भूमिका खेल्ने उहाँले बताउनुयभाे । नेपाल नर्सिङ संघको ६१ औं वार्षिक उत्सव तथा राष्ट्रिय नर्स दिवसका अवसरमा काठमाडौंमा बोल्दै उहाँले यस्तो बताउनुभएकाे हाे ।

‘नर्सहरुका समस्या पहिचान गरेर राज्यले न्यायोचित ढंगले सम्बोधन नगर्दा उनीहरुमा नैराश्यता उत्पन्न हुन्छ र समाजमा अन्य समस्या देखिन्छ,’मन्त्री गिरीले भन्नुभयाे,‘नर्सहरूले एउटा लेभल पास गर्नुहुन्छ । मैले सुने ८/१० हजारमा पनि निजी क्षेत्रमा काम गर्नुपर्ने अवस्था छ । यो निकै चिन्ताको विषय हो । यसरी न्युनतम तलब भत्ता पनि नदिइ श्रम शोषण गर्ने कुरा कुनै पनि हालतमा ठिक हुँदैन । त्यस्ता अस्पताल र निजी स्वास्थ्य संस्थाको राम्रोगरी अनुगमन हुनेछ र आवश्यक कारबाही हुन्छ । यसमा कुनै सम्झौता हुँदैन तथ्य र प्रमाण भेटियो भने नविकरण नगर्ने र खारेज गर्नेसम्म पनि हुनसक्छ,’उहाँले भन्नुभयाे ।

संवेदनशिल पेशा भएकाले नर्सहरूमा धैर्यता जरुरी रहने उहाँले बताउनुभयाे । ‘तपाईंहरू यो पेशामा आउँदाखेरी नै यो पेशाका चुनौती के–के हुन् भन्ने थाहा पाएरै आउनुभएको छ । त्यसैले जस्तोसुकै बेलामा पनि धैर्याता चाहिन्छ । तपाईंहरुको सानो लापरबाहीले एकजनाको ज्यान जानसक्छ । उसका बालबच्चा टुहुरा हुनसक्छन् र आफन्तले परिवारको सदस्य गुमाउँछन् । त्यसैले नर्सहरुको काँधमा ठूलो अभिभारा हुन्छ,’उहाँले भन्नुभयाे।

दक्ष नर्सहरू राम्रो सेवा–सुविधा पाएर विदेशमा रोजगारी गर्नु सकारात्मक पाटो रहेको उहाँले बताउनुभयाे।  ‘हामी संसारको जुनसुकै कुनामा गएर भएपनि जागिर गर्दा हुन्छ । तर हामी दक्ष हुनुपर्यो । हामीले पाउने सेवा सुविधा त्यही मापदण्डको हुनुपर्यो । आज विदेशीहरू नेपालमा आएर जागिर खाइरहेका छन् । हामी पनि जान हुन्छ,’उहाँले भन्नुभयाे,‘तर श्रमको न्युन मुल्य लिएर जाने कुरा उचित हुँदैन ।’

जनकपुरधाम /  नवनियुक्त मधेश प्रदेशको मुख्य न्यायाधिवक्ता वीरेन्द्रकुमार ठाकुरले पद तथा गोपनीयताको शपथ लिएका छन् ।

उच्च अदालत जनकपुरका कामु मुख्य न्यायाधीश गुणराज ढुंगेलबाट उनले पद तथा गोपनीयताको शपथ लिएका हुन् ।

मधेश प्रदेशका मुख्यमन्त्री सरोजकुमार यादवको सिफारिसमा प्रदेश प्रमुख हरिशंकर मिश्रले ठाकुरलाई मधेश प्रदेशको मुख्य न्यायाधिवक्तामा नियुक्त गरेका थिए ।

काठमाडौँ – उपप्रधानमन्त्री  एवम् भौतिक पूर्वाधार तथा यातायात मन्त्री नारायणकाजी श्रेष्ठसँग चीनका राजदूत चेन सोङ्गले शिष्टाचार भेटवार्ता  गर्नुभएको छ ।

सिंहदरबारस्थित उपप्रधानमन्त्री श्रेष्ठकै कार्यकक्षमा नेपालका लागि चीनका राजदूत सोङ्गले शिष्टाचार भेटघाट गर्नुभएको हो ।

भेटका क्रममा उहाँहरूबीच दुई देशबीचको सम्बन्ध र समसामयिक विषयमा कुराकानी भएको बताइएको छ।