बालेनलाई प्रधानमन्त्री बनाउने सहमतिबारे अर्याल अनविज्ञ ! राजुको चेतावनी– खुरापाती नगर्नुहोस्
Nepal One HD २६ फागुन २०८२ १८:३९
काठमाडौं । राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह ‘बालेन’ प्रस्तावित भावी प्रधानमन्त्री हुन् ।
झापा–५ बाट निर्वाचित भएर आएसँगै उनलाई प्रधानमन्त्री बन्ने बाटो खुलेको छ । तर, के उनी प्रधानमन्त्री बन्छन् नै ? त्यसका लागि उनलाई सभापतिले रवि लामिछानेले संसदीय दलको नेता बनाउँछन् ? संशय उत्पन्न भएको छ ।
यस्तो संशय उत्पन्न हुनुमा रास्वपा उपसभापति डोलप्रसाद अर्यालको अभिव्यक्ति जिम्मेवार छ ।
हालै उपसभापति अर्यालले निर्वाचित भएपछि बालेनलाई प्रधानमन्त्री बनाउने सहमतिको कार्यान्वयन हुन्छ भन्ने पत्रकारको प्रश्नमा आफू त्यसबारे अनविज्ञ भएको जसरी प्रस्तुत भएका थिए । उनले भनेका थिए, ‘त्यो सम्झौतामा के लेखिएको छ, त्यो हेर्नुपर्छ । मलाई सबै कण्ठ छैन ।’
अर्याल यसपछि आलाेचित भए । त्यसपछि आफ्नाे पूर्ववत् अभिव्यक्तिलाई सच्याउँदै भने, ‘सम्झौतामा जे लेखिएको छ, त्यसमा दायाँबायाँ हुँदैन ।’
१३ पुसमा सभापति रवि लामिछाने र बालेन्द्रबीच भएको सहमतिमा बालेन्द्रलाई प्रधानमन्त्री बनाउने उल्लेख छ । बालेन नै संसदीय दलको नेता हुने पनि स्पष्ट रुपमा भनिएको छ ।
‘राष्ट्रिय स्वतन्त्र पार्टीको केन्द्रीय सभापति रवि लामिछाने रहने र आसन्न प्रतिनिधिसभाको निर्वाचनपछि संसदीय दलको नेता तथा भावी प्रधानमन्त्रीको उम्मेदवार बालेन्द्र शाह हुने,’ सात बुँदे सहमतिमा उल्लेख छ ।
तर, निर्वाचनपछि दुई तिहाई बहुमत प्राप्त गर्न लागेको रास्वपामा एकथरी नेताले बालेन्द्रलाई संसदीय दलको नेता र प्रधानमन्त्री हुनबाट रोक्न लागेको गाइँगुुइँ चर्चाबीच उपसभापति डीपी अर्यालको अभिव्यक्तिले संशय प्रकट गरेको हो । अर्याल सभापति रवि लामिछानेसँग निकट नेता हुन् । कतै उनले सभापति लामिछानेको भाषा त बोलेका होइनन् ? आशंका उत्पन्न भएको छ ।
यस्तोमा बालेन काठमाडौँ महानगरको प्रमुख छँदा महानगर प्रहरीको प्रमुख रहेका र हालै काठमाडौं–३ बाट निर्वाचित सांसद राजुनाथ पाण्डेले बालेन प्रधानमन्त्री बन्ने दाबी गर्दै खुुरापाती कुरा नगर्न पार्टी उपसभापति अर्याललाई चेतावनी दिएका छन् ।
उनले मंगलबार भने, ‘हाम्रो राष्ट्रिय स्वतन्त्र पार्टीको प्रधानमन्त्रीको उम्मेदवार वरिष्ठ नेता बालेन्द्र शाह, त्यसमा कन्फ्युजन नहोस् । कमा, फुलिस्टप, दायाँ बायाँ कुरा राष्ट्रिय स्वतन्त्र पार्टीको कुनै पनि तहको पदाधिकारीलाई छुट छैन ।’
सभापति लामिछाने नै प्रधानमन्त्री बन्नुपर्ने भनेर श्रम संस्कृति पार्टीका अध्यक्ष हर्क साम्पाङले पनि सुझाएका छन् ।
त्यसमाथि सम्झौतामा के लेखिएको छ, त्यो हेर्नुपर्छ भन्ने उपसभापति अर्यालको अभिव्यक्तिले भावी प्रधानमन्त्रीको विषयले रास्वपामा मिल्ती छैन कि भन्ने देखाएको छ ।
